ആദിവാസികൾക്ക് കോൺഗ്രസിന്റെ ഗാരന്‍റി; ജനസംഖ്യക്ക്​ ആനുപാതികമായ ക്ഷേമബജറ്റ്​

ന്യൂഡൽഹി: ആദിവാസികളുടെ അവകാശങ്ങൾ ഉറപ്പുവരുത്തുമെന്ന ഗാരന്‍റി മുന്നോട്ടുവെച്ച്​ കോൺഗ്രസ്​. ആദിവാസികളുടെ അധിവാസ മേഖലയായ കാടും ഭൂമിയും വെള്ളവും സംരക്ഷിക്കും. ആദിവാസികൾ പീഡിപ്പിക്കപ്പെടുകയും അവരുടെ ഭൂമി കൈയേറുകയും അടിമവേല ചെയ്യിക്കുകയുമാണ്​ നടക്കുന്നതെന്ന്​ കോൺഗ്രസ്​ അധ്യക്ഷൻ മല്ലികാർജുൻ ഖാർഗെ വാർത്തസമ്മേളനത്തിൽ പറഞ്ഞു.

ആദിവാസികൾക്ക്​ നീതി ഉറപ്പാക്കുമെന്ന ഗാരന്‍റി കോൺഗ്രസ്​മുന്നോട്ടുവെക്കുകയാണ്​. പാർട്ടി അധികാരത്തിൽ വന്നാൽ ആദിവാസി ജനസംഖ്യക്ക്​ ആനുപാതികമായ ക്ഷേമബജറ്റ്​ പ്രഖ്യാപിക്കും. വനാവകാശ നിയമത്തിന്‍റെ ഫലപ്രദമായ നടത്തിപ്പിന്​ ദേശീയ മിഷൻ രൂപവത്കരിക്കും. മിഷനു കീഴിൽ പ്രത്യേക കർമപദ്ധതി തയാറാക്കും. വനാവകാശ നിയമ പ്രകാരമുള്ള എല്ലാ കേസുകളും ഒരു വർഷത്തിനകം തീർപ്പാക്കും. മോദിസർക്കാർ വനസംരക്ഷണ-ഭൂമി ഏറ്റെടുക്കൽ നിയമത്തിൽ വരുത്തിയ ഭേദഗതി മുഴുവൻ പിൻവലിക്കും.

ലോക്സഭ തെരഞ്ഞെടുപ്പിൽ കോൺഗ്രസ്​ മുന്നോട്ടുവെക്കുന്ന നാലാമത്തെ ഗാരന്‍റിയാണിത്​. മറ്റു ഗാരന്‍റികൾ ഇവയാണ്​: കാർഷിക വിളകൾക്കും വനവിഭവങ്ങൾക്കും മിനിമം താങ്ങുവില നിയമപരമായ അവകാശമാക്കും. ജാതി സെൻസസ്​ നടത്തി സാമൂഹിക നീതി ഉറപ്പാക്കും. സർക്കാർ ഒഴിവുകളിൽ സ്ഥിരനിയമനം നടത്തി യുവാക്കൾക്ക്​ പുതിയ തൊഴിലവസരങ്ങൾ ലഭ്യമാക്കും.