കരുതൽ മേഖല: നിയമ വിദഗ്ധരുമായി കേരളം ചർച്ച തുടങ്ങി

ന്യൂഡൽഹി: സംസ്ഥാനത്തെ കരുതൽ മേഖല വിധിക്കെതിരെ സുപ്രീംകോടതിയെ സമീപിക്കുന്നതുമായി ബന്ധപ്പെട്ട് കേരള സർക്കാർ നിയമ വിദഗ്ധരുമായി ചർച്ച തുടങ്ങി.

സംസ്ഥാന സർക്കാറിന്‍റെ കേസുകളിൽ പതിവായി ഹാജരാകാറുള്ള, സുപ്രീംകോടതിയിലെ മുതിർന്ന അഭിഭാഷകൻ ജയദീപ് ഗുപ്തയുമായി അഡ്വക്കറ്റ് ജനറൽ കെ. ഗോപാലകൃഷ്ണ കുറുപ്പ് ഞായറാഴ്ച ചർച്ച നടത്തി. കഴിഞ്ഞ മാസമാദ്യം പുറപ്പെടുവിച്ച വിധിക്കെതിരെ പുനഃപരിശോധനാ ഹരജി സമർപ്പിക്കാനുള്ള ചർച്ചയാണ് പുരോഗമിക്കുന്നത്.

കേരളത്തിന്‍റെ നീക്കത്തിന് പിന്തുണ തേടി വനം മന്ത്രി എ.കെ. ശശീന്ദ്രൻ കേന്ദ്ര മന്ത്രി ഭൂപേന്ദ്രയാദവിനെ കണ്ടിരുന്നു. ഹരജിയിൽ സംസ്ഥാനത്തിന് അനുകൂലമായ നിലപാട് എടുക്കാമെന്നാണ് കേന്ദ്രമന്ത്രി ഉറപ്പുനൽകിയത്.