ഇന്ത്യ–അഫ്​ഗാൻ ആകാശപാത ഇന്ത്യയുടെ പിടിവാശിയെന്ന്​ ചൈന

ബീജിങ്​: ഇന്ത്യ–അഫ്​ഗാനിസ്​താൻ ആകാശപാതക്കെതിരെ വിമർശനവുമായി ചൈനീസ്​ മാധ്യമം. സർക്കാർ നിയന്ത്രണത്തിലുള്ള ഗ്ലോബൽ ടൈംസാണ്​ വിമർശനവുമായി രംഗത്തെത്തിയിരിക്കുന്നത്​. ചൈന–പാക്​ സാമ്പത്തിക ഇടനാഴിക്ക്​ പകരമായാണ്​ പുതിയ പദ്ധതിയുമായി ഇന്ത്യ രംഗത്തെത്തിയിരിക്കുന്നത്​ എന്നാണ്​​ ​ചൈനീസ്​  മാധ്യമം പറയുന്നത്​.

കഴിഞ്ഞ ദിവസമാണ്​ ഇന്ത്യ–അഫ്​ഗാൻ ആകാശപാതയുടെ ഉദ്​ഘാടനം നിർവഹിച്ചത്​. എഷ്യൻ രാജ്യങ്ങൾക്ക്​ ഇന്ത്യയുമായി വ്യാപാര ബന്ധം ദൃഢമാക്കാൻ പാത സഹായകമാകുമെന്നാണ്​ പ്രതീക്ഷിക്കുന്നത്​. എന്നാൽ സാമ്പത്തിക താൽപ്പര്യങ്ങളല്ല രാഷ്​ട്രീയ താൽപ്പര്യങ്ങൾ മൂലമാണ്​ പുതിയ പാത ഇന്ത്യ തുറന്നതെന്നാണ്​ ഗ്ലോബൽ ടൈംസ്​ കുറ്റപ്പെടുത്തുന്നത്​. ചൈന–പാക്​ സാമ്പത്തിക ഇടനാഴിക്ക്​ ബദലാണ്​ പദ്ധതിയെന്നും ചൂണ്ടിക്കാട്ടുന്നു. 

പാക്​ അധീന ക​ശ്​മീരിലെ ഗിൽജിത്​–ബാൾട്ടിസ്ഥാനി​ലൂടെ കടന്നുപോകുന്ന നിർദ്ദിഷ്​ട ചൈന–പാക്​ സാമ്പത്തിക ഇടനാഴിയെ ഇന്ത്യ ശക്​തമായി എതിർത്തിരുന്നു. സാമ്പത്തിക ഇടനാഴിക്കായി 5,000 കോടി ഡോളറാണ്​ ചൈന മുതൽമുടക്കുന്നത്​.