അമ്മയുടെ മൃതദേഹത്തിനരികിൽ രണ്ടുദിവസമായി വിശന്നുകരഞ്ഞ്​ പിഞ്ചുകുഞ്ഞ്​, കോവിഡ്​ ഭയന്ന്​ അടുക്കാതെ അയൽക്കാർ-ഒടുവിൽ ഈ വനിതാ പൊലീസുകാർ അവന്​ 'അമ്മയായി'​

പുനെ: അമ്മ മരിച്ച്​ കിടക്കുകയാണെന്ന്​ അറിയാതെ രണ്ട്​ ദിവസമായി വിശന്നുകരയുന്ന പിഞ്ചുകുഞ്ഞ്​. ആ സ്​ത്രീ കോവിഡ്​ ബാധിച്ചാണ്​ മരിച്ചത്​ എന്ന സംശയത്താൽ കുഞ്ഞിന്​ അൽപം പാൽ​ കൊടുക്കാൻ ഭയന്ന്​ അയൽക്കാരും. മഹാമാരിയുടെ ഇൗ കെട്ടകാലത്ത്​ ഉള്ളുപൊള്ളിക്കുന്ന ഇത്തരം കാഴ്ചകൾ ഇനിയെത്ര കാണേണ്ടി വരുമെന്ന ആശങ്ക മാത്രം ബാക്കി.

പൂനെയിലെ പിംപ്​രി ചിഞ്ച്വാഡിലാണ്​ കഴിഞ്ഞയാഴ്ച ഹൃദയഭേദകമായ ഈ സംഭവം നടന്നത്​. ഇവിടെ വാടകക്ക്​ താമസിക്കുന്ന സ്​ത്രീ ശനിയാഴ്ചയാണ്​ മരിച്ചത്​. ആ സമയത്ത്​ അമ്മ മരിച്ചുകിടക്കുകയാണെന്ന്​ അറിയാതെ മൃതദേഹത്തിനരികിൽ വിശന്നുതളർന്ന്​ കരയുന്ന ഒന്നര വയസ്സുള്ള കുഞ്ഞ്​ അല്ലാതെ മറ്റാരും ആ വീട്ടിൽ ഉണ്ടായിരുന്നില്ല. ഇവരുടെ ഭർത്താവ് ഉത്തർപ്രദേശിലാണ്​ ജോലി ചെയ്യുന്നത്​. കുഞ്ഞിന്‍റെ കരച്ചിൽ കേൾക്കുന്നുണ്ടെങ്കിലും ആ സ്​ത്രീ കോവിഡ്​ ബാധിച്ചാണ്​ മരിച്ചതെന്ന സംശയത്താൽ അവിടേക്ക്​ പോകാനോ ആ കുഞ്ഞിനെ ഏറ്റെടുക്കാനോ അയൽക്കാർ ആ​രും തയാറായില്ല.

രണ്ട്​ ദിവസം കഴിഞ്ഞ്​ തിങ്കളാഴ്​ച ദുർഗന്ധം സഹിക്കാനാകാതെ വന്നപ്പോൾ വീട്ടുടമ പൊലീസിൽ വിവരം അറിയിക്കുകയായിരുന്നു. പൊലീസ്​ വന്ന്​ വാതിൽ തുറന്ന്​ നോക്കിയപ്പോളാണ്​ ഹൃദയത്തിന്​ മുറിവേൽപ്പിക്കുന്ന ആ കാഴ്ച കണ്ടത്​. രണ്ടുദിവസം പഴക്കമുള്ള അമ്മയുടെ മൃതദേഹത്തിനരികിൽ ഇരുന്ന്​ വാവിട്ടു കരയുകയായിരുന്നു ആ കുഞ്ഞ്​. ഉടൻ പൊലീസ്​ സംഘത്തിലുണ്ടായിരുന്ന സുശീല ഗാഭലെ, രേഖ വാസി എന്നിവർ കുഞ്ഞിനെ എടുക്കുകയും പാലും ബിസ്​കറ്റും നൽകുകയുമായിരുന്നു. രണ്ട്​ ദിവസം ഒന്നും കഴിക്കാതെ കഴിഞ്ഞുകൂടിയ കുഞ്ഞ്​ അ​േതാടെ കരച്ചിലും നിർത്തി.

'എനിക്ക് എട്ടും ആറും വയസ്സുള്ള രണ്ട്​ മക്കളുണ്ട്​. ഈ കുഞ്ഞും എന്‍റെ സ്വന്തം കുഞ്ഞുങ്ങളെ പോലെയാണ്​. വളരെയധികം വിശന്നുവലഞ്ഞിരുന്നു ആ കുഞ്ഞ്​. അവൻ ആർത്തിയോടെ പാൽ കുടിക്കുന്നത്​ കണ്ട്​ ഞങ്ങൾക്കുതന്നെ സങ്കടമായി' -സുശീല ഗാഭലെ പറഞ്ഞു. അൽപം പനി ഉണ്ടെന്നതൊഴിച്ചാൽ കുഞ്ഞിന്​ മറ്റ്​ പ്രശ്​നങ്ങളൊന്നുമില്ലെന്ന്​ രേഖ വാസി പറഞ്ഞു. 'കുഞ്ഞിന്​ ചെറുതായി പനിക്കുന്നുണ്ടായിരുന്നു. ഞങ്ങൾ​ അവനെ ഡോക്​ടറെ കാണിച്ചു. ആദ്യം അവന്‍റെ വിശപ്പ്​ മാറ്റാനാണ്​ ഡോക്​ടർ പറഞ്ഞത്​. പാലും ബിസ്​കറ്റും കഴിച്ച്​ അവൻ സന്തോഷവാനായതോടെ അടുത്തുള്ള സർക്കാർ ആശുപത്രിയിൽ കൊണ്ടുപോയി അവന്‍റെ കോവിഡ്​ പരിശോധനയും നടത്തി' -രേഖ പറയുന്നു.

കുഞ്ഞിന്‍റെ പരിശോധനഫലം നെഗറ്റിവ്​ ആണ്​. ഇപ്പോൾ സർക്കാറിന്‍റെ അഭയകേന്ദ്രത്തിലാണ്​ കുഞ്ഞ്​ ഉള്ളതെന്നും ഉത്തർ​പ്രദേശിലുള്ള പിതാവ്​ വരുന്നതിനായി കാത്തിരിക്കുകയാണെന്നും എസ്​.ഐ പ്രകാശ്​ യാദവ്​ വ്യക്​തമാക്കി​. കുഞ്ഞിന്‍റെ അമ്മ കോവിഡ്​ ബാധിച്ചാണോ മരിച്ചതെന്ന്​ സ്​ഥിരീകരിച്ചിട്ടില്ല. പോസ്റ്റ​ുമോർട്ടം റിപ്പോർട്ട്​ ലഭ്യമായിട്ടില്ലെന്നും മരണകാരണം വ്യക്​തമല്ലെന്നും പൊലീസ്​ അറിയിച്ചു.