ലോക്​സഭ, നിയമസഭ തെരഞ്ഞെടുപ്പുകൾ ഒരുമിച്ച്​ നടത്താം -തെരഞ്ഞെടുപ്പ്​ കമീഷൻ

ന്യൂഡൽഹി: ലോക്​സഭ, നിയമസഭ തെര​െഞ്ഞടുപ്പുകൾ ഒരുമിച്ച്​ നടത്താൻ സജ്ജമാണെന്ന്​ കേന്ദ്ര തെരഞ്ഞെടുപ്പ്​ കമീഷൻ അറിയിച്ചു. ഇതിനുള്ള സംവിധാനങ്ങൾ 2018 സെപ്​റ്റംബറോടെ ഒരുക്കാൻ സാധിക്കുമെന്ന്​ തെരഞ്ഞെടുപ്പ്​ കമീഷണർ ഒ.പി. റാവത്ത്​ മാധ്യമങ്ങളോടുപറഞ്ഞു. നിയമമന്ത്രാലയം കേന്ദ്ര തെരഞ്ഞെടുപ്പ്​ കമീഷനിൽനിന്ന്​ ഇതുസംബന്ധിച്ച്​ റിപ്പോർട്ട്​ തേടിയിരുന്നുവെന്ന്​ റാവത്ത്​ പറഞ്ഞു.

ആവശ്യമായ ഫണ്ട്​ അനുവദിച്ചാൽ ലോക്​സഭ, നിയമസഭ തെരഞ്ഞെടുപ്പുകൾ ഒരുമിച്ച്​ നടത്താമെന്നാണ്​ മറുപടി നൽകിയത്​. ഒരുമിച്ച്​ നടത്തുന്നതിന്​ പര്യാപ്​തമായ വോട്ടുയന്ത്രങ്ങളും വിവിപാറ്റ​ുകളും ഒരുക്കാനാണ്​ തുക. കേ​ന്ദ്രസർക്കാർ ഒരിക്കൽ 3400 കോടിയും പിന്നീട്​ 1200 കോടി രൂപയും നൽകിയിട്ടുണ്ട്​.   

രണ്ട്​ തെരഞ്ഞെടുപ്പുകളും ഒരുമിച്ച്​ നടത്താൻ 40 ലക്ഷം വോട്ടുയന്ത്രങ്ങളും വിവിപാറ്റുകളുമാണ്​ വേണ്ടത്​. രണ്ട്​ സർക്കാർ സ്​ഥാപനങ്ങൾക്ക്​ വോട്ടുയന്ത്രങ്ങളും വിവിപാറ്റും ലഭ്യമാക്കാൻ ഒാർഡർ നൽകി​. ഇവയെല്ലാം 2018 സെപ്​റ്റംബറിൽ ലഭിക്കു​ന്നതോടെ രണ്ട്​ തെരഞ്ഞെടുപ്പുകളും ഒരുമിച്ച്​ നടത്താൻ സാധിക്കും. എന്നാൽ, കേന്ദ്ര സർക്കാറാണ്​ ഇതിനുള്ള നടപടികൾ സ്വീകരിക്കുകയും നിയമനിർമാണം നടത്തുകയും ചെയ്യേണ്ടതെന്ന്​ റാവത്ത്​ പറഞ്ഞു. 

ലോക്​സഭ, നിയമസഭ തെരഞ്ഞെടുപ്പുകൾ ഒരുമിച്ച്​ നടത്തണമെന്ന ചർച്ച യു.പി.എ സർക്കാറി​​​െൻറ കാലത്ത്​ ഉയർന്നുവരുകയും ഇതുസംബന്ധിച്ച്​ കോൺഗ്രസ്​ നേതാവ്​ സുദർശൻ നാച്ചിയപ്പ​​​െൻറ നേതൃത്വത്തിൽ പാർലമ​​െൻററി സമിതി പഠനം നടത്തുകയും ചെയ്​തിരുന്നു. ബന്ധപ്പെട്ട എല്ലാ കക്ഷികളുമായും നടത്തിയ കൂടിയാലോചനക്കുശേഷം സമിതി സമർപ്പിച്ച റി​േപ്പാർട്ടിൽ, ഭാരിച്ച ചെലവ്​ ചുരുക്കാൻ ഇതുവഴി കഴിയുമെന്ന്​ ബോധിപ്പിച്ചിരുന്നു.

ഒരുമിച്ച്​ തെരഞ്ഞെടുപ്പ്​ നടത്താൻ കാലാവധി കഴിയുന്നതിനുമുമ്പ്​ ചില നിയമസഭകളെ പിരിച്ചുവിടേണ്ടിവരുമെന്നും ചില നിയമസഭകൾക്ക്​ കാലാവധി നീട്ടിനൽകേണ്ടിവരുമെന്നും റിപ്പോർട്ടിൽ വ്യക്​തമാക്കിയിരുന്നു. ഇൗ റിപ്പോർട്ടി​ലെ ശിപാർശകളുടെ ചുവടുപിടിച്ചാണ്​ പ്രധാനമന്ത്രി നരേന്ദ്ര മോദി അധികാരത്തിലേറിയതോടെ ലോക്​സഭ, നിയമസഭ തെരഞ്ഞെടുപ്പ്​ ഒരുമിച്ചാക്കണമെന്ന വിഷയം ചർച്ചയാക്കിയത്​. ബി.ജെ.പിക്ക് ഗുണകരമാകുമെന്ന കണക്കുകൂട്ടലിലാണിത്​.