ജിഷയുടെ കുടുംബത്തിന് 10 ലക്ഷം രൂപ നല്‍കാന്‍ മന്ത്രിസഭായോഗ തീരുമാനം

തിരുവനന്തപുരം: പെരുമ്പാവൂരില്‍ ക്രൂരപീഡനത്തിന് ഇരയായി കൊല്ലപ്പെട്ട ജിഷയുടെ കുടുംബത്തിന് 10 ലക്ഷം രൂപ ധനസഹായം നല്‍കാന്‍ മന്ത്രിസഭാ യോഗം തീരുമാനിച്ചു. അന്തരിച്ച പ്രൊഫ. എം.പി.മന്മഥന്‍റെ മകള്‍ ചന്ദ്രികാ മന്മഥന്‍റെ  ഹൃദയ സംബന്ധമായ ചികിത്സക്കായി മൂന്നു ലക്ഷം രൂപ മുഖ്യമന്ത്രിയുടെ ദുരിതാശ്വാസ നിധിയില്‍ നിന്നും അനുവദിച്ചു.

കെട്ടിടത്തില്‍നിന്നും വീണ് മരണപ്പെടുകയും ശരീരാവയവങ്ങള്‍ ദാനം ചെയ്യകയും ചെയ്ത കണ്ണൂര്‍ സ്വദേശി എ.വി. ബാബുവിന്‍റെ കുടുംബത്തിന് രണ്ടു ലക്ഷം രൂപ നല്‍കാനും തീരുമാനമായി. വെല്ലൂര്‍ സി.എം.സി. ആശുപത്രിയില്‍ അസ്ഥി മജ്ജ മാറ്റിവെക്കല്‍ ശസ്ത്രക്രിയക്ക് വിധേയനാകുന്ന തിരുവനന്തപുരം സ്വദേശി ഷിബു. കെ. വര്‍ഗ്ഗീസിന്‍റെ മകന്‍ അഭിഷേക് ഷിബുവിന്‍റെ ചികിത്സക്കായി മൂന്നു ലക്ഷം രൂപയും മന്ത്രിസഭായോഗത്തില്‍ അനുവദിച്ചു.