ജൈന വിശ്വാസിയായ അമിത്​ഷാ സ്വയം ഹിന്ദുവെന്ന്​ വിളിക്കുന്നുവെന്ന്​ രാജ്​ ബബ്ബാർ​

സൂറത്ത്​: സോമനാഥ ക്ഷേത്ര സന്ദർശനവേളയിൽ രാഹുൽ ഗാന്ധി സന്ദർശന രജിസ്​റ്ററിൽ അഹിന്ദുവെന്ന്​ രേഖപ്പെടുത്തിയെന്ന വിവാദം കത്തിപ്പടരവെ അമിത്​ ഷാക്കെതിരെ കോൺഗ്രസ്​. അമിത്​ഷാ സ്വയം ഹിന്ദുവെന്നാണ്​ വിശേഷിപ്പിക്കുന്നത്​. എന്നാൽ അദ്ദേഹം ജൈനനാണെന്ന്​ കോൺഗ്രസ്​ നേതാവ്​ രാജ്​ ബബ്ബാർ പറഞ്ഞു​. 

രാഹുലും കുടുംബവും കാലങ്ങളായി ശിവഭക്​തരാണ്​. ശിവ ഭക്​തർ ധരിക്കുന്ന രുദ്രാക്ഷം ഇന്ദിരാഗാന്ധി പതിവായി ധരിക്കാറുണ്ടായിരുന്നുവെന്നും രാജ്​ ബബ്ബാർ പറഞ്ഞു. 

ത​​​െൻറ കുടുംബം ശിവ ഭക്​തരാണെന്നും എന്നാൽ മതം വ്യക്​തിപരമാണെന്നും​ രാഷ്​ട്രീയ നേട്ടത്തിന്​ ഉപയോഗിക്കാറില്ലെന്നും രാഹുൽ കഴിഞ്ഞ ദിവസം വ്യക്​തമാക്കിയിരുന്നു. ത​​​െൻറ മുത്തശ്ശി(ഇന്ദിരാഗാന്ധി) ശിവഭക്​തയായിരുന്നു. മറ്റു കുടുംബാംഗങ്ങളും അങ്ങനെ തന്നെ. എന്നാൽ ഇത്തരം കാര്യങ്ങൾ സ്വകാര്യമായി സൂക്ഷിക്കാറാണ്​ പതിവ്​. പുറത്ത്​ മതപരമായ കാര്യങ്ങൾ സംസാരിക്കാറില്ല. വിശ്വാസം വ്യക്​തിപരമായ കാര്യമാണ്​. ശിവഭക്​തി വിൽക്കാനോ രാഷ്​ട്രീയ ഉപകരണമാക്കാനോ ആഗ്രഹിക്കുന്നില്ലെന്നും രാഹുൽ പറഞ്ഞിരുന്നു. 

രാഹുൽ സോമനാഥ ​ക്ഷേത്രം സന്ദർശിച്ചപ്പോൾ അഹിന്ദുക്കൾക്കുള്ള രജിസ്​റ്റർ ബുക്കിലാണ്​ പേര്​ രജിസ്​റ്റർ ചെയ്​തതെന്ന്​ ചൂണ്ടിക്കാട്ടിയായിരുന്നു ബി.ജെ.പി വിവാദത്തിന്​ തുടക്കമിട്ടത്​. എന്നാൽ ക്ഷേത്രത്തിൽ ഒരു രജിസ്​റ്റർ ബുക്ക്​ മാത്രമേ ഉണ്ടായിരുന്നുള്ളൂവെന്നും അതിലാണ്​ രാഹുൽ പേര്​ എഴുതിയതെന്നും കോൺഗ്രസ്​ വിശദീകരിച്ചിരുന്നു. തെരഞ്ഞെടുപ്പിൽ തോൽവി മണക്കുന്ന ബി.ജെ.പിയുടെ പുതിയ അടവാണ്​ വിവാദമെന്നും കോൺഗ്രസ്​ ആരോപിച്ചിരുന്നു.