അഞ്ച് വന്ദേഭാരത് ട്രെയിനുകൾകൂടി സർവിസ് തുടങ്ങി

ഭോപാൽ: അഞ്ച് വന്ദേഭാരത് എക്സ്‍പ്രസ് ട്രെയിനുകൾകൂടി സർവിസ് തുടങ്ങി. മധ്യപ്രദേശ് ഭോപാലിലെ റാണി കമലാപതി റെയിൽവേ സ്റ്റേഷനിൽ നടന്ന ചടങ്ങിൽ പ്രധാനമന്ത്രി നരേന്ദ്ര മോദി ഫ്ലാഗ് ഓഫ് ചെയ്തു. മൂന്ന് ട്രെയിനുകളുടെ ഉദ്ഘാടനം ഓൺലൈനായാണ് നിർവഹിച്ചത്.

റാണി കമലാപതി (ഭോപാൽ)-ജബൽപുർ, ഖജുരാഹോ-ഭോപാൽ- ഇൻഡോർ, ഗോവ-മുംബൈ, ധർവാഡ്-ബംഗളൂരു, ഹട്ടിയ-പട്ന വന്ദേഭാരത് എക്സ്പ്രസ് ട്രെയിൻ സർവിസുകൾക്കാണ് തുടക്കമായത്. ട്രെയിനുകൾ മധ്യപ്രദേശ്, കർണാടക, മഹാരാഷ്ട്ര, ഗോവ, ബിഹാർ, ഝാർഖണ്ഡ് എന്നിവിടങ്ങളിലേക്കുള്ള കണക്ടിവിറ്റി മെച്ചപ്പെടുത്തുമെന്ന് മോദി ട്വിറ്ററിൽ കുറിച്ചു.

ഖജുരാഹോ-ഭോപാൽ-ഇൻഡോർ വന്ദേഭാരത് എക്‌സ്‌പ്രസ് മഹാകാലേശ്വർ, മണ്ഡു, മഹേശ്വർ, ഖജുരാഹോ, പന്ന തുടങ്ങിയ പ്രധാന വിനോദസഞ്ചാര കേന്ദ്രങ്ങൾക്ക് ഗുണം ചെയ്യും. മഡ്ഗാവ് (ഗോവ)-മുംബൈ ഗോവയിലെ ആദ്യത്തെ വന്ദേഭാരത് എക്സ്പ്രസാണ്.

മുംബൈയിലെ ഛത്രപതി ശിവജി മഹാരാജ് ടെർമിനസിനും ഗോവയിലെ മഡ്ഗാവ് സ്റ്റേഷനും ഇടയിലാണ് ഇത് സർവിസ് നടത്തുക. ധാർവാഡ്-ബംഗളൂരു വന്ദേഭാരത് എക്സ്പ്രസ് കർണാടകയിലെ പ്രധാന നഗരങ്ങളായ ധാർവാഡ്, ഹുബ്ബള്ളി, ദാവൻഗരെ എന്നിവയെ തലസ്ഥാനമായ ബംഗളൂരുവുമായി ബന്ധിപ്പിക്കും. ഝാർഖണ്ഡിലേക്കും ബിഹാറിലേക്കുമുള്ള ആദ്യത്തെ വന്ദേഭാരത് ട്രെയിനാണ് ഹാടിയ-പട്‌ന വന്ദേഭാരത് എക്‌സ്പ്രസ്.

ഉദ്ഘാടന ചടങ്ങിൽ റെയിൽവേ മന്ത്രി അശ്വിനി വൈഷ്ണവ്, മധ്യപ്രദേശ് ഗവർണർ മംഗുഭായ് പട്ടേൽ, മുഖ്യമന്ത്രി ശിവരാജ് സിങ് ചൗഹാൻ, കേന്ദ്രമന്ത്രിമാരായ നരേന്ദ്ര സിങ് തോമർ, ജ്യോതിരാദിത്യ സിന്ധ്യ തുടങ്ങിയവർ പങ്കെടുത്തു.