അസം-മിസോറം അതിർത്തിയിൽ നിന്ന്​ പൊലീസിനെ പിൻവലിക്കാൻ ധാരണ

ദിസ്പുര്‍: സംഘര്‍ഷം നിലനില്‍ക്കുന്ന അസം-മിസോറം അതിര്‍ത്തി മേഖലയില്‍നിന്ന് പൊലീസിനെ പിന്‍വലിക്കാൻ ഇരു സർക്കാരുകളും തമ്മിൽ ധാരണയായി. സംഘർഷ മേഖലകളിൽ സുരക്ഷക്കായി കേന്ദ്ര അര്‍ധസൈനിക വിഭാഗത്തെ വിന്യസിക്കും. കേന്ദ്ര ആഭ്യന്തര സെക്രട്ടറിയുടെ മധ്യസ്ഥതയില്‍ ബുധനാഴ്ച ചേര്‍ന്ന ഇരുസംസ്​ഥാനങ്ങളി​ലെയും ചീഫ്​ സെക്രട്ടറിമാരുടെയും ഡി.ജി.പിമാരുടെയും ഉന്നതതല യോഗത്തിലാണ് തീരുമാനം.

രണ്ടുമണിക്കൂര്‍ നീണ്ട ചര്‍ച്ചയ്ക്കുശേഷമാണ്​ തങ്ങളുടെ പൊലീസ് സേനകളെ പിന്‍വലിക്കാന്‍ ഇരുസംസ്ഥാനങ്ങളും സമ്മതിച്ചത്​. കേന്ദ്ര ആഭ്യന്തര സെക്രട്ടറി അജയ്​ ഭല്ല വിളിച്ചുചേർത്ത യോഗത്തിൽ അസം ചീഫ്​ സെക്രട്ടറി ജിഷ്​ണു ബറുവ, ഡി.ജി.പി ഭാസ്​കർ ജ്യോതി മഹന്ത, മിസോറം ചീഫ്​ സെക്രട്ടറി ലാൽനുൻമാവിയ ചുവാ​ൻഗോ, ഡി.ജി.പി എസ്​.ബി.കെ സിങ്​ എന്നിവർ പ​​​​​ങ്കെടുത്തു. സംഘര്‍ഷം നിലനിന്ന ദേശീയ പാത 306ല്‍ അര്‍ധസൈനിക വിഭാഗത്തെ വിന്യസിക്കാൻ ചർച്ചയിൽ തീരുമാനമായെന്ന്​ അസം ചീഫ്​ സെക്രട്ടറി ജിഷ്​ണു ബറുവ പറഞ്ഞു. ഒരു മുതിർന്ന സി.എ.പി.എഫ്​ ഉദ്യോഗസ്​ഥന്‍റെ നേതൃത്വത്തിലായിരിക്കും സേനയുടെ പ്രവർത്തനം. അതിര്‍ത്തി പ്രശ്‌നം സൗഹാര്‍ദപരമായി പരിഹരിക്കാന്‍ ഉഭയകക്ഷി ചർച്ച തുടരാന്‍ തീരുമാനമായതായും അദ്ദേഹം വ്യക്​തമാക്കി.

നിലവില്‍ ഇവിടെ സി.ആര്‍.പി.എഫിന്‍റെ അഞ്ച് കമ്പനി സൈനികരെ വിന്യസിച്ചിട്ടുണ്ട്. രണ്ടു കമ്പനി ഉദ്യോഗസ്ഥരെ കൂടി ഇവര്‍ക്കൊപ്പം കൂടുതലായി വിന്യസിക്കാനാണ്​ തീരുമാനം. ഇരുസംസ്​ഥാനങ്ങളിലെയും പൊലീസ്​ സേനകൾ തമ്മിൽ തിങ്കളാഴ്ച അതിർത്തിയിലുണ്ടായ സംഘർഷത്തിൽ ആറ്​ അസം പൊലീസ്​ ഉദ്യോഗസ്​ഥരും ഒരു സാധാരണക്കാരനും മരിച്ചിരുന്നു. ഈ സാഹചര്യത്തിലാണ്​ ഉന്നതതല ചർച്ച നടന്നത്​.