യോഗി മൽസരിക്കില്ല; എം.എൽ.സിയാകും

ലഖ്​നോ: യു.പി മുഖ്യമന്ത്രി യോഗി ആദിത്യനാഥ്​ ഉപതെരഞ്ഞെടുപ്പിൽ മൽസരിക്കില്ല. പകരം എം.എൽ.സിയായി നിയമസഭ കൗൺസിലിലേക്ക്​(ലെജിസ്​റ്റേറ്റീവ്​ കൗൺസിൽ) എത്താനാണ്​ യോഗിയുടെ ശ്രമം. ഉത്തർപ്രദേശ്​ ഉപമുഖ്യമന്ത്രിയായ കേശവേന്ദ്ര മൗര്യ, ദിനേശ്​ ശർമ, മന്ത്രി സ്വതന്ത്രദേവ്​ സിങ്​ എന്നിവരും ഇതേവഴി പിന്തുടർന്ന്​ എം.എൽ.സിയാകും. 

നിലവിൽ ഇവരാരും യു.പി നിയമസഭാംഗങ്ങളല്ല. ആദിത്യനാഥ്​ ഗോരഖ്​പൂർ എം.പിയും കേശവ്​ പ്രസാദ്​ മൗര്യ ഫൂൽപുർ എം.പിയുമാണ്​. മന്ത്രിസഭയിൽ തുടരണമെങ്കിൽ ഇവർ  യു.പി നിയമസഭയിൽ അംഗമാകണം. ഇതിനായി നിയമ നിർമാണസഭയിലേക്കോ കൗൺസിലിലേക്കോ ഇവർ വിജയിക്കണം. നിയമ നിർമാണ സഭയിലെത്തണമെങ്കിൽ മൂവരും ഉപതെരഞ്ഞെടുപ്പിൽ മൽസരിക്കണം. എന്നാൽ നിലവിലെ യു.പി നിയമസഭയിലെ  ഭൂരിപക്ഷം ഉപയോഗിച്ച്​ എളുപ്പത്തിൽ മൂവർക്കും നിയമനിർമാണ കൗൺസിലിലേക്ക്​ എത്താൻ സാധിക്കും. 

നാല്​ എം.എൽ.സി സീറ്റുകളാണ്​ അടുത്ത മാസം ഒഴിവ്​ വരുന്നത്​. ഇതിൽ കാലാവധി കഴിയുന്ന മൂന്ന്​ സീറ്റുകൾ ബി.എസ്​.പിയുടേതാണ്​. ഒരെണം ബി.എസ്​.പിയിൽ ബി.ജെ.പിയിലെത്തിയ ജെയ്​ വീർ സിങ്​ രാജിവെച്ചതിനെ തുടർന്ന്​ ഒഴിവുവന്നതാണ്​​.