എം.എ യൂസഫലിയുടെ ബന്ധുവായി ചമഞ്ഞ് തട്ടിപ്പ്; യുവാവ് പിടിയില്‍

തിരുവനന്തപുരം: പ്രവാസി വ്യവസായി എം.എ യൂസഫലിയുടെ ബന്ധുവായി ചമഞ്ഞ് തട്ടിപ്പ്. തൃശൂര്‍ മതിലകം സ്വദേശി ഷിയാസ് ഹംസയാണ് പൊലീസിന്‍െറ പിടിയിലായത്. യൂസഫലിയുടെ ബന്ധുവെന്ന് പറഞ്ഞ് മുംബൈ ജുഹൂവിലെ നക്ഷത്ര ഹോട്ടലില്‍ താമസിക്കുകയായിരുന്ന ഇയാളെ രാവിലെയാണ് പൊലീസ് പിടികൂടിയത്. യൂസഫലിയുടെ മകന്‍, മരുമകന്‍, സഹോദര പുത്രന്‍ എന്നീ തരത്തില്‍ പലയിടത്തും ഷിയാസ് പരിചയപ്പെടുത്തിയിരുന്നു.

എം.എ. യൂസഫലിയുടെ പേരു പറഞ്ഞ് ഒരാള്‍ തട്ടിപ്പ് നടത്തുന്നുവെന്ന് ചൂണ്ടിക്കാട്ടി യൂസഫലിയുടെ മാനേജര്‍ പൊലീസിന് പരാതി നല്‍കിയിരുന്നു. തുടര്‍ന്ന് നടത്തിയ അന്വേഷണത്തില്‍ ഇയാള്‍ മുംബൈയിലുള്ളതായി വിവരം ലഭിച്ചു. തിരുവനന്തപുരം മെഡിക്കല്‍ കോളജ് പൊലീസ് വിമാന മാര്‍ഗം മുംബൈയിലെത്തിയാണ് രാവിലെ ഷിയാസിനെ കസ്റ്റഡിയിലെടുത്തത്. തുടര്‍ന്ന് തിരുവനന്തപുരത്തെത്തിച്ച ഇയാളെ പൊലീസ് വിശദമായി ചോദ്യം ചെയ്തു.