മുൻ സി.പി.എം എം.എൽ.എ അയിഷ പോറ്റി കോൺഗ്രസ് വേദിയിലേക്ക്; പാർട്ടിയുമായി നിലവിൽ ബന്ധമില്ലെന്ന് പ്രതികരണം

കൊല്ലം: സി.പി.എമ്മുമായി അകലം പാലിക്കുകയും സജീവ രാഷ്ട്രീയം ഉപേക്ഷിക്കുന്നതായി പ്രഖ്യാപിക്കുകയും ചെയ്ത കൊട്ടാരക്കര മുൻ എം.എൽ.എ പി. ​അ​യി​ഷ പോറ്റി കോൺഗ്രസ് വേദിയിലേക്ക്. കോൺഗ്രസ് കൊട്ടാരക്കര ബ്ലോക്ക് കമ്മിറ്റി സംഘടിപ്പിക്കുന്ന ഉമ്മൻചാണ്ടി അനുസ്മരണ സമ്മേളനത്തിലാണ് അ​യി​ഷ പോറ്റി പങ്കെടുക്കുന്നത്.

കോൺഗ്രസ് പരിപാടിയിൽ പങ്കെടുക്കുന്നത് വാർത്തയായതോടെ പ്രതികരണവുമായി അ​യി​ഷ പോറ്റി രംഗത്തെത്തി. സി.പി.എമ്മുമായി നിലവിൽ ബന്ധമില്ലെന്നും ഇഷ്ടമുള്ള കാര്യം ചെയ്യാമല്ലോ എന്നും അ​യി​ഷ പോറ്റി മാധ്യമങ്ങളോട് പറഞ്ഞു. വിവിധ രാഷ്ട്രീയ പാർട്ടികളിലെ നേതാക്കൾ പരിപാടിയിൽ പങ്കെടുക്കുന്നുണ്ടെന്നും അവർ വ്യക്തമാക്കി.

വ്യാഴാഴ്ച കലയപുരം ആശ്രയ സങ്കേതത്തിൽ നടക്കുന്ന അനുസ്മരണ പരിപാടി കൊടിക്കുന്നിൽ സുരേഷ് എം.പിയാണ് ഉദ്ഘാടനം ചെയ്യുന്നത്. പരിപാടിയിൽ ഉമ്മൻചാണ്ടി അനുസ്മരണ പ്രഭാഷണം അ​യി​ഷ പോറ്റി നടത്തും. ചാണ്ടി ഉമ്മൻ എം.എൽ.എയും പരിപാടിയിൽ പങ്കെടുക്കുന്നുണ്ട്.

2006ലെ നിയമസഭ തെരഞ്ഞെടുപ്പിൽ ​പി. അ​യി​ഷ പോ​റ്റി​യെ രം​ഗ​ത്തി​റ​ക്കി​യാണ് സി.​പി.​എം ആ​ർ. ബാ​ല​കൃ​ഷ്ണ​പി​ള്ള​യി​ൽ നി​ന്ന് കൊട്ടാരക്കര മ​ണ്ഡ​ലം തി​രി​ച്ചു​പി​ടി​ച്ചത്. 2011ലും 2016 ലും അ​യി​ഷ പോ​റ്റി​യി​ലൂ​ടെ സി.​പി.​എം മ​ണ്ഡ​ലം നി​ല​നി​ര്‍ത്തി. മ​ണ്ഡ​ലം പി​ടി​ച്ചെ​ടു​ത്ത അ​യി​ഷ പോ​റ്റി ര​ണ്ട് തെ​ര​ഞ്ഞെ​ടു​പ്പു​ക​ളി​ലും ഭൂ​രി​പ​ക്ഷം വ​ർ​ധി​പ്പി​ക്കുന്നതാ​ണ് കണ്ടത്.

2006ൽ 12,087 വോ​ട്ടു​ക​ളു​ടെ ഭൂരിപക്ഷത്തിലാണ് ​അ​യി​ഷ പോ​റ്റി​ ബാ​ല​കൃ​ഷ്ണ​പി​ള്ള​യു​ടെ കു​തി​പ്പി​ന് ത​ട​യി​ട്ട​ത്. 2011ൽ ​കേ​ര​ള കോ​ൺ​ഗ്ര​സ് ബി​യി​ലെ ഡോ.​ എ​ൻ. മു​ര​ളി​യെ 20,592 വോ​ട്ടു​ക​ൾ​ക്ക് പ​രാ​ജ​യ​പ്പെ​ടു​ത്തി​. 2016ൽ 4​2,632 വോ​ട്ടിന് കോ​ൺ​ഗ്ര​സി​ലെ സ​വി​ൻ സ​ത്യ​നെ തോൽപിച്ച അ‍യിഷ പോറ്റി മൂന്നാം തവണയും നിയമസഭാംഗമായി.