'ഉഭയസമ്മതപ്രകാരം ലൈംഗിക ബന്ധത്തിലേർപ്പെട്ടശേഷം ബലാത്സംഗ ആരോപണം ഉന്നയിക്കുന്ന കേസുകളിൽ കോടതികൾ ജാഗ്രത കാണിക്കണം'; ആരോപണവിധേയർ കുറ്റവിമുക്തരായാലും കളങ്കം പിന്തുടരുമെന്ന് ഹൈകോടതി

കൊച്ചി: വ്യാജ ബലാത്സംഗ ആരോപണത്തിനിരയാകുന്നവരെ കുറ്റവിമുക്തനാക്കിയാലും കളങ്കം വിടാതെ പിന്തുടരുമെന്നും ജീവിതത്തിലുടനീളം ബാധിക്കുമെന്നും ഹൈകോടതി.

ഇത്തരമൊരു കേസിൽ പിടിയിലായാൽ ഒരിക്കലും കഴുകിക്കളയാനാകാത്തവിധം അതിന്‍റെ കറ ജീവിതത്തിലുടനീളമുണ്ടാകും. പരസ്പര സമ്മതപ്രകാരമുള്ള ശാരീരികബന്ധത്തിന് ശേഷം ബലാത്സംഗ ആരോപണം ഉന്നയിക്കുന്ന കേസുകളിൽ മാറിയ സാഹചര്യങ്ങളും കോടതികൾ കണക്കിലെടുക്കണമെന്ന്​ ജസ്റ്റിസ് ബെച്ചു കുര്യൻ തോമസ്​ വ്യക്തമാക്കി. ബലാത്സംഗക്കേസിൽ പ്രതിയായ മലപ്പുറം സ്വദേശി സമീർ ഇബ്രാഹിമിന് മുൻകൂർജാമ്യം അനുവദിച്ച ഉത്തരവിലാണ് കോടതിയുടെ നിരീക്ഷണം.

സമൂഹമാധ്യമങ്ങളിലൂടെ പരിചയപ്പെട്ട വിദ്യാർഥിനി നൽകിയ പരാതിയിലാണ്​ ഹരജിക്കാരൻ പ്രതിയായത്​. വിവാഹിതയായ ഇവർ ഭർത്താവുമായി അകന്ന് കഴിയുകയായിരുന്നു. യുവതി കഴിഞ്ഞ നവംബർ മൂന്നിന് ട്രെയിനിൽ കോഴിക്കോട്ട്​ എത്തി. ഹരജിക്കാരനോടൊപ്പം പോകുമ്പോൾ താമരശ്ശേരിയിലെയും തിരൂരിലെയും ഹോട്ടൽ മുറിയിൽവെച്ച് ബലാത്സംഗം ചെയ്തെന്നായിരുന്നു പരാതി.

ബന്ധം ഉഭയസമ്മത പ്രകാരമായിരുന്നുവെന്ന്​ പരാതിക്കാരിയുടെ മൊഴിയിൽതന്നെ വ്യക്തമാണെന്ന്​ കോടതി ചൂണ്ടിക്കാട്ടി. ഉഭയസമ്മതപ്രകാരം ലൈംഗിക ബന്ധത്തിലേർപ്പെട്ടശേഷം ബലാത്സംഗ ആരോപണം ഉന്നയിക്കുന്ന കേസുകളിൽ കോടതികൾ ജാഗ്രത കാണിക്കണം. ഇത്തരം കേസുകളിൽ സാഹചര്യങ്ങൾ പരിശോധിക്കാതെ ജാമ്യഹരജിയിൽ തീരുമാനമെടുക്കുന്നത് ആരോപണത്തിന് ഇരയാകുന്നവരുടെ വ്യക്തിത്വത്തെ നശിപ്പിക്കും. ഇത്​ നീതിനിഷേധവുമാണെന്നും കോടതി വ്യക്തമാക്കി. തുടർന്ന്​ 50,000 രൂപയുടെ ബോണ്ടും തുല്യ തുകയുടെ രണ്ട് ആൾജാമ്യവുമടക്കം വ്യവസ്ഥകളോടെയാണ്​ മുൻകൂർ ജാമ്യം അനുവദിച്ചത്​.