ഫയൽ കാണാതാകൽ: ആൻറണി ഡൊമിനികിന്‍റെ ഉത്തരവ് തിരുത്തി ആക്​ടിങ്​ ചീഫ്​ ജസ്​റ്റിസ്​

കൊച്ചി: ഹൈകോടതിയിൽ നിന്ന് നേരത്തെ കേസ്​ ഫയലുകൾ കാണാതായ സംഭവത്തെ തുടർന്ന്​ മുൻ ചീഫ്​ ജസ്​റ്റിസ്​ ആൻറണി ഡൊമിനിക്​ അധ്യക്ഷനായ സമിതിയുടെ ഉത്തരവിലെ അപാകത തിരുത്തി ആക്​ടിങ്​ ചീഫ്​ ജസ്​റ്റിസ്​. ഫയൽ കാണാതായ സംഭവത്തിൽ ഇടപെടൽ നടത്തിയ ജസ്​റ്റിസ്​ വി. ചിദംബരേഷി​​​െൻറ ​െബഞ്ചിലേക്ക്​ നാല്​ അഭിഭാഷകരുടെ ഫയലുകൾ അയക്കരുതെന്ന്​ വ്യക്​തമാക്കി വിരമിക്കുന്നതി​​​െൻറ തൊട്ടു മുമ്പത്തെ ദിവസം മുൻ ആക്​ടിങ്​ ചീഫ്​ ജസ്​റ്റിസ്​ ആൻറണി ഡൊമിനികി​​​െൻറ നേതൃത്വത്തിലുള്ള ഹൈകോടതി അഡ്​മിനിസ്​ട്രേറ്റ്​ സമിതി രജിസ്​ട്രിക്ക്​ നൽകിയ നിർദേശമാണ്​ പുതിയ ആക്​ടിങ്​ ചീഫ്​ ജസ്​റ്റിസി​​​െൻറ നേതൃത്വത്തിലുള്ള സമിതി തിരിച്ചു വിളിച്ചത്​.

അതേസമയം, ജഡ്​ജിയുടെ ഇടപെടലിന്​ ഇടയാക്കിയ കേസ്​ ആ ബെഞ്ചിൽ നിന്ന്​ മറ്റൊരു ബെഞ്ചിലേക്ക്​ മാറ്റിയ നടപടിയിൽ സമിതി ഇടപെട്ടില്ല. ഫയൽ കാണാതാകലുമായി ബന്ധപ്പെട്ട്​ ജസ്​റ്റിസ്​ ചിദംബരേഷ്​ ചില അഭിഭാഷകരുടെ പേരെടുത്ത്​ പരാമർശിച്ചായിരുന്നു ഇടപെടൽ നടത്തിയത്​. ഇൗ അഭിഭാഷക​​​െൻറ ഉൾപ്പെടെ ഹരജികൾ ജസ്​റ്റിസ്​ ചിദംബരേഷ്​ അംഗമായ ബെഞ്ചിലേക്ക്​ അയക്കരുതെന്നായിരുന്നു രെജിസ്​ട്രിക്ക്​ മുൻ ചീഫ്​ ജസ്​റ്റിസ്​ നൽകിയ നിർദേശം.

പാലക്കാട്ടെ 70 ഏക്കർ വരുന്ന പാടശേഖരത്തി​​​െൻറ ഉടമസ്ഥാവകാശത്തർക്കം  സംബന്ധിച്ചുള്ള പ്രിൻസിപ്പൽ സബ് കോടതിയുടെ ഉത്തരവിനെതിരെ പാലക്കാട് പൊൽപ്പുള്ളി സ്വദേശി കണ്ടമുത്തൻ നൽകിയ അപ്പീലി​​​െൻറ  ഫയലുകൾ കാണാതായതായി 2016 നവംബറിലാണ്​ ശ്രദ്ധയിൽപ്പെട്ടത്​. ഫെബ്രുവരിയിൽ നൽകിയ അപ്പീൽ വേഗം പരിഗണിക്കാനായി അപേക്ഷ നൽകിയിട്ടും ബെഞ്ചിൽ വരാത്തതിനെത്തുടർന്ന് നൽകിയ പരാതിയിലാണ്​ ഫയലുകൾ നഷ്​ടപ്പെട്ടതായി കണ്ടെത്തിയത്. തുടർന്ന് ഹൈകോടതി വിജിലൻസ് നടത്തിയ അന്വേഷണത്തിൽ ഫയൽ സൂക്ഷിച്ചിരുന്ന സെക്‌ഷനിൽ ജീവനക്കാർക്കു പുറമേ അഭിഭാഷകർക്കും ഗുമസ്തന്മാർക്കും മാത്രമാണ് പ്രവേശനമെന്നും ഇവരിൽ ചിലർ അറിയാതെ ഫയൽ നഷ്​ടപ്പെടില്ലെന്നും വ്യക്തമാക്കി രജിസ്ട്രാർക്ക് റിപ്പോർട്ട് നൽകി.

ഇതിനിടെയാണ്​ കേസ്​ പരിഗണിച്ച ജസ്​റ്റിസ്​ ചിദംബരേഷ്​ അടങ്ങുന്ന ഡിവിഷൻബെഞ്ച്​ ഫയൽ നഷ്​ടപ്പെട്ട സംഭവത്തെക്കുറിച്ച് അന്വേഷിച്ച് റിപ്പോർട്ട് നൽകാൻ അമിക്കസ് ക്യൂറിയെ നിയോഗിച്ച്​ ഇടപെടുന്നത്​. സംഭവത്തിൽ ക്രൈംബ്രാഞ്ച് അന്വേഷണം വേണമെന്നായിരുന്നു അമിക്കസ് ക്യൂറിയുടെ നിലപാട്. എന്നാൽ ഈ വിഷയത്തിൽ പൊലീസ് കേസ് വേണ്ടെന്ന്​ പിന്നീട്​ ജഡ്‌ജിമാരുൾപ്പെട്ട അഡ്മിനിസ്ട്രേറ്റീവ് സമിതി തീരുമാനമെടുത്തു. എന്നാൽ, ഫയൽ സൂക്ഷിച്ചിരുന്ന സെക്‌ഷനിലെ ഓഫീസർക്കും  കേസിൽ പ്രതിഭാഗത്തിനു വേണ്ടി ഹാജരായ അഭിഭാഷക​​​െൻറ ഗുമസ്തനും കാരണം കാണിക്കൽ നോട്ടീസ് നൽകാൻ നിർദ്ദേശിക്കുകയും ചെയ്​തു​.

ഇതിനിടെയാണ്​ ​കേസിൽ ഇടപെട്ട ബെഞ്ച്​ പരാമർശിച്ച അഭിഭാഷകനുൾപ്പെടെയുള്ളവരുടെ നിവേദനത്തി​​​െൻറ അടിസ്​ഥാനത്തിൽ കേസ്​ പരിഗണിക്കുന്ന ബെഞ്ച്​ മാറ്റി നൽകിയത്​. ഇൗ ബെഞ്ച്​ മുമ്പാകെ തങ്ങളുടെ ഫയലുകൾ എത്തുന്നത്​ തടയണമെന്ന ആവശ്യമാണ്​ വിരമിക്കുന്നതിന്​ തൊട്ടു മുമ്പ്​ മുൻ ചീഫ്​ ജസ്​റ്റിസ്​ അംഗീകരിച്ചത്​. എന്നാൽ, ഇൗ നടപടി അഭിഭാഷകർക്ക്​ തങ്ങൾ ഫയൽ ചെയ്യുന്ന കേസുകൾ​ കേൾക്കുന്നതിന്​ ഇഷ്​ടമുള്ള ​ബെഞ്ചുകൾ തെരഞ്ഞെടുക്കാനും ആ ബെഞ്ചുകളിലേക്ക്​ ഫയൽ എത്തിക്കാനുമുള്ള കീഴ്വഴക്കം സൃഷ്​ടിക്കുമെന്ന്​ ആക്​ടിങ്​ ചീഫ്​ ജസ്​റ്റിസ്​ അടങ്ങുന്ന അഡ്​മിനിസ്​ട്രേറ്റീവ്​ സമിതി വിലയിരുത്തുകയായിരുന്നു.

ഇത്​ ബെഞ്ച്​ ഹണ്ടിംഗ്​, ഫോറം ഷോപ്പിംഗ്​ നടപടികൾക്ക്​ (ഇഷ്​ടമുള്ളിടത്തേക്ക്​ പോകാനുള്ള അവകാശമുണ്ടാക്കൽ) ഇടയാക്കുമെന്നാണ്​ സമിതി പരാമർശിച്ചത്​.​ തുടർന്നാണ്​ ഇൗ നിർദേശം തിരുത്തി ഉത്തരവിട്ടത്​. മലബാർ സിമൻറ്​സിലെ അഴിമതിയുമായി ബന്ധപ്പെട്ട കേസിലെ ഫയലുകൾ കാണാതായ സംഭവത്തിലും കോടതിയുടെ ഇടപെടലുണ്ടായിരിക്കുകയാണ്​.