'തീവ്രവാദത്തിന്റെ പ്രഭവകേന്ദ്രങ്ങൾ ഇനി സുരക്ഷിതമല്ല, അതിനെ ലക്ഷ്യം വെക്കാൻ ഞങ്ങൾ മടിക്കുകയുമില്ല' - പ്രതിരോധ മന്ത്രി

ക്വിങ്‌ദാവോ: തീവ്രവാദത്തിനെതിരായ ഇന്ത്യയുടെ ശക്തമായ നിലപാട് ഊന്നിപ്പറഞ്ഞ് പ്രതിരോധ മന്ത്രി രാജ്‌നാഥ് സിങ്. ചൈനയിലെ ക്വിങ്‌ദാവോയിൽ നടന്ന ഷാങ്ഹായ് സഹകരണ സംഘടന (എസ്‌.സി.ഒ) പ്രതിരോധ മന്ത്രിമാരുടെ യോഗത്തെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം. ഭീകരപ്രവർത്തനങ്ങൾക്കെതിരെ ശബ്ദമുയർത്താൻ മറ്റ് അംഗരാജ്യങ്ങളോടും ഇന്ത്യ ആവശ്യപ്പെട്ടു.

'ഇന്ത്യയുടെ ഭീകരതയോടുള്ള സമീപനം രാജ്യത്തിന്റെ പ്രവർത്തനങ്ങളിലൂടെ പ്രകടമാണ്. തീവ്രവാദത്തിന്റെ പ്രഭവകേന്ദ്രങ്ങൾ ഇനി സുരക്ഷിതമല്ലെന്ന് ഞങ്ങൾ തെളിയിച്ചിട്ടുണ്ട്. അതിനെ ലക്ഷ്യം വെക്കാൻ ഞങ്ങൾ മടിക്കില്ല.' ഇന്ത്യയുടെ വിട്ടുവീഴ്ചയില്ലാത്ത സമീപനം ആവർത്തിച്ചുകൊണ്ട് സിങ് പറഞ്ഞു. പഹൽഗാം ആക്രമണത്തിന് ശേഷം ആരംഭിച്ച ഓപറേഷൻ സിന്ദൂറിനെ പാകിസ്താൻ സ്പോൺസർ ചെയ്യുന്ന ഭീകരതക്കുള്ള മറുപടിയായാണ് അദ്ദേഹം വിശേഷിപ്പിച്ചത്. യുവാക്കൾക്കിടയിൽ തീവ്രവാദത്തിൻ്റെ വേരുകൾ ഇല്ലാതാക്കേണ്ടതിൻ്റെ ആവശ്യകതയും ചൂണ്ടിക്കാട്ടി.

'ഭീകരതയെ വളർത്തുകയും അവരുടെ ഇടുങ്ങിയതും സ്വാർത്ഥ ലക്ഷ്യങ്ങൾക്കായി പ്രവർത്തിക്കുകയും ചെയ്യുന്നവർ അതിൻ്റെ അനന്തരഫലങ്ങൾ അനുഭവിക്കേണ്ടത് ആവശ്യമാണ്. രാജ്യങ്ങൾ അതിർത്തി കടന്നുള്ള ഭീകരതയെ ഉപകരണമായി ഉപയോഗിക്കുകയും തീവ്രവാദികൾക്ക് അഭയം നൽകുകയും ചെയ്യുന്നു. അത്തരം ഇരട്ടത്താപ്പുകൾക്ക് സ്ഥാനമില്ല. അത്തരം രാജ്യങ്ങളെ വിമർശിക്കാൻ എസ്‌.സി.‌ഒ മടിക്കരുത്.' ഇന്ത്യയുടെ നിലപാട് ആവർത്തിച്ചുകൊണ്ട് സിങ് കൂട്ടിച്ചേർത്തു.

ഇന്ത്യ, ചൈന, റഷ്യ, നിരവധി മധ്യേഷ്യൻ രാജ്യങ്ങൾ എന്നിവയുൾപ്പെടെയുള്ള അംഗരാജ്യങ്ങളിൽ നിന്നുള്ള പ്രതിരോധ നേതാക്കളെ ഒരുമിച്ച് കൊണ്ടുവന്ന് പ്രാദേശിക അന്തർദേശീയ സമാധാനവും സുരക്ഷയും സംബന്ധിച്ച വിഷയങ്ങൾ ചർച്ച ചെയ്യുന്നതിനായുള്ള എസ്‌.സി.ഒ പ്രതിരോധ മന്ത്രിമാരുടെ യോഗം 25 മുതൽ 26 വരെ ക്വിങ്ദാവോയിൽ നടക്കുന്നു.

2001-ൽ സ്ഥാപിതമായ എസ്‌.സി.ഒ സഹകരണത്തിലൂടെയും സംഭാഷണത്തിലൂടെയും പ്രാദേശിക സ്ഥിരതയും സുരക്ഷയും പ്രോത്സാഹിപ്പിക്കുന്നത് ലക്ഷ്യമിട്ടുള്ള സംഘടനയാണ്.