ഗോരഖ്പുർ ദുരന്തം: ഒാക്​സിജൻ കരാറുകാരൻ അറസ്​റ്റിൽ

ഗോരഖ്പുർ: ഉത്തർപ്രദേശിലെ ഗോരഖ്പുർ ബാബാ രാഘവ്​ദാസ്​ മെഡിക്കൽകോളജ്​ ആശുപത്രിയിൽ ഓക്സിജൻ വിതരണം നിലച്ചതിനെ തുടർന്ന്​ കുട്ടികൾ മരിച്ച സംഭവത്തിൽ കരാറുകാരായ പുഷ്പ സെയിൽസ് ഉടമ മനീഷ് ഭണ്ഡാരിയെ പൊലീസ്​ അറസ്റ്റ് ചെയ്തു. ഞായറാഴ്​ച രാവിലെ ഡിയോറിയ ബൈപാസ് റോഡിൽനിന്നാണ്​ ഭണ്ഡാരിയുടെ അറസ്റ്റ് ചെയ്​തത്​.
സംഭവത്തിനു ശേഷം ഇയാൾ ഒളിവിലായിരുന്നു. ഒളിവിലായ മനീഷ്​ ഭണ്ഡാരി​യുടെ സ്വത്തുക്കൾ കണ്ടുകെട്ടണമെന്ന്​ അഴിമതി വിരുദ്ധ ബ്യൂറോ സെപ്​തംബർ 15ന്​  ഉത്തരവിട്ടിരുന്നു. 

ബാബാ രാഘവദാസ് മെഡിക്കൽ കോളജിൽ ഓക്സിജൻ ലഭ്യതക്കുറവുമൂലം 60ൽ അധികം കുഞ്ഞുങ്ങളാണ് ഒരാഴ്ചയ്ക്കുള്ളിൽ മരിച്ചത്. ഓക്സിജൻ നൽകിയതിനുള്ള പണം നൽകാതെ കുടിശിക വരുത്തിയതിനെത്തുടർന്നാണ് കരാറുകാരൻ വിതരണം നിർത്തിയത്.

അതേസമയം, ഓക്സിജൻ ദൗർലഭ്യതയാണ്​ കുഞ്ഞുങ്ങളുടെ മരണത്തിൽ കലാശിച്ചതെന്ന് ഉത്തർപ്രദേശ്​ സർക്കാർ ഇതുവരെ അംഗീകരിച്ചിട്ടില്ല. മനീഷ്​ ഭണ്ഡാരിയുടെ അറസ്​റ്റോടെ എഫ്.ഐ.ആറിൽ പേരുൾപ്പെടുത്തിയിരിക്കുന്ന ഒമ്പതുപേരും പൊലീസ്​ പിടിയിലായി.