ബാങ്കുകളുടെ പ്രവൃത്തി ദിനം ആഴ്ചയിൽ അഞ്ചാകുമോ​? എന്താണ് സർക്കാർ നിലപാട്...

ന്യൂഡൽഹി: ബാങ്കുകളുടെ പ്രവൃത്തിദിനം ആഴ്ചയിൽ അഞ്ചുദിവസമാക്കണമെന്ന ഇന്ത്യൻ ബാങ്ക് അസോസിയേഷന്റെ(ഐ.ബി.എ) നിർദേശത്തിന് നിലപാട് വ്യക്തമാക്കി കേന്ദ്രം.

എല്ലാ ശനിയാഴ്ചയും ബാങ്കുകൾക്ക് അവധി നൽകണമെന്ന് ഐ.ബി.എ നിർദേശിച്ചതായി കേന്ദ്രധന മന്ത്രാലയം ജൂലൈ 28ന് ലോക്സഭയിൽ രേഖാമൂലം അറിയിച്ചു. ഈ നിർദേശം കേ​​ന്ദ്രസർക്കാറിന്റെ പരിഗണനയിലാണ്. പൊതുമേഖലാ ബാങ്കുകളിൽ നിലവിൽ രണ്ടാമത്തെയും നാലാമത്തെയും ശനിയാഴ്ചകൾ അവധിദിനമാണ്. പൊതുമേഖല ബാങ്കുകളിലെ ജീവനക്കാരുടെ അപര്യാപ്തത കേന്ദ്രസർക്കാറിന്റെ പരിഗണനയിലുണ്ടെന്നും ഇത് പരിഹരിക്കുമെന്നും സർക്കാർ വ്യക്തമാക്കി.

എല്ലാ ശനിയാഴ്ചയും അവധിദിനമായി പ്രഖ്യാപിക്കണമെന്ന് കാണിച്ച് ആൾ ഇന്ത്യ ബാങ്ക് ഓഫിസേഴ്സ് കോൺഫെഡറേഷൻ(എ​.ഐ.ബി.ഒ.സി)ആണ് നിർദേശിച്ചത്. ജീവനക്കാരുടെ തൊഴിൽക്ഷമതക്കും കഴിവിനും സുഗമമായ തൊഴിലിടത്തിനും ഇത് വളരെ സഹായിക്കുമെന്നും എ​.ഐ.ബി.ഒ.സി ശിപാർശ ചെയ്തു. ഇതുസംബന്ധിച്ച് കെ.സി. വേണുഗോപാൽ എം.പിയാണ് ലോക്സഭയിൽ ചോദ്യമുന്നയിച്ചത്. ഈ നിർദേശം സർക്കാർ പരിഗണിക്കുമോ എന്നതടക്കമുള്ള ചോദ്യങ്ങളാണ് കെ.സി. വേണുഗോപാൽ ഉന്നയിച്ചത്. ലോക്സഭ തെരഞ്ഞെടുപ്പിന് മുമ്പായി പൊതുമേഖല ബാങ്കുകളിൽ എല്ലാ ശനിയാഴ്ചയും അവധിദിനമായി പ്രഖ്യാപിച്ചേക്കുമെന്ന് റിപ്പോർട്ടുകളുണ്ടായിരുന്നു.