ഫിലിം ചേംബർ പ്രസിഡന്റ്: ‘എന്നെ തടയാൻ അനിൽ തോമസ്​ ഗൂഢാലോചന നടത്തി’ - സജി നന്ത്യാട്ട്

കോട്ടയം: താൻ ഫിലിം ചേംബർ പ്രസിഡന്‍റാവാതിരിക്കാൻ മത്സരാർഥിയായ അനിൽ തോമസ്​ ഗൂഢാലോചന നടത്തിയെന്ന്​ മുൻ ജനറൽ സെക്രട്ടറി സജി നന്ത്യാട്ട് വാർത്തസമ്മേളനത്തിൽ ആരോപിച്ചു​. താൻ പ്രസിഡന്‍റായാൽ ഒരുമാസത്തിനകം പുറത്താക്കുമെന്ന്​ ചിലർ ഭീഷണിപ്പെടുത്തി.

വോട്ടർമാരെ സമ്മർദത്തിലാക്കാനില്ലെന്നു കരുതിയാണ്​ നാമനിർദേശപത്രിക പിൻവലിച്ചത്​. അനിൽ തോമസ്​ പ്രസിഡന്‍റായാൽ മലയാള സിനിമയുടെ ദുരന്തമായിരിക്കും. അനിൽ തോമസിനെതിരായ ആരോപണങ്ങൾ തെറ്റാണെങ്കിൽ മാനനഷ്ടക്കേസ് നൽകാൻ വെല്ലുവിളിക്കുന്നു. വിതരണക്കാരുടെ സംഘടനയിലെ തന്‍റെ അംഗത്വം മരവിപ്പിച്ചെന്നു പറയുന്നവർ ഔദ്യോഗികമായി ഇക്കാര്യം അറിയിച്ചിട്ടില്ല. ‘അമ്മ’യിലെയും ‘ഫെഫ്ക’യി​ലെയും ചിലർ വോട്ടർമാരെ ഫോണിൽ വിളിച്ച്​ സജി നന്ത്യാട്ടിന്​ വോട്ട്​ ചെയ്യരുതെന്നാവശ്യപ്പെട്ടു. ഫെഫ്ക ഇത്​ നിഷേധിച്ചാൽ ശബ്ദസന്ദേശങ്ങൾ തെളിവായി പുറത്തുവിടും. 27ന്​ നടക്കുന്ന തെരഞ്ഞെടുപ്പിൽ പ്രസിഡന്‍റ്​ സ്ഥാനത്തേക്ക്​ ശശി അയ്യൻചിറക്കാണ്​ തന്‍റെ പിന്തുണയെന്നും സജി നന്ത്യാട്ട്​ പറഞ്ഞു.