സി.എൻ.ജി ബസുകൾ വാങ്ങാൻ കെ.എസ്.​ആർ.ടി.സിക്ക്​ 560 കോടിയുടെ വായ്​പ

കെ.എസ്.​ആർ.ടി.സിയുടെ നിയന്ത്രണത്തിലുള്ള കെ.യു.ആർ.ടി.സിക്ക്​ 500 സി.എൻ.ജി ബസുകൾ വാങ്ങാൻ ജർമൻ  ധനകാര്യ സ്ഥാപനമായ കെ.എസ്​.ഡബ്ലു 560 കോടി രൂപ വായ്പ അനുവദിച്ചു. ഇതു സംബന്ധിച്ച്​ കെ.എസ്.ആർ.ടി.സി മാനേജിങ്​ ഡയറക്​ടർ ആൻറണി ചാക്കോ ജർമൻ ധനകാര്യ സ്​ഥാപനവുമായി കൊച്ചിയിൽ കരാർ ഒപ്പുവെച്ചു.

 കഴിഞ്ഞ രണ്ട്​ വർഷമായി ഇത്​ സംബന്ധിച്ച്​ ഇരു സ്​ഥാപനങ്ങളും ചർച്ച നടത്തി വരികയായിരുന്നു. ആദ്യ ഘട്ടത്തിൽ 100 സി.എൻ.ജി ബസുകൾ കെ.എസ്​.ആർ.ടി.സി നിരത്തിലിറക്കും.കൊച്ചി നഗരത്തിന്​ പുറമെ പെരുമ്പാവൂർ, അങ്കമാലി, തൃപ്പുണ്ണിത്തുറ, മട്ടാഞ്ചേരി, ഫോർട്ടുകൊച്ചി, ആലുവ ,പറവൂർ എന്നീ പ്രദേശങ്ങളിലും സി.എൻ. ജി ബസുകൾ സർവീസ്​ നടത്തും. ​​

രണ്ടാം ഘട്ടത്തിൽ 100 ബസുകൾ കൂടി നിരത്തിലിറക്കും. കെ.എസ്​.ആർ.ടി.സിയുടെ സ്ഥാവര ജംഗമ വസ്​തുക്കൾ പണയപ്പെടുത്തിയും സർക്കാർ ഗാരൻറിയിലുമാണ്​ 560 കോടിയുടെ വായ്പ ലഭ്യമാക്കുന്നത്​. സി.എൻ.ജി ബസുകൾ നിരത്തിലിറക്കുന്നതോടെ പരിസ്ഥിതി മലിനീകരണം സംബന്ധിച്ച ആശങ്കയും ഇല്ലാതാകും.

എല്ലാ ഡീസൽ വാഹനങ്ങളും ഘട്ടം ഘട്ടമായി സി.എൻ.ജിയിലേക്ക്​ മാറ്റണമെന്ന്​ സുപ്രീം കോടതി അടുത്തിടെ വിധിച്ചിരുന്നു. മൂന്ന്​ വർഷം കൊണ്ട്​ കൊച്ചി നഗരത്തിലെ മുഴുവൻ ബസുകളും സി.എൻ.ജിയിലേക്ക്​ മാറ്റുമെന്ന്​ കെ.എസ്.​ആർ.ടി.സി എം.ഡി അറിയിക്കുകയും​ ചെയ്​തിട്ടുണ്ട്​.