ഉദുമൽപേട്ടയിൽ കാർ കനാലിൽ വീണ്​ നാലു​ മലയാളി യുവാക്കൾ മരിച്ചു

അങ്കമാലി: വിനോദയാത്ര പോയ അങ്കമാലി സ്വദേശികളായ യുവാക്കൾ സഞ്ചരിച്ചിരുന്ന കാർ പൊള്ളാച്ചിക്കടുത്ത്​ അപകടത്തിൽപ്പെട്ട്​ നാലു പേർ മരിച്ചു. ഒരാൾ അത്ഭുതകരമായി രക്ഷപ്പെട്ടു. 12 അടിയോളം താഴ്​ചയുള്ള വഴിയരികിലെ കനാലിലേക്ക്​ മറിഞ്ഞായിരുന്നു അപകടം. 

അങ്കമാലി മൂക്കന്നൂർ പറമ്പയം പറപ്പിള്ളി വീട്ടിൽ ജോയിയുടെ മകൻ ജിബിൻ (25), കറുകുറ്റി ഏഴാറ്റുമുഖം കുറുങ്ങാടൻ വീട്ടിൽ പോളച്ചന്‍റെ മകൻ അമൽ (22), കാലടി മാണിക്കമംഗലം കോലഞ്ചേരി വീട്ടിൽ ഒൗസേഫി​ന്‍റെ മകൻ ജാക്​സൺ (20), അങ്കമാലി സ്വദേശിയായ റിജോ എന്നിവരാണ്​ മരിച്ചത്​. പൊള്ളാച്ചി സർക്കാശുപത്രിയിൽ പോസ്​റ്റ്​ മോർട്ടം നടത്തിയ മൂന്നു മൃതദേഹങ്ങൾ ഞായറാഴ്​ച രാത്രിയോടെ നാട്ടിലേക്ക്​ കൊണ്ടുവരും. 

ശക്തമായ അടിയൊഴുക്കിൽപ്പെട്ട്​ കാണാതായ അയ്യമ്പുഴ ചുള്ളി ഒലിമൗണ്ട്​ കോളാട്ടുകുടി വീട്ടിൽ ജോണിയുടെ മകൻ റിജോ (28)യുടെ മൃതദേഹം വൈകീട്ട് അഞ്ചു മണിയോടെ കണ്ടെത്തി. മൂക്കന്നൂർ മുൻ ഗ്രാമ പഞ്ചായത്ത്​ പ്രസിഡൻറ്​ പോൾ പി.ജോസഫി​ന്‍റെ മകൻ ആൽഫയാണ്​ (24) പരുക്കുകളോടെ രക്ഷപ്പെട്ടത്​. ഇയാളെ പൊള്ളാച്ചിയിലെ സർക്കാർ ആശുപത്രിയിൽ പ്രവേശിപ്പിച്ചു. 

ശനിയാഴ്​ച രാത്രി ഏഴ്​ മണിയോടെ അയ്യമ്പുഴ സ്വദേശിയുടെ കാർ വാടകക്കെടുത്ത്​ മൂക്കന്നൂരിൽ നിന്നാണ്​ അഞ്ചംഗ സംഘം ഉൗട്ടി അടക്കമുള്ള വിനോദ കേന്ദ്രങ്ങളിലേക്ക്​ യാത്ര തിരിച്ചത്​. രാത്രി പൊള്ളാച്ചിയിൽ മുറിയെടുത്ത്​ താമസിച്ചു. അതിന്​ ശേഷം ഞായറാഴ്​ച രാവിലെ ഉൗട്ടിയിലേക്കുള്ള യാത്രമധ്യേ 7.30ഒാടെയാണ്​ ഉടുമ്പൽപേട്ട ഗതിമേടക്കടുത്തെ വഴിയരികിലെ കനാലിലേക്ക്​  കാർ മറിഞ്ഞത്​. വളവ്​ തിരിയുന്നതിനിടെ നിയന്ത്രണം വിട്ട കാർ പൊടുന്നനെ ബ്രേക്കിട്ടു. അതോടെയാണ്​ പാളി നീങ്ങിയ കാർ മറിഞ്ഞ്​ അപകടമുണ്ടയതെന്ന്​ ദൃക്​സാക്ഷികൾ പറഞ്ഞു. 

റിജോ കാറിനകത്ത്​ നിന്ന്​ തെറിച്ച്​ വീണുവെന്നാണ്​ പറയുന്നത്​. ആൽഫയും കാറിനകത്ത്​ നിന്ന്​ പുറത്ത്​ വീണെങ്കിലും കാറിൽ അള്ളി പിടിച്ച്​ കിടക്കുകയായിരുന്നു. വഴിയരികിൽ ടാങ്കർ ലോറി കഴുകുകയായിരുന്ന ഡ്രൈവർ അപകടം കാണാനിടയായതാണ്​ ആൽഫയുടെ ജീവൻ രക്ഷിക്കുന്നതിനും രക്ഷാപ്രവർത്തനം വേഗത്തിലാക്കുന്നതിനും സഹായമായത്​. നാട്ടുകാരും യാ​ത്രക്കാരും പൊലീസുമാണ്​ രക്ഷാപ്രവർത്തനത്തിന്​ നേതൃത്വം നൽകിയത്​. മണിക്കൂറുകൾക്കുള്ളിൽ ക്രെയിൻ ഉപയോഗിച്ച്​ കാർ ഉയർത്തി മൂവരുടെ മൃതദേഹങ്ങളും കണ്ടെടുത്തു. 

ജിബിനും ആൽഫയും ഒഴികെയുള്ള മൂന്നു പേരും സഹോദരിമാരുടെ മക്കളാണ്​. അമൽ ചാലക്കുടി നിർമ്മല കോളജ്​ ബി.കോം അവസാന വർഷ വിദ്യാർഥിയാണ്​. മാതാവ്​: ചുള്ളി തോട്ടക്കര കുടുംബാംഗം മിനി. സഹോദരി: അനില പോൾ (ബി.എസ്​.സി നഴ്​സ്​, അമൃത നഴ്​സിങ്​ കോളജ്​). സംസ്​കാരം തിങ്കളാഴ്​ച വൈകുന്നേരം നാലിന്​ ഏഴാറ്റുമുഖം സ​​​​​​െൻറ്​ തോമസ്​ പള്ളി സെമിത്തേരിയിൽ നടക്കും.  

ജിബിന്‍റെ അമ്മ മേരി. സഹോദരി: ജിത (നഴ്​സ്​). ചൊവ്വാഴ്​ച വൈകുന്നേരം മൂന്നിന്​ മൂക്കന്നൂർ പറമ്പയം സ​​​​​​െൻറ്​ ജോസഫ്​ പള്ളി സെമിത്തേരിയിൽ ജിബിന്‍റെ സംസ്​കാരം നടക്കും. ജാക്​സ​ന്‍റെ അമ്മ കൊച്ചുത്രേസ്യ. മൂന്ന്​ സഹോദരിമാരുണ്ട്​. സംസ്​കാരം തിങ്കളാഴ്​ച ഉച്ചക്ക്​ 2.30ന്​ മാണിക്കമംഗലം ഇടവക പള്ളി സെമിത്തേരിയിൽ. റോസിലിയാണ്​ റിജോയുടെ അമ്മ. സഹോദരി: സുന.