സഭയിലെ കൈയാങ്കളി: നിയമ സെക്രട്ടറിയുടെ നിയമോപദേശം പുറത്ത്
text_fields
കൊച്ചി: നിയമസഭയിലെ കൈയാങ്കളിയുമായി ബന്ധപ്പെട്ട് പ്രതിപക്ഷ എം.എല്‍.എമാര്‍ക്കെതിരെ കേസെടുക്കാന്‍ തടസ്സമില്ളെന്ന് അറിയിച്ച് സംസ്ഥാന നിയമസെക്രട്ടറി സര്‍ക്കാറിന് കൈമാറിയ നിയമോപദേശത്തിന്‍െറ പകര്‍പ്പ് പുറത്ത്. അതേസമയം, ഒക്ടോബര്‍ 21ന് ഇക്കാര്യം വിശദീകരിച്ച് സെക്രട്ടറി നിയമോപദേശം കൈമാറിയെങ്കിലും സര്‍ക്കാര്‍ ഇതുവരെ എം.എല്‍.എമാര്‍ക്കെതിരെ നടപടി ആരംഭിച്ചില്ല.
വിവരാവകാശ പ്രവര്‍ത്തകന്‍ ഹ്യൂമന്‍ റൈറ്റ്സ് ഡിഫന്‍സ് ഫോറം ജനറല്‍ സെക്രട്ടറി അഡ്വ. ഡി.ബി. ബിനു സമര്‍പ്പിച്ച അപേക്ഷയിലാണ് നിയമസെക്രട്ടറി ബി.ജി. ഹരീന്ദ്രനാഥ് കൈമാറിയ നിയമോപദേശത്തിന്‍െറ വിശദാംശങ്ങള്‍ ഉള്ളത്. 1984ലെ ആര്‍.എസ്. നായിക്, എ.ആര്‍. ആന്തുലെ എന്നിവര്‍ തമ്മിലെ കേസില്‍ സുപ്രീംകോടതിയുടെ വിധിന്യായം ചൂണ്ടിക്കാട്ടിയാണ് നിയമസഭക്കുള്ളിലെ അക്രമസംഭവങ്ങളില്‍ എം.എല്‍.എമാര്‍ക്ക് പ്രത്യേക പരിരക്ഷയൊന്നുമില്ളെന്ന് ചൂണ്ടിക്കാട്ടുന്നത്. നിയമസഭാംഗങ്ങള്‍ സര്‍ക്കാര്‍ ശമ്പളം പറ്റുന്ന ഉദ്യോഗസ്ഥരല്ളെന്നും ഇവര്‍ക്കെതിരെ പ്രോസിക്യൂഷന്‍ അനുമതി തേടേണ്ട ആവശ്യമില്ളെന്നുമാണ് നിയമോപദേശം.
സുപ്രീംകോടതി ഉത്തരവ് പ്രകാരം എം.എല്‍.എമാര്‍ കൈപ്പറ്റുന്ന ശമ്പളവും അലവന്‍സും നിയമനിര്‍മാണ സഭയിലെ അംഗങ്ങളെന്ന നിലയിലാണ്. സര്‍ക്കാര്‍ നിയോഗിക്കുന്ന ഏതെങ്കിലും കര്‍ത്തവ്യം നിര്‍വഹിക്കുന്നവരല്ല നിയമസഭാംഗങ്ങളെന്നും ഇവര്‍ സര്‍ക്കാറിന്‍െറ ഭരണനിര്‍വഹണത്തിന്‍െറ ഭാഗമല്ലാത്തതിനാല്‍ കേസെടുക്കാന്‍ വിചാരണാനുമതി ആവശ്യമില്ളെന്നും പറയുന്നു. നിയമസഭയില്‍ ഉണ്ടായതാണെങ്കിലും കുറ്റകൃത്യങ്ങള്‍ക്ക് നിയമസഭാംഗമെന്ന സവിശേഷാധികാരത്തിന്‍െറ പരിരക്ഷ ലഭിക്കില്ളെന്നാണ് നിയമോപദേശത്തില്‍ ചൂണ്ടിക്കാണിക്കുന്ന മറ്റൊന്ന്.
തൊഴിലിടങ്ങളില്‍ സ്ത്രീകള്‍ക്കെതിരെയുള്ള ലൈംഗികാതിക്രമങ്ങള്‍ തടയാനുള്ള 2013ലെ നിയമത്തിന്‍െറ ആനുകൂല്യവും അംഗങ്ങള്‍ക്ക് ലഭിക്കില്ളെന്ന് എം.എല്‍.എ ജമീല പ്രകാശത്തിന്‍െറ പരാതിയുടെ അടിസ്ഥാനത്തില്‍ നിയമോപദേശത്തില്‍ വ്യക്തമാക്കുന്നുണ്ട്.
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.