കൂടൽമാണിക്യം ക്ഷേത്രത്തിലെ ജാതിവിവേചനം: ബാലു ജോലി ഉപേക്ഷിച്ചു; ഇനിയുമൊരു ‘ബാലു’ വന്നാൽ എന്തു ചെയ്യും?

ഇരിങ്ങാലക്കുട: ജാതി വിവേചനത്തിന്​ ഇരയായി കൂടല്‍മാണിക്യം ക്ഷേത്രത്തിലെ കഴകം പ്രവൃത്തി രാജിവെച്ച ആര്യനാട് സ്വദേശി ബാലുവിനു​ പിന്നാലെ ദേവസ്വം ഭരണസമിതിക്കും തന്ത്രിമാർക്കും പുതിയ ‘വെല്ലുവിളി’. ദേവസ്വം റിക്രൂട്ട്‌മെന്‍റ്​ ബോര്‍ഡ് പരീക്ഷയില്‍ ജനറല്‍ വിഭാഗത്തിൽ ഒന്നാം റാങ്കോടെയാണ് ബാലു ജോലിയിൽ പ്രവേശിച്ചത്. ബാലുവിന്‍റെ രാജി അംഗീകരിച്ചാൽ റാങ്ക്​ പട്ടികയി​ൽനിന്ന്​ അടുത്തയാളെ നിയമിക്കണം. ഈഴവ ഉദ്യോഗാര്‍ഥിക്കാണ് അടുത്ത അവസരം. വീണ്ടും കഴകം പ്രവൃത്തിക്ക്​ ഈഴവന്‍ നിയമിതനായാല്‍ ബാലുവിനെ ‘അവഹേളച്ചോടിച്ച’ തന്ത്രിമാരുടെയും വാരിയര്‍ സമുദായത്തിന്‍റെയും നിലപാട് എന്തായിരിക്കുമെന്നാണ്​ അറിയേണ്ടത്​. കൂടല്‍മാണിക്യം ക്ഷേത്രോത്സവം മേയ് എട്ടിന് കൊടിയേറാനിരിക്കുകയാണ്​.

ഫെബ്രുവരി 24നാണ്​ ബാലു കഴകം തസ്തികയിൽ ജോലിയില്‍ പ്രവേശിച്ചത്. പാരമ്പര്യ അവകാശികളെ മാറ്റിയുള്ള നിയമനത്തിനെതിരെ വാരിയർ സമാജവും അതിന് പിന്തുണയുമായി തന്ത്രിമാരും രംഗത്തുവരുകയും ക്ഷേത്രത്തിലെ പ്രതിഷ്ഠാദിന ചടങ്ങുകള്‍ മുടങ്ങുമെന്ന സാഹചര്യം വന്നു. ഇതോടെ സമ്മർദത്തിലായ കൂടൽമാണിക്യം ദേവസ്വം ഭരണസമിതി ബാലുവിനെ ‘വര്‍ക്കിങ്​ അറേഞ്ച്​മെന്‍റ്​’ എന്ന പേരിൽ ഓഫിസ് അറ്റൻഡർ തസ്തികയിലേക്കു​ മാറ്റി. ഇതോടെയാണ്​ ബാലു അവധിയില്‍ പോയത്​.

സംഭവം വിവാദമായതോടെ ക്ഷേത്രത്തിനു​ മുന്നില്‍ ഇടതുപക്ഷ പ്രസ്ഥാനങ്ങളടക്കം സംഘടനകളുടെ നേതൃത്വത്തിൽ സമരങ്ങളും പ്രതിഷേധങ്ങളും അരങ്ങേറി. വ്യാപക വിമർശനമ​ുയർന്നതോടെ സര്‍ക്കാര്‍ ദേവസ്വത്തിനോട് വിശദീകരണം തേടി. ഇതോടെ ബാലു അവധി കഴിഞ്ഞെത്തിയാൽ കഴകം പ്രവൃത്തിയില്‍തന്നെ നിയമിക്കുമെന്ന്​ ദേവസ്വത്തിന്​ പറയേണ്ടിവന്നു. ഓഫിസ് ജോലിയിൽ തുടരാന്‍ അനുവദിക്കണമെന്ന് ആവശ്യപ്പെട്ട് ബാലു അപേക്ഷ നല്‍കിയെങ്കിലും നിയമാനുസൃതമല്ലാത്തതിനാൽ അംഗീകരിക്കാനാവില്ലെന്ന്​ ദേവസ്വം മറുപടി നൽകി.

ഇതിനിടെ അവധി നീട്ടിയ ബാലു ചൊവ്വാഴ്ചയാണ് ബന്ധുക്കൾക്കൊപ്പം ദേവസ്വത്തില്‍ എത്തി രാജി നൽകിയത്. ജോലിയില്‍ തുടരുമെന്നാണ്​ മാധ്യമ പ്രവർത്തകരോട്​ പറഞ്ഞതെങ്കിലും ശാരീരിക പ്രയാസങ്ങളും വ്യക്തിപരമായ കാരണങ്ങളും ചൂണ്ടിക്കാട്ടി രാജിവെക്കുന്നതായി കാട്ടി അഡ്മിനിസ്​ട്രേറ്റർക്ക്​ കത്ത് നൽകി പോവുകയായിരുന്നു. ഇക്കാര്യം ദേവസ്വം റിക്രൂട്ട്മെന്‍റ്​ ബോര്‍ഡിന്​ റിപ്പോര്‍ട്ട് ചെയ്യുമെന്ന് കൂടല്‍മാണിക്യം ദേവസ്വം അധികൃതര്‍ അറിയിച്ചു.