‘സുസ്ഥിര ഭാവി ലക്ഷ്യം’; ഗ്രീൻ ടെക്നോളജി സ്ട്രാറ്റജിക് പങ്കാളിത്തവുമായി ഇന്ത്യയും നോർഡിക് രാജ്യങ്ങളും

ഓസ്ലോ: ആഗോളതലത്തിൽ വലിയ സ്വാധീനമുള്ള നോർഡിക് രാജ്യങ്ങളുമായി (നോർവേ, ഡെന്മാർക്ക്, ഫിൻലാൻഡ്, ഐസ്‌ലാൻഡ്, സ്വീഡൻ) കൈകോർത്ത് ഇന്ത്യ പുതിയ നയതന്ത്ര കുതിച്ചുചാട്ടത്തിന് തുടക്കമിട്ടു. നോർവേ തലസ്ഥാനമായ ഓസ്ലോയിൽ വെച്ച് നടന്ന മൂന്നാമത് ഇന്ത്യ-നോർഡിക് ഉച്ചകോടിയിലാണ് ഇരുപക്ഷവും തമ്മിലുള്ള ഉഭയകക്ഷി ബന്ധം ചരിത്രപരമായ പങ്കാളിത്തത്തിലേക്ക് ഉയർത്താൻ തീരുമാനമായത്.

ഇരുവിഭാഗവും തമ്മിലുള്ള സഹകരണം ഇനിമുതൽ 'ഗ്രീൻ ടെക്നോളജി ആൻഡ് ഇന്നൊവേഷൻ സ്ട്രാറ്റജിക് പാർട്ണർഷിപ്പ്' എന്ന അതീവ തന്ത്രപ്രധാനമായ ഉയർന്ന തലത്തിലേക്ക് മാറ്റാൻ പ്രധാനമന്ത്രി നരേന്ദ്ര മോദിയും നോർഡിക് രാജ്യങ്ങളിലെ ഭരണത്തലവന്മാരും സംയുക്തമായി പ്രഖ്യാപിച്ചു.

ഈ പുതിയ സഖ്യം നിലവിൽ വരുന്നതോടെ പരിസ്ഥിതി സൗഹൃദ സാങ്കേതികവിദ്യകൾ, ഹരിതോർജ്ജം, പരസ്പര വ്യാപാരം, നിക്ഷേപങ്ങൾ എന്നിവയിൽ ഇരുപക്ഷവും തമ്മിൽ വിപ്ലവകരമായ മാറ്റങ്ങൾ ഉണ്ടാകും. കൂടാതെ, സമുദ്രവിഭവങ്ങളുടെ സുസ്ഥിര വിനിയോഗവും തീരദേശ സംരക്ഷണവും ലക്ഷ്യമിടുന്ന 'ബ്ലൂ ഇക്കോണമി' മേഖലയിലും വലിയ തോതിലുള്ള സംയുക്ത പദ്ധതികൾക്ക് ഈ കൂട്ടായ്മ വഴിയൊരുക്കും. ഉച്ചകോടിക്ക് ശേഷം നടത്തിയ സംയുക്ത വാർത്താസമ്മേളനത്തിൽ പ്രധാനമന്ത്രി നരേന്ദ്ര മോദി പങ്കാളിത്തത്തിന്റെ പ്രാധാന്യം വ്യക്തമാക്കി.

"ജനാധിപത്യ മൂല്യങ്ങൾ, നിയമവാഴ്ച , ബഹുസ്വരത എന്നിവയിലുള്ള ഇന്ത്യയുടെയും നോർഡിക് രാജ്യങ്ങളുടെയും പൊതുവായ വിശ്വാസമാണ് നമ്മളെ സ്വാഭാവിക പങ്കാളികളാക്കുന്നത്. പരസ്പര വിശ്വാസത്തിലൂന്നിയ ഈ പുതിയ ഹരിത സാങ്കേതിക പങ്കാളിത്തത്തിലൂടെ ഇരുപക്ഷത്തിന് മാത്രമല്ല, ലോകത്തിന് തന്നെ മികച്ചതും സുരക്ഷിതവുമായ ഒരു ഭാവി ഉറപ്പാക്കാൻ നമുക്ക് സാധിക്കും" പ്രധാനമന്ത്രി അറിയിച്ചു.

അന്താരാഷ്ട്ര നിയമങ്ങളും ചട്ടങ്ങളും പാലിച്ചുകൊണ്ട് മുന്നോട്ടുപോകാൻ ഇരുപക്ഷവും പൂർണ്ണമായും പ്രതിജ്ഞാബദ്ധരാണെന്ന് നേതാക്കൾ ആവർത്തിച്ചു വ്യക്തമാക്കി. നിലവിലെ ആഗോള രാഷ്ട്രീയ സാഹചര്യങ്ങളും വിവിധ രാജ്യങ്ങൾ തമ്മിലുള്ള യുദ്ധങ്ങളും ഉച്ചകോടിയിൽ പ്രധാന ചർച്ചാവിഷയമായി. യുക്രെയ്നിലും പശ്ചിമേഷ്യയിലും നിലനിൽക്കുന്ന കടുത്ത സംഘർഷങ്ങളിൽ ഇരുവിഭാഗവും ആശങ്ക രേഖപ്പെടുത്തി.

മേഖലയിലെ യുദ്ധസാഹചര്യങ്ങൾ എത്രയും വേഗം അവസാനിപ്പിക്കാനും, ചർച്ചകളിലൂടെയും നയതന്ത്ര ഇടപെടലുകളിലൂടെയും സമാധാനം പുനഃസ്ഥാപിക്കാനുമുള്ള എല്ലാ ശ്രമങ്ങൾക്കും ഇന്ത്യയും നോർഡിക് രാജ്യങ്ങളും പൂർണ്ണ പിന്തുണ പ്രഖ്യാപിച്ചു.

ഐക്യരാഷ്ട്രസഭ ഉൾപ്പെടെയുള്ള ആഗോള ബഹുരാഷ്ട്ര സംഘടനകളുടെ പ്രവർത്തനങ്ങളിൽ കാലോചിതമായ പരിഷ്കാരങ്ങൾ വരുത്തേണ്ടത് ഇന്നത്തെ കാലഘട്ടത്തിൽ അത്യന്തം അടിയന്തരവും അനിവാര്യവുമായ ആവശ്യമാണെന്ന് ഇരുപക്ഷവും ഒരേസ്വരത്തിൽ സമ്മതിച്ചു. മാറിവരുന്ന ലോകക്രമത്തിന് അനുസരിച്ച് ഈ സംഘടനകൾ മാറണമെന്നാണ് ഇരുവിഭാഗത്തിന്റെയും നിലപാട്.

ഭൂമിയുടെ നിലനിൽപ്പിനായുള്ള സുസ്ഥിര വികസനത്തിനും മനുഷ്യകേന്ദ്രീകൃതമായ പുരോഗതിക്കും മുൻഗണന നൽകുന്ന ഈ കൂട്ടായ്മ, വരുംതലമുറക്ക് സമാധാനപരവും സമൃദ്ധവുമായ ഒരു ഭാവി കെട്ടിപ്പടുക്കുന്നതിൽ വലിയൊരു നാഴികക്കല്ലായി മാറുമെന്നും പ്രധാനമന്ത്രി നരേന്ദ്ര മോദി കൂട്ടിച്ചേർത്തു.