പാർലമെന്‍റിലെ പ്രതിപക്ഷ പ്രതിഷേധത്തിൽ നഷ്​ടം 133 കോടിയെന്ന്​ പേര്​ വെളിപ്പെടുത്താത്ത 'സർക്കാർ വൃത്തങ്ങൾ'

ന്യൂഡൽഹി: പെഗാസസ് ഫോണ്‍ ചോര്‍ത്തലിനെ ചൊല്ലിയുള്ള പാര്‍ലമെന്‍റിലെ പ്രതിപക്ഷ പ്രതിഷേധത്തില്‍ നഷ്​ടമായത്​ നികുതിദായകരുടെ 133 കോടിയെന്ന് റിപ്പോര്‍ട്ട്. പാര്‍ലമെന്‍റിന്‍റെ ഇരു സഭകളും പ്രവര്‍ത്തിക്കേണ്ട സമയത്തിന്‍റെ ഭൂരിഭാഗത്തിലധികവും പ്രതിഷേധങ്ങള്‍ കാരണം നഷ്​ടപ്പെട്ടതാണ് സര്‍ക്കാര്‍ ഖജനാവിന് കോടികളുടെ നഷ്​ടമുണ്ടാക്കിയത്​ എന്നാണ്​ പേര്​ വെളിപ്പെടുത്താത്ത 'സർക്കാർ വൃത്തങ്ങൾ' പുറത്തിറക്കിയ വാർത്താക്കുറിപ്പിലുള്ളത്​.

ജൂലൈ 19നാണ്​ പാര്‍ലമെന്‍റിന്‍റെ വര്‍ഷകാല സമ്മേളനം ആരംഭിച്ചത്. അന്നുമുതല്‍ പെഗാസസ് ഫോണ്‍ ചോര്‍ത്തലില്‍ അന്വേഷണം പ്രഖ്യാപിക്കണമെന്ന്​ ആവശ്യ​പ്പെട്ട്​ പ്രതിപക്ഷം പ്രതിഷേധത്തിലാണ്. പെഗാസസ് വിവാദം പാർലമെന്‍റ്​ ചർച്ച ചെയ്യണമെന്നും സുപ്രീം കോടതി ജ‍ഡ്ജിയെക്കൊണ്ടു സ്വതന്ത്ര അന്വേഷണം നടത്തണമെന്നുമാണ്​ പ്രതിപക്ഷത്തിന്‍റെ ആവശ്യം. എന്നാൽ, പ്രതിപക്ഷ ആവശ്യം സർക്കാർ തള്ളുകയായിരുന്നു.

ഇരുസഭകളും 107 മണിക്കൂർ പ്രവർത്തിക്കേണ്ടതിൽ വെറും 18 മണിക്കൂർ മാത്രമാണ്​ പ്രവർത്തിച്ചതെന്ന്​ റിപ്പോർട്ടിൽ പറയുന്നു. 89 മണിക്കൂർ പ്രവർത്തന സമയം​ ഇരുസഭകളിലുമായി നഷ്​ടപ്പെട്ടതായാണ്​ കണക്ക്​. ലോക്‌സഭ 54 മണിക്കൂര്‍ പ്രവര്‍ത്തിക്കേണ്ടതില്‍ വെറും ഏഴ് മണിക്കൂര്‍ മാത്രമാണ് പ്രവര്‍ത്തിച്ചത്. രാജ്യസഭയാക​ട്ടെ, 53 മണിക്കൂർ പ്രവർത്തിക്കേണ്ടിയിരുന്ന സ്​ഥാനത്ത്​ വെറും 11 മണിക്കൂറും.

ഓരോ എം.പിക്കും നല്‍കുന്ന യാത്രാചെലവ് ഉള്‍പ്പെടെയുള്ള ആനൂകൂല്യങ്ങ​ളൊക്കെ കണക്കിലെടുത്താണ്​ നഷ്​ടം നിശ്​ചയിച്ചിരിക്കുന്നത്​. ഇതാദ്യമായി പാര്‍ലമെന്‍റിന്‍റെ പ്രവര്‍ത്തനം സംബന്ധിച്ച് ദിവസേന ബുള്ളിറ്റിനുകളും പ്രവര്‍ത്തന സമയവും രേഖപ്പെടുത്തുന്ന പ്രക്രിയ ആരംഭിച്ചതോടെയാണ് ഈ കണക്ക്​ കണ്ടെത്താൻ കഴിഞ്ഞത്​. പാർലമെന്‍റ്​ സമ്മേളനം തടസ്സപ്പെടുത്തിയതു കോൺഗ്രസാണെന്നു പ്രധാനമന്ത്രി നരേന്ദ്ര മോദി ആരോപിച്ച്​ നാല്​ ദിവസം കഴിയുമ്പോഴാണു പേരു വെളിപ്പെടുത്താത്ത 'സർക്കാർ വൃത്തങ്ങൾ' കണക്കുമായി രംഗത്തെത്തിയത്​ എന്നതും ശ്രദ്ധേയമാണ്​.