ലോക്​ഡൗൺ ഇളവ്​: തമിഴ്​നാട്ടിൽ വ്യാഴാഴ്​ച്ച മുതൽ മദ്യശാലകൾ തുറക്കും

ചെന്നൈ: കേന്ദ്രസർക്കാർ പ്രഖ്യാപിച്ച ലോക്ഡൗൺ മൂന്നാം ഘട്ടത്തിലെ ഇളവുകൾ തമിഴ്നാട്ടിലും നടപ്പാക്കാനൊരുങ്ങി സർക്കാർ. വ്യഴാഴ്​ച മുതൽ തമിഴ്​നാട്ടിൽ മദ്യ വിൽപ്പനശാലകൾ തുറക്കാൻ സർക്കാർ ഉത്തരവിട്ടു. മാർച്ച്​ 24 മുതൽ സംസ്ഥാനത്ത്​ മദ്യ വിൽപ്പന ശാലകൾ അടഞ്ഞുകിടക്കുകയാണ്​. 

കണ്ടെയ്​ൻമ​െൻറ്​ സോണുകളിൽ ഒഴികെ മറ്റിടങ്ങളിലെല്ലാം മദ്യ ഷാപ്പുകൾ തുറക്കാനാണ്​ സർക്കാർ തീരുമാനിച്ചിരിക്കുന്നത്​. റെഡ്​സോണിലും തുറന്നേക്കുമെന്നാണ്​ റിപ്പോർട്ട്​. 

ലോക്ഡൗൺ മൂന്നാം ഘട്ടത്തിലെ ഇളവുകളെ തുടർന്ന് ഏതാനും സംസ്ഥാനങ്ങളിൽ മദ്യവിൽപന ശാലകൾ ഇന്ന്​ തുറന്നിരുന്നു. ഡൽഹി, ഉത്തർ പ്രദേശ്, പശ്ചിമ ബംഗാൾ, മഹാരാഷ്ട്ര, ഛത്തീസ്ഗഢ്, കർണ്ണാടക, അസം, ഹിമാചൽ പ്രദേശ് എന്നീ സംസ്ഥാനങ്ങളിലാണ് മദ്യശാലകൾ തുറന്നത്.

മിക്കയിടങ്ങളിലും മദ്യം വാങ്ങാനെത്തിയവരുടെ നീണ്ട നിരയായിരുന്നു പ്രത്യക്ഷപ്പെട്ടത്​. ഡൽഹിയിൽ പൊലീസ് ലാത്തിവീശേണ്ടി വരികയും ചെയ്​തു. ബംഗാളിൽ ഗ്രീൻ സോണിൽ മാത്രമാണ് വിൽപനക്ക് അനുമതിയെന്ന് അധികൃതർ അറിയിച്ചു. റെഡ് സോണിലായ തലസ്ഥാനം കൊൽക്കത്തയിലടക്കം മദ്യവിൽപനശാലകൾ തുറന്നിട്ടില്ല. ബംഗാളിൽ മദ്യത്തിന് 30 ശതമാനത്തോളം നികുതി ഉയർത്തിയിട്ടുണ്ട്.