മലപ്പുറം ചങ്ങരംകുളത്ത് തോണി മറിഞ്ഞ് ആറു വിദ്യാർഥികൾ മുങ്ങി മരിച്ചു

ചങ്ങരംകുളം(മലപ്പുറം): ചങ്ങരംകുളത്തിനടുത്ത്​ നരണിപ്പുഴ കടുക്കുഴിക്കായലിൽ തോണി മറിഞ്ഞ്, ബന്ധുക്കളായ ആറ് കുട്ടികൾ മുങ്ങിമരിച്ചു. നാല്​ പെൺകുട്ടികളും രണ്ട്​ ആൺകുട്ടികളുമാണ്​ മരിച്ചത്​. ഒരു പെൺകുട്ടി ഉൾപ്പെടെ മൂന്നുപേരെ രക്ഷപ്പെടുത്തി. നരണിപ്പുഴ മാപ്പാലക്കല്‍ പ്രകാശ​​​െൻറ മകള്‍ പ്രസീന എന്ന ചിന്നു (13), മാപ്പാലക്കല്‍ ദിവ്യയുടെ മകന്‍ ആദിദേവ് (എട്ട്​), മാപ്പാലക്കല്‍ വേലായുധ​​​െൻറ മകള്‍ വൈഷ്ണ (18) മാക്കാലക്കല്‍ ജയ​​​െൻറ മക്കളായ പൂജ എന്ന ചിന്നു (15), ജനിഷ (11) മാറഞ്ചേരി പനമ്പാട് സ്വദേശി നെല്ലിക്കല്‍ തറയില്‍ ശ്രീനിവാസ​​​െൻറ മകന്‍ ആദിനാഥ് ​(14) എന്നിവരാണ് മരിച്ചത്. ചൊവ്വാഴ്​ച വൈകീട്ട്​ അഞ്ചോടെയായിരുന്നു​ നാടിനെ നടുക്കിയ അപകടം. രക്ഷപ്പെടുത്തിയവരെ വിവിധ ആശുപത്രികളിൽ പ്രവേശിപ്പിച്ചു. മൃതദേഹങ്ങൾ ചങ്ങരംകുളത്തെ സൺറൈസ്​ ആശുപത്രിയിലേക്ക്​ മാറ്റി. ഒമ്പത്​ പേരാണ്​ തോണിയിലുണ്ടായിരുന്നത്​.

തോണി തുഴഞ്ഞിരുന്നയാളും മരിച്ച വൈഷ്​ണയുടെ പിതാവുമായ വേലായുധൻ (55), നരണിപ്പുഴ വെള്ളക്കടവിൽ സുലൈമാ​​​െൻറ മകൾ ഫാത്തിമ (13), പനമ്പാട്​ നെല്ലിക്കൽതറയിൽ ശ്രീനിവാസ​​​െൻറ മകൾ ശിവഗി (17) എന്നിവ​െരയാണ്​ രക്ഷപ്പെടുത്തിയത്​. ചങ്ങരംകുളം സൺറൈസ്​ ആശുപത്രിയിലുള്ള ഫാത്തിമയും ശിവഗിയും തൃശൂരിലെ സ്വകാര്യ മെഡിക്കൽ ആശുപത്രിയിലുള്ള വേലായുധ​നും അപകടനില തരണം ചെയ്​തു​. കുട്ടികളെല്ലാം അയൽവാസികളുമാണ്​. 
 

നരണിപ്പുഴ തോണിയപകടത്തിൽ മുങ്ങിമരിച്ച കുട്ടികളുടെ മൃതദേഹം സൂക്ഷിച്ച ചങ്ങരംകുളം സ്വകാര്യ ആശുപത്രിയിൽ എത്തിയ ജില്ല പൊലീസ്​ മേധാവി ദേബേഷ്​ കുമാർ ബെഹ്​റ നാട്ടുകാരുമായി സംസാരിക്കുന്നു

 

അവധി ആഘോഷിക്കാനെത്തിയ ഇവർ വേലായുധനോടൊപ്പം സമീപത്ത്​ ബണ്ട്​ പൊട്ടിയുണ്ടായ ജലപ്രവാഹം കാണാൻ പോയതായിരുന്നു. കായലിൽ മീൻപിടിക്കാനും കളപറിക്കാനും ഉപയോഗിക്കുന്ന ചെറിയ പനവഞ്ചിയാണ്​ അപകടത്തിൽപ്പെട്ടത്​. കരയിൽനിന്ന്​ 200 മീറ്റർ അകലെയാണ്​ മറിഞ്ഞത്​. ഏതാനും മീറ്റര്‍ പിന്നിട്ടപ്പോഴേക്കും തോണി ചരിഞ്ഞ്​ അകത്ത് വെള്ളം കയറുകയും പിന്നീട് താഴുകയുമായിരുന്നു. വേലായുധന്‍ കുട്ടികളെ രക്ഷപ്പെടുത്താന്‍ പരമാവധി ശ്രമിച്ചെങ്കിലും സാധിച്ചില്ല. ഇദ്ദേഹം വെള്ളത്തിൽ കുഴഞ്ഞുവീണു. ആശുപത്രിയിൽ എത്തിച്ചപ്പോഴേക്കും കുട്ടികൾ മരിച്ചിരുന്നു. മരിച്ച പ്രസീനയുടെ പിതാവ്​ പ്രകാശനും വൈഷ്ണയുടെ പിതാവ്​ വേലായുധനും പൂജ, ജനിഷ എന്നിവരുടെ പിതാവ്​ ജയനും ആദിദേവി​​​െൻറ മാതാവായ ദിവ്യയും സഹോദരങ്ങളാണ്​. ആദിനാഥ്​ വേലായുധ​​​െൻറ ഭാര്യാസഹോദരിയുടെ മകനാണ്​. 

നാട്ടുകാരുടെ സംഘമാണ്​ ആദ്യം രക്ഷാപ്രവർത്തനം നടത്തിയത്​. പിന്നീട്​ പെരുമ്പടപ്പ്​, ചങ്ങരംകുളം പൊലീസും ഫയർഫോഴ്​സും ചേർന്നു. ബണ്ടിന്​ സമീപമുണ്ടായിരുന്ന കുട്ടികളാണ്​ അപകടവിവരം നാട്ടുകാരെ അറിയിച്ചത്​. ​േകാൾപടവുള്ള സ്ഥലത്ത്​ രക്ഷാപ്രവർത്തനം ശ്രമകരമായത്​ മരണനിരക്ക്​ കൂടാൻ കാരണമായി. ​േതാണി പായലിലും പുല്ലിലും കുരുങ്ങിയാണ്​ അപകടമുണ്ടായതെന്നാണ്​ പൊലീസി​​​െൻറ പ്രാഥമിക നിഗമനം. മലപ്പുറം ജില്ല പൊലീസ്​ സൂപ്രണ്ട്​ ദേബേഷ്​ കുമാർ ബെഹ്​റ, മലപ്പുറം എ.ഡി.എം എന്നിവർ തുടർനടപടികൾക്ക്​ നേതൃത്വം നൽകി. നിറയെ ചളിയാണ്​ നരണിപ്പുഴയിൽ. ​െപാന്നാനി കോൾനിലത്തിലെ ഏറ്റവും ആഴംകൂടിയ ഭാഗമാണിത്​.