നിര്‍ബന്ധിത പാദപൂജ: ബാലാവകാശ കമ്മീഷൻ കേസെടുത്തു

തിരുവനന്തപുരം: തൃശൂരിൽ സ്​കൂൾ വിദ്യാർഥികൾ നിര്‍ബന്ധിത പാദപൂജ നടത്തിയ സംഭവത്തിൽ ബാലാവകാശ കമീഷൻ കേസെടുത്തു. സംഭവത്തില്‍ ബന്ധപ്പെട്ടവരിൽനിന്ന്​ റിപ്പോര്‍ട്ട് തേടുകയും ചെയ്​തു. ഡി.പി.ഐ, ഡി.ഡി.ഇ, പ്രിൻസിപ്പൽ, സി. എൻ.എൻ ഹൈസ്കൂൾ എന്നിവർ 15 ദിവസത്തിനകം റിപ്പോർട്ട് നൽകാനാണ് കമീഷൻ നിർദേശിച്ചിരിക്കുന്നത്. 

സര്‍ക്കാര്‍ സ്കൂളുകളില്‍ 'ഗുരുവന്ദനം' പരിപാടി അവതരിപ്പിക്കാന്‍ അനുമതി നല്‍കിക്കൊണ്ട്​ പൊതുവിദ്യാഭ്യാസ ഡയറക്ടര്‍ കെ.വി. മോഹന്‍കുമാറാണ്​ ജൂണ്‍ 26ന്​ ഉത്തരവിറക്കിയത്​. അനന്തപുരി ഫൗണ്ടഷന്‍ സെക്രട്ടറിയുടെ കത്തി​​​​​​​െൻറ അടിസ്ഥാനത്തിലായിരുന്നു ഉത്തരവ്​. സംഭവത്തിൽ പത്രവാർത്തകളുടെ അടിസ്​ഥാനത്തിൽ സംസ്​ഥാന ന്യൂനപക്ഷ കമീഷൻ സ്വമേധയാ കേസെടുത്തിരുന്നു.

പൊതുവിദ്യാഭ്യാസ ഡയറക്​ടറോടും തൃശൂർ ജില്ല പൊലീസ്​ മേധാവിയോടും വിദ്യാഭ്യാസ ഉപ ഡയറക്​ടറോടും അടിയന്തര റിപ്പോർട്ട്​ ആവശ്യപ്പെടുകയും ചെയ്​തിരുന്നു​. ജൂലൈ 27നാണ്​ സ്​കൂളിൽ പാദപൂജ നടത്തിയത്​.