മുംബൈ ആക്രമണം: പാകിസ്​താൻ കുറ്റവാളികളെ നിയമത്തിനു മുന്നിൽ കൊണ്ടുവരണമെന്ന്​ ഇന്ത്യ

ന്യൂഡൽഹി: മുംബൈ ഭീകരാക്രമണം നടന്നു പത്താണ്ടു കഴിഞ്ഞിട്ടും ആസൂത്രകരെ നിയമത്തിനു മുന്നില്‍ എത്തിക്കാത്തതിനെതിരെ രൂക്ഷ വിമർശനവുമായി ഇന്ത്യ. കുറ്റവാളികളെ നിയമത്തിനു മുന്നിൽ കൊണ്ടുവരാൻ പാകിസ്​താൻ തയാറാകണമെന്ന്​ വിദേശകാര്യ മന്ത്രാലയം പ്രസ്​താവനയിലൂടെ ആവശ്യപ്പെട്ടു.

‘‘2008 മുംബൈ ആക്രമണത്തിന്​ പിറകിലുള്ള കുറ്റവാളികൾ ശിക്ഷാഭീതിയില്ലാതെ പാകിസ്​താനിലെ തെരുവുകളിലൂടെ കറങ്ങി നടക്കുകയാണ്​. പാകിസ്​താനിൽ നിന്നാണ്​ ഭീകരർ ആക്രമണം ആസൂത്രണം ചെയ്​ത്​ നടപ്പാക്കിയത്​. സംഭവത്തിൽ പാകിസ്​താൻ സർക്കാറി​​​​െൻറ ഇരട്ടത്താപ്പ്​ അവസാനിപ്പിക്കണമെന്ന്​ വീണ്ടും അറിയിക്കുകയാണ്​. ഭീകരാക്രമണത്തിന്​ പിന്നിൽ പ്രവർത്തിച്ച കുറ്റവാളികളെ നിയമത്തിനു മുന്നിൽ എത്തിക്കാൻ പാകിസ്​താൻ തയാറാകണം’’- വിദേശകാര്യമന്ത്രാലയം അറിയിച്ചു.

ആക്രമണം നടന്ന്​ 10 വർഷം പിന്നിടു​േമ്പാഴും ഇരകളായ 166 കുടുംബങ്ങൾക്ക്​ നീതി ഉറപ്പാക്കാൻ കഴിഞ്ഞില്ല. 15 രാജ്യങ്ങളിൽ നിന്നുള്ള ഇരകളുടെ കുടുംബത്തിന്​ നീതി ലഭിക്കാൻ ആസൂത്രണം ചെയ്തവരെ പാകിസ്​താൻ നിയമത്തിനു മുന്നിൽ എത്തിക്കണമെന്നും ഇന്ത്യ ആവശ്യപ്പെട്ടു.

2008 നവംബര്‍ 26ന്​ മുംബൈയിലെ ഛത്രപതി ശിവജി ടെര്‍മിനസ്, താജ്മഹല്‍ ഹോട്ടല്‍, ഒബ്റോയ് ട്രൈഡൻറ്​ ഉള്‍പ്പെടെ നഗരത്തിലെ പത്തിടങ്ങളില്‍ നടന്ന ആക്രമണത്തില്‍ 166 പേര്‍ക്ക് ജീവന്‍ നഷ്ടമായി. 300 ഒാളം പേർക്ക്​ പരിക്കേൽക്കുകയും ചെയ്​തു.