രണ്ട​​ു ദിവസത്തെ മുഖ്യമ​ന്ത്രിയാകാൻ പരീക്കർക്ക്​ സ്വാഗതമെന്ന്​ കോൺഗ്രസ്​

പനാജി: മന്ത്രിസഭാ രൂപീകരണത്തിനായി ഗോവയിൽ 48 മണിക്കൂറിനകം വിശ്വാസവോട്ടു നടത്തണമെന്ന സുപ്രീംകോടതി വിധി സ്വാഗതം ചെയ്​ത്​ കോൺഗ്രസ്. കേന്ദ്രമന്ത്രി സ്ഥാനം രാജിവെച്ച്​ എത്തുന്ന മനോഹർ പരീക്കർ രണ്ടു ദിവസത്തെ മുഖ്യമ​ന്ത്രിയാണ്​. രണ്ട​ു ദിവസത്തേക്ക്​ മുഖ്യമന്ത്രിയാകാനെത്തുന്ന അദ്ദേഹത്തെ ഗോവയിലേക്ക്​ സ്വാഗതം ചെയ്യുന്നുവെന്നും കോൺഗ്രസ് ​നേതാവ് ​മനു അഭിഷേക് സാങ്​വി പറഞ്ഞു.

അവധി ദിവസമായിട്ടും ക്ഷമയോടെ കോൺഗ്രസി​​െൻറ ഹരജി കേൾക്കാൻ കോടതി തയാറായതും മന്ത്രിസഭാ രൂപീകരണം സംബന്ധിച്ച ഗവർണറുടെ തീരുമാനത്തിൽ ഇടപെട്ട് തിരുത്തിയതും വലിയ കാര്യമാണെന്നും  പാർട്ടിക്കുവേണ്ടി സുപ്രീംകോടതിയിൽ ഹാജരായ മനു സിങ്‌വി അഭിപ്രായപ്പെട്ടു.

ഇന്ന്​ നടക്കാനിരിക്കുന്ന പരീക്കറി​​െൻറ സത്യപ്രതിജ്ഞാ ചടങ്ങ്​ സ്​റ്റേ ചെയ്യണമെന്ന്​ കോൺഗ്രസ്​ ആവശ്യപ്പെട്ടിരുന്നുവെങ്കിലും കോടതി തയാറായില്ല. ഏറ്റവും വലിയ ഒറ്റകക്ഷിയായിട്ടും കോണ്‍ഗ്രസിനെ ത​ഴഞ്ഞ്​ രണ്ടാം സ്ഥാനക്കാരായ ബി.ജെ.പിയെ ഗവര്‍ണര്‍ മൃദുല സിന്‍ഹ സര്‍ക്കാരുണ്ടാക്കാന്‍ ക്ഷണിച്ചത് നിയമവിരുദ്ധമാണെന്ന് ആരോപിച്ചാണ് കോണ്‍ഗ്രസ് ഹരജി നൽകിയത്. സര്‍ക്കാര്‍ രൂപീകരിക്കാന്‍ ബി.ജെ.പി 48 മണിക്കൂറിനകം വിശ്വാസവോട്ട് തേടി ഭൂരിപക്ഷം തെളിയിക്കണമെന്ന് കോടതി ഉത്തരവിടുകയായിരുന്നു.