കോവിഡ് സ്ഥിരീകരിച്ച ചാലക്കുടി സ്വദേശി മരിച്ചു

ചാലക്കുടി: കോവിഡ് സ്ഥിരീകരിച്ച ചാലക്കുടി സ്വദേശി മരിച്ചു. പടിഞ്ഞാറെ ചാലക്കുടി കോട്ടാറ്റ് കൊട്ടേക്കാട്ടുപറമ്പില്‍ രാമകൃഷ്ണന്‍ (68) ആണ് മരിച്ചത്. കറുകുറ്റിയിലെ സ്വകാര്യ ആശുപത്രിയില്‍ ചികിത്സയിലായിരുന്നു.

കോട്ടാറ്റ് ചായക്കട നടത്തുകയായിരുന്ന രാമകൃഷ്ണൻ ചൊവ്വാഴ്ച കുഴഞ്ഞു വീണതിനെ തുടര്‍ന്ന് ആശുപത്രിയില്‍ പ്രവേശിപ്പിക്കുകയായിരുന്നു. തുടർന്ന് നടന്ന കോവിഡ് പരിശോധനയില്‍ പോസിറ്റീവാണെന്ന് ബുധനാഴ്ചയാണ് തിരിച്ചറിഞ്ഞത്.

രക്തസമ്മര്‍ദ്ദം, പ്രമേഹം തുടങ്ങിയ രോഗങ്ങള്‍ക്ക് ചികിത്സയിലായിരുന്നു. ഗുരുതരാവസ്ഥയിൽ ആയതിനെ തുടർന്ന് കളമശ്ശേരി ആശുപത്രിയിലേക്ക് മാറ്റാനിരിക്കെയാണ് മരണം.

റോഡരികിൽ വീടിനോട് ചേർന്നാണ് രാമകൃഷ്ണന്‍റെ ചായക്കട. ഇയാള്‍ക്ക് നിരവധി പേരുമായി സമ്പര്‍ക്കമുണ്ടായിട്ടുണ്ട്. നേരത്തെ ചാലക്കുടിയിൽ വി.ആർ. പുരത്ത് കോവിഡ് ബാധിച്ച് ഒരാൾ മരിച്ചിരുന്നു. ഇതോടെ ചാലക്കുടിയില്‍ കോവിഡ് മരണം രണ്ടായി.