അട്ടപ്പാടിയിലെ പദ്ധതികളുടെ ഗുണം ആദിവാസികൾക്ക്​  ലഭിച്ചോ​െയന്ന്​ ഹൈ​േകാടതി

കൊച്ചി: പാലക്കാട് ജില്ലയിലെ അട്ടപ്പാടിയിലെ ആദിവാസികളുടെ ക്ഷേമത്തിനായി നടപ്പാക്കിയ പദ്ധതികളെക്കുറിച്ച്​ പരിശോധന നടത്തി​ റിപ്പോർട്ട്​ നൽകാൻ ഹൈകോടതിയുടെ ഉത്തരവ്​. പദ്ധതികളുടെ ഫലം ലഭിച്ചോ എന്ന്​  പരിശോധിക്കാന്‍ ജില്ല നിയമസഹായ അതോറിറ്റിയോട്​ കോടതി നിർദേശിച്ചു.

മേഖലയിലെ വികസനപ്രവര്‍ത്തനങ്ങള​ും പദ്ധതികളും സംബന്ധിച്ച സംസ്ഥാന സര്‍ക്കാറി​​​െൻറ സത്യവാങ്മൂലത്തില്‍ പറഞ്ഞിരിക്കുന്ന കാര്യങ്ങളെക്കുറിച്ച്​ നിയമസഹായ അതോറിറ്റി ചെയര്‍മാന്‍, സെക്രട്ടറി എന്നിവരടങ്ങിയ സമിതി പ്രദേശം സന്ദര്‍ശിച്ച് പരിശോധിച്ച് ഹൈകോടതിക്ക് റിപ്പോര്‍ട്ട്​ നൽകണം. അട്ടപ്പാടിയില്‍ മധു എന്ന ആദിവാസി യുവാവ് ആള്‍ക്കൂട്ടത്തി​​​െൻറ ആക്രമണത്തിന് ഇരയായി കൊല്ലപ്പെട്ട സംഭവത്തില്‍ സ്വമേധയാ എടുത്ത കേസിലാണ് ഇടക്കാല ഉത്തരവ്.

സര്‍ക്കാറി​​​െൻറ സത്യവാങ്മൂലത്തില്‍ വാഗ്ദാനങ്ങള്‍ മാത്രമാണുള്ളതെന്ന് വ്യാഴാഴ്​ച കേസ് പരിഗണനക്ക് എടുത്തയുടന്‍ അമിക്കസ് ക്യൂറി ചൂണ്ടിക്കാട്ടി. തുടർന്ന്​ പ്രശ്‌നപരിഹാരത്തിനുള്ള നിർദേശം കോടതി ആരാഞ്ഞു. വിവിധ പദ്ധതികള്‍ ഏകോപിപ്പിച്ച്​ നടപ്പാക്കാന്‍ ​േപ്രാജക്ട് ഓഫിസറെ നിയമിച്ചെന്നാണ് സര്‍ക്കാര്‍ അറിയിച്ചതെങ്കിലും നോഡല്‍ ഓഫിസറെ നിയമിക്കണമെന്ന ശിപാര്‍ശയെ കുറിച്ച് സര്‍ക്കാര്‍ അഭിപ്രായമൊന്നും പറഞ്ഞില്ലെന്ന കാര്യം അമിക്കസ് ക്യൂറി കോടതിയുടെ ശ്രദ്ധയിൽപ്പെടുത്തി.

സംരക്ഷിത വനം പദ്ധതിയുടെ ഭാഗമായി 517 കുടുംബങ്ങള്‍ക്ക് 483 ഏക്കര്‍ ഭൂമി നല്‍കിയെന്നാണ് സര്‍ക്കാര്‍ പറയുന്നത്​. എന്നാൽ, ഇത്​ യാഥാർഥ്യമാണെന്ന്​ ഉറപ്പില്ല. വിവിധ പദ്ധതികള്‍ പ്രകാരം 2006-07 കാലയളവില്‍ 3423 വീടുകള്‍ ആദിവാസികള്‍ക്ക് അനുവദിച്ചെങ്കിലും അതില്‍ 1220 വീടുകള്‍ മാത്രമേ പൂര്‍ത്തിയായുള്ളൂവെന്നാണ് അധികൃതർതന്നെ പറയുന്നത്. പദ്ധതി നടത്തിപ്പുകളുടെ സ്വഭാവം വ്യക്തമാക്കുന്നതാണ്​ ഇൗ കണക്കെന്നും അമിക്കസ് ക്യൂറി ചൂണ്ടിക്കാട്ടി.

ആദിവാസി മേഖലയിലെ പദ്ധതികളുടെ കാര്യത്തിൽ ഇങ്ങനെ സംഭവിക്കുന്നത്​ എന്തുകൊണ്ടാണെന്ന്​ കോടതി സര്‍ക്കാറിനോട്​ ചോദിച്ചു. ആദിവാസിക്ഷേമ പദ്ധതികള്‍ നല്ല രീതിയില്‍ പുരോഗമിക്കുന്നുണ്ടെന്നായിരുന്നു സർക്കാറി​​​െൻറ മറുപടി. ഈ പശ്ചാത്തലത്തില്‍ ഓഡിറ്റിങ് അനിവാര്യമാണെന്ന് അമിക്കസ് ക്യൂറി പറഞ്ഞു. ക്ഷേമപദ്ധതികളുടെ ആനുകൂല്യം ഉദ്ദേശിച്ചവര്‍ക്ക്​ ലഭിച്ചോ എന്ന കാര്യം പ്രധാനപ്പെട്ടതാണെന്ന്​ നിരീക്ഷിച്ച കോടതി തുടര്‍ന്നാണ് പദ്ധതികള്‍ സംബന്ധിച്ച അന്വേഷണത്തിന്​ ഉത്തരവിട്ടത്​.