‘നിരപരാധികളെ ശിക്ഷിക്കരുത്’; വീടുകൾ തകർത്ത സ്ഫോടന പരമ്പരയിൽ കശ്മീർ നിലവിളിക്കുന്നു

ശ്രീനഗർ: തീവ്രവാദികളുടെ കുടുംബങ്ങളുടെ വീടുകൾ തകർത്ത സ്ഫോടനങ്ങളുടെ പരമ്പരയിൽ മൗനം വെടിഞ്ഞ് കശ്മീരിലെ രാഷ്ട്രീയക്കാർ. കശ്മീരികൾക്കുമേലുള്ള കൂട്ടായ ശിക്ഷ നിർത്തലാക്കാനും തീവ്രവാദികളെയും സാധാരണക്കാരെയും വേർതിരിക്കാനും അവർ കേന്ദ്രത്തോട് ആവശ്യപ്പെട്ടു.

കഴിഞ്ഞ കുറച്ച് ദിവസങ്ങളായി ഒമ്പത് തീവ്രവാദി വീടുകൾ സ്ഫോടനങ്ങളിൽ തകർന്നുവെന്നും അവയെ ചുറ്റിപ്പറ്റിയുള്ള നിരവധി വീടുകൾക്ക് വ്യാപകമായ നാശനഷ്ടങ്ങൾ സംഭവിച്ചുവെന്നും ഉള്ള റിപ്പോർട്ടുകൾക്കിടയിലാണ് മുൻ മുഖ്യമന്ത്രി മെഹബൂബ മുഫ്തിയടക്കമുള്ള രാഷ്ട്രീയക്കാർ ഇക്കാര്യം ഉന്നയിച്ചത്.

സ്‌ഫോടനങ്ങളിലുടെ ഫലസ്തീനികൾക്കെതിരായ ഇസ്രായേലി​ന്‍റെ തന്ത്രങ്ങൾ സുരക്ഷാ സേന സ്വീകരിച്ചതായും പഹൽഗാം ആക്രമണത്തി​ന്‍റെ ഇരകളായ വിനോദസഞ്ചാരികൾക്ക് ഇതുവരെ ലഭിച്ച പിന്തുണയുടെ അടിത്തറയെ സുരക്ഷാ സേന ഇല്ലാതാക്കുമെന്നും അവർ ആശങ്കപ്പെട്ടു.

തെക്കൻ കശ്മീരിലെ ഒരു ഗ്രാമത്തിലെ ഒരു തീവ്രവാദിയുടെ കുടുംബവീട്ടിൽ ഉണ്ടായ സ്ഫോടനത്തിൽ ചുറ്റുമുള്ള 16 വീടുകൾക്ക് വ്യാപക നാശനഷ്ടമുണ്ടായതായി താമസക്കാർ പറഞ്ഞു. നാശനഷ്ടങ്ങൾ കാരണം ഒരു കുടുംബത്തിന് ദിവസങ്ങൾക്ക് മുമ്പ് വിവാഹം റദ്ദാക്കേണ്ടിവന്നുവെന്ന് അവരിൽ ഒരാൾ പറഞ്ഞു. കുടുംബങ്ങൾക്ക് അവരുടെ വിലയേറിയ വസ്തുക്കൾ നീക്കം ചെയ്യാൻ സമയം നൽകിയില്ലെന്നും അദ്ദേഹം പറഞ്ഞു.

ചൊവ്വാഴ്ചത്തെ പഹൽഗാം കൂട്ടക്കൊലക്കു ശേഷം, തീവ്രവാദവുമായി മുൻകാല ബന്ധമുണ്ടെന്ന പേരിൽ കാശ്മീരിലുടനീളം നൂറുകണക്കിന് ആളുകളെ അധികൃതർ കസ്റ്റഡിയിലെടുത്തിട്ടുണ്ട്. തീവ്രവാദികളുടെ വീടുകളിൽ നടന്ന സ്ഫോടന പരമ്പര വ്യാഴാഴ്ച രാത്രിയാണ് ആരംഭിച്ചത്. പക്ഷേ, കേന്ദ്രസർക്കാർ വേട്ടയാടുമെന്നോ കുറഞ്ഞത് തീവ്രവാദ അനുഭാവികളായി മുദ്ര കുത്തുമെന്നോ ഭയന്ന് രാഷ്ട്രീയക്കാർ ആദ്യം മൗനം പാലിച്ചുവെന്ന് വൃത്തങ്ങൾ പറഞ്ഞു.

ജാഗ്രത പാലിക്കാനും തീവ്രവാദികളും നിരപരാധികളും തമ്മിൽ വ്യക്തമായ വേർതിരിവ് ഉറപ്പാക്കാനും പീപ്പിൾസ് ഡെമോക്രാറ്റിക് പാർട്ടി മേധാവി മെഹബൂബ മുഫ്തി കേന്ദ്രത്തോട് ആവശ്യപ്പെട്ടു. ‘നിരപരാധികളായ ജനങ്ങളെ, പ്രത്യേകിച്ച് ഭീകരതയെ എതിർക്കുന്നവരെ ഒറ്റപ്പെടുത്തരുത്’ -അവർ പറഞ്ഞു.

ആയിരക്കണക്കിന് പേരെ അറസ്റ്റ് ചെയ്തതായും തീവ്രവാദികളുടെ വീടുകൾക്കൊപ്പം സാധാരണ കശ്മീരികളുടെ നിരവധി വീടുകളും പൊളിച്ചുമാറ്റിയതായും റിപ്പോർട്ടുകളുണ്ട്. അന്യവൽക്കരണം തീവ്രവാദികളുടെ വിഭജനത്തി​ന്‍റെയും ഭയത്തി​ന്‍റെയും ലക്ഷ്യങ്ങളെ സഹായിക്കുന്നതിനാൽ നിരപരാധികളായ ആളുകളെ അതി​ന്‍റെ ആഘാതം അനുഭവിക്കാൻ അനുവദിക്കാതിരിക്കാൻ അധികാരികൾക്ക് നിർദേശം നൽകണമെന്ന് ഞാൻ സർക്കാറിനോട് അഭ്യർത്ഥിക്കുന്നുവെന്നും അവർ പറഞ്ഞു.

പഹൽഗാം കൊലയാളികളെ നീതിപീഠത്തിലേക്ക് കൊണ്ടുവരാനുള്ള ശ്രമത്തിൽ നിരപരാധികളായ കശ്മീരി കുടുംബങ്ങളെ ശിക്ഷിക്കരുതെന്ന് ഹുറിയത്ത് ചെയർമാൻ മിർവൈസ് ഉമർ ഫാറൂഖ് അധികാരികളോട് അഭ്യർത്ഥിച്ചു.

‘പഹൽഗാമിലെ ക്രൂരമായ കുറ്റകൃത്യത്തെ കശ്മീരികൾ കൂട്ടായി അപലപിക്കുകയാണ്. കുറ്റവാളികളെ നീതിപീഠത്തിലേക്ക് കൊണ്ടുവരേണ്ടത് അനിവാര്യമാണെങ്കിലും വീടുകളും അയൽപക്കങ്ങളും തകർത്തതായ സോഷ്യൽ മീഡിയയിൽ പ്രചരിക്കുന്ന വിവേചനരഹിതമായ അറസ്റ്റുകളും വിഡിയോകളും അസ്വസ്ഥത ഉളവാക്കുന്നതും ദുഃഖകരവുമാണ്’- അദ്ദേഹം പറഞ്ഞു.

‘നിരപരാധികളായ ഇരകൾക്ക് നീതി തേടുന്നതിൽ നിരപരാധികളായ കശ്മീരി കുടുംബങ്ങളെ ശിക്ഷിക്കരുതെന്ന് ഞാൻ അധികാരികളോട് അഭ്യർത്ഥിക്കുന്നു’- ശ്രീനഗർ എം.പി ആഗ റൂഹുല്ല മെഹ്ദി പറഞ്ഞു,

ഭീകരതക്കെതിരായ പോരാട്ടത്തിൽ ഈ സ്‌ഫോടനങ്ങൾ എന്ത് നേടുമെന്ന് ശ്രീനഗർ മുൻ മേയർ ജുനൈദ് അസിം മട്ടു ചോദിച്ചു. ‘അക്രമത്തിന്റെയും ഭീകരതയുടെയും പാത തിരഞ്ഞെടുക്കാൻ വൃദ്ധരായ മാതാപിതാക്കളെയും കുടുംബങ്ങളെയും ഉപേക്ഷിച്ചവർ വളരെക്കാലം മുമ്പുള്ള അവരുടെ വീടുകളും അവയിൽ വസിച്ചിരുന്ന ആത്മാക്കളെയും നശിപ്പിച്ചു. ഇപ്പോൾ പൊളിച്ചുമാറ്റുന്നത് ആ തകർന്ന നട്ടെല്ലുകൾക്കും ആത്മാക്കൾക്കും അഭയം നൽകുന്ന വീടുകളാണ്’- അദ്ദേഹം പറഞ്ഞു.