കർഷകറാലി മുംബൈയിൽ; കർശന സുരക്ഷയിൽ നഗരം

മുംബൈ: 180 കിലോ മീറ്റർ പിന്നിട്ട്​ ​ആൾ ഇന്ത്യ കിസാൻ സഭ നടത്തുന്ന കർഷക റാലി മുംബൈയിലെത്തി. റാലി നഗരത്തിലെത്തുന്നതിന്​ മുന്നോടിയായി കർശന സുരക്ഷയാണ്​ മുംബൈയിൽ ഏർപ്പെടുത്തിയിരിക്കുന്നത്​. രണ്ട്​ ഡെപ്യൂട്ടി കമീഷണർമാരുടെയും ആറ്​ അസിസ്​റ്റൻറ്​ കമീഷണർമാരുടെ നേതൃത്വത്തിലാണ്​ നഗരത്തിൽ പൊലീസിനെ വിന്യസിച്ചിട്ടുളളത്​. റാലി നഗരത്തിലെത്തിയതിനെ തുടർന്നുള്ള ഗതാഗത കുരുക്ക്​ ഒഴിവാക്കാൻ പൊലീസ്​ പല സ്ഥലത്തും വാഹനങ്ങളെ വഴിതിരിച്ച്​ വിടുന്നുണ്ട്​. നാളെയും ഇത്​ തുടരുമെന്നാണ്​ വിവരം. മഹാരാഷ്​ട്രയിലെ നാസിക്​ ജില്ലയിൽ നിന്ന്​ ആരംഭിച്ച കർഷകറാലിയിൽ ഏ​കദേശം 35,000 പേരാണ്​ അണിനിരക്കുന്നത്​. ആദിവാസികളും റാലിയുടെ ഭാഗമാവുന്നുണ്ട്​.

കാർഷിക കടം എഴുതിത്തള്ളുക, വനഭൂമി കർഷകർക്ക്​ കൈമാറുക തുടങ്ങിയ ആവശ്യങ്ങൾ ഉന്നയിച്ചാണ്​ കിസാൻ സഭയുടെ റാലി. ആവശ്യങ്ങൾ അംഗീകരിച്ചില്ലെങ്കിൽ തിങ്കളാഴ്​ച നിയമസഭ വളയാനാണ്​ സംഘടനയുടെ തീരുമാനം. കർഷകരുമായി ചർച്ച നടത്താൻ മഹാരാഷ്​ട്ര മുഖ്യമന്ത്രി ദേവേന്ദ്ര ഫട്​നാവിസ് മന്ത്രി ​ഗിരീഷ്​ മഹാജനെ ചുമതലപ്പെടുത്തിയിട്ടുണ്ട്​.

25,000 കർഷകരുമായാണ്​ തങ്ങൾ റാലി തുടങ്ങിയതെന്ന്​ കിസാൻ സഭ പ്രസിഡൻറ്​ അശോക്​ ധ്വാല പറഞ്ഞു. തിങ്കളാഴ്​ച പ്രക്ഷോഭകരുടെ എണ്ണം ഇനിയും വർധിക്കും. 11 മണിക്കാണ്​ നാളെ റാലി​ ആരംഭിക്കുക. അതുകൊണ്ട്​ തന്നെ പരീക്ഷ എഴുതുന്ന വിദ്യാർഥികൾക്ക് റാലി​ പ്രശ്​നം സൃഷ്​ടിക്കില്ലെന്നും അദ്ദേഹം വ്യക്​തമാക്കി.