വിവര സംരക്ഷണം; ശ്രീകൃഷ്​ണ കമ്മിറ്റി റിപ്പോർട്ട്​ സമർപ്പിച്ചു

ന്യൂഡൽഹി: വ്യക്​തിഗത വിവരങ്ങളുടെ  സംരക്ഷണം സംബന്ധിച്ച പഠന റിപ്പോർട്ട്​ ജസ്സിസ്​ ബി.എൻ ​ശ്രീകൃഷ്​ണ കമ്മിറ്റി സർക്കാരിന്​ സമർപ്പിച്ചു. ഇന്ത്യയിലെയും വിദേശ രാജ്യങ്ങളിലെയും സ്വകാര്യ കമ്പനികളും സർക്കാർ സ്ഥാപനങ്ങളും പൗരൻമാരുടെ വ്യക്​തിഗത വിവരങ്ങൾ ചോർത്തിയെന്ന വിവാദം നിലനിൽക്കുന്ന സാഹചര്യത്തിലായിരുന്നു സർക്കാർ ശ്രീകൃഷ്​ണ കമ്മിറ്റിയെ നിയോഗിച്ചത്​. കഴിഞ്ഞ വർഷം ആഗസ്​തിനായിരുന്നു മുൻ സുപ്രീം കോടതി ജഡ്​ജി ശ്രീകൃഷ്​ണയുടെ നേതൃത്വത്തിൽ സർക്കാർ കമ്മിറ്റി രൂപീകരിച്ചത്​.

വ്യക്​തിഗത വിവരങ്ങളുടെ സ്വകാര്യതയും സംരക്ഷണവും ബന്ധപ്പെട്ട്​ മൂന്ന്​ പ്രധാന വശങ്ങളാണുള്ളത്​. ഒാരോ പൗര​​​െൻറയും അവകാശ സംരക്ഷണം, രാജ്യത്തി​​​െൻറ ഉത്തരവാദിത്തം, വിവരങ്ങൾ കച്ചവടപരമായോ വ്യാവസായികമായോ ഉപയോഗിക്കൽ എന്നിവയാണ്​ ആ കാര്യങ്ങളെന്ന്​ ജസ്റ്റിസ്​ ശ്രീകൃഷ്​ണ വ്യക്​തമാക്കി. വ്യക്​തിഗത വിവരങ്ങളുടെ സ്വകാര്യതാ ലംഘനത്തിനുള്ള ശിക്ഷ, കേസ്​ നടപടികൾ, ഡാറ്റാ അതോറിറ്റി രൂപീകരണം, വ്യക്​തിഗത വിവരങ്ങളുടെ നിർവചനം, പ്രശ്​ന സാധ്യതയുള്ള വ്യക്​തിഗത വിവരങ്ങൾ തുടങ്ങിയവയെ കുറിച്ച നിർദേശങ്ങളാണ്​​ കമീഷ​​​െൻറ റിപ്പോർട്ടിലുള്ളത്​. 
 
റിപ്പോർട്ടി​​​െൻറ അടിസ്ഥനത്തിൽ സർക്കാർ കൊണ്ടുവരുന്ന നിയമങ്ങൾ ഫേസ്​ബുക്ക്, ഗൂഗിൾ, ട്വിറ്റർ എന്നിവയുടെ രാജ്യത്തെ പ്രവർത്തനങ്ങളെ ബാധിക്കും എന്നതാണ്​ പ്രധാനം.

കേന്ദ്ര നിയമ വിവര സാ​േങ്കതിക വകുപ്പ്​ മന്ത്രി രവിശങ്കർ പ്രസാദിനാണ്​ റിപ്പോർട്ട്​ സമർപ്പിച്ചത്​. റിപ്പോർട്ടിലെ നിർദേശങ്ങൾ സർക്കാർ പരിശോധിക്കുമെന്നും ബന്ധപ്പെട്ട എല്ലാ കക്ഷികളുടെയും അഭിപ്രായങ്ങൾ തേടുമെന്നും മന്ത്രി വ്യക്​തമാക്കി. എല്ലാ പാർലമ​​െൻററി നടപടികളും പാലിച്ച ശേഷം മാത്രമേ ഇക്കാര്യത്തിൽ നിയമനിർമാണ്​ നടത്തൂവെന്നും അദ്ദേഹം കൂട്ടിച്ചേർത്തു.