‘ഒരു അബദ്ധം പറ്റിയതാണെന്ന് പി.സി. ജോർജ്; ഒരു അബദ്ധമല്ല, അബദ്ധങ്ങളോട് അബദ്ധമെന്ന് ഹൈകോടതി’

കൊച്ചി: ബി.ജെ.പി നേതാവ് പി.സി. ജോർജ് ജാമ്യവ്യവസ്ഥകൾ നിരന്തരം ലംഘിക്കുന്നുവെന്നും ഇത്​ ഏറെ ഗൗരവമുള്ള വിഷയമാണെന്നും ഹൈകോടതി. പ്രകോപനമുണ്ടായപ്പോഴാണ്​​ അധി​ക്ഷേപ പ്രയോഗം നടത്തിയതെന്ന വാദം ഹൈകോടതിയും മജിസ്​ട്രേറ്റ്​ കോടതികളും നൽകിയ ഉത്തരവുകൾ തുടർച്ചയായി ലംഘിക്കുന്നതിന്​ ന്യായീകരണമല്ല. സമാന കേസിൽ മുമ്പ് ജാമ്യം അനുവദിച്ചപ്പോൾ, പ്രസ്താവനകളിൽ ജാഗ്രത വേണമെന്ന് ഹൈകോടതി ഓർമിപ്പിച്ചിരുന്നതാണ്. എന്നാൽ, അതടക്കം ഉത്തരവുകൾ നിരന്തരം ലംഘിക്കുകയാണെന്ന് ജസ്​റ്റിസ്​ പി.വി. കുഞ്ഞികൃഷ്ണൻ വാക്കാൽ പറഞ്ഞു.

ചാനൽ ചർച്ചയിൽ മുസ്​ലിംവിരുദ്ധ പ്രസ്താവനകൾ നടത്തിയതിനെതിരെ രജിസ്റ്റർ ചെയ്ത കേസിൽ ജോർജ് നൽകിയ മുൻകൂർജാമ്യ ഹരജിയിലാണ്​ കോടതിയുടെ വാക്കാൽ നിരീക്ഷണം. ജോർജിന്‍റെ പരാമർശത്തിനെതിരെ മുസ്​ലിം യൂത്ത് ലീഗ് നൽകിയ പരാതിയിൽ ഈരാറ്റുപേട്ട പൊലീസാണ്​ കേസെടുത്തത്​. കോട്ടയം സെഷൻസ് കോടതി മുൻകൂർജാമ്യ ഹരജി തള്ളിയതിനെത്തുടർന്നാണ് ഹൈകോടതിയെ സമീപിച്ചത്.

മുസ്​ലിം ലീഗ് പ്രതിനിധി പ്രകോപിപ്പിച്ചതിനെത്തുടർന്ന് മറുപടി നൽകിയപ്പോൾ സംഭവിച്ച നാക്കുപിഴയാണിതെന്നും ബോധപൂർവമല്ലെന്നുമാണ് ഹരജിക്കാരന്‍റെ വാദം. അബദ്ധം തിരിച്ചറിഞ്ഞപ്പോൾ പരാമർശം പിൻവലിച്ച്​ മാപ്പ്​ പറഞ്ഞതായും അഭിഭാഷകൻ വാദിച്ചു.

എന്നാൽ, ഒരബദ്ധമല്ല, നിരന്തരം അബദ്ധങ്ങൾ ആവർത്തിക്കുകയാണ്​​ ഹരജിക്കാരനെന്ന്​ കോടതി വിമർശിച്ചു. 40 വർഷം എം.എൽ.എയായിരുന്ന ജോർജ്​ സാധാരണക്കാരനല്ല. മുമ്പ്​ ജാമ്യം നൽകിയ ഉത്തരവിൽ അധിക്ഷേപകരമായി പ്രസംഗിക്കുകയോ പ്രസ്താവന നടത്തുകയോ ​ചെയ്യരുതെന്നാണ്​ വ്യവസ്ഥയുള്ളതെന്നും ചാനൽ ചർച്ചയിലാണ്​​ അബദ്ധം സംഭവിച്ചതെന്നും അഭിഭാഷകൻ ബോധിപ്പിച്ചു. ​ചാനൽ ചർച്ചകൾ ലക്ഷങ്ങളാണ്​ കാണുന്നതെന്ന്​ കോടതി പ്രതികരിച്ചപ്പോൾ ലക്ഷങ്ങൾ കാണുന്നവിധം മാപ്പുപറഞ്ഞതായി ഹരജിക്കാരനും മറുപടി നൽകി.

ജോർജിന്റേത് വിദ്വേഷപരാമർശമാണെന്നും സമാനമായ മറ്റു കേസുകളുണ്ടെന്നും സർക്കാർ വാദിച്ചു. മുമ്പ് നാലുതവണ സമാന അധിക്ഷേപ പരാമർശത്തിന്‍റെ പേരിൽ എഫ്​.ഐ.ആർ രജിസ്​റ്റർ ചെയ്തിട്ടുണ്ട്​. ഇതിലെ വിശദാംശങ്ങളും ചാനൽ ചർച്ചയിലെ പരാമർശങ്ങളും സർക്കാർ അഭിഭാഷകൻ കോടതിയിൽ വായിച്ചു. മുമ്പ്​ നടത്തിയ പരാമർശത്തിന് ഒരുദിവസം ജയിലിൽ കഴിഞ്ഞതാണെന്നും ഹരജിക്കാരന്റെ പ്രായം കണക്കിലെടുക്കണമെന്നും മുൻകൂർ ജാമ്യം അനുവദിക്കണമെന്നും അഭിഭാഷകൻ ആവശ്യപ്പെട്ടു.

മുസ്​ലിംകളെല്ലാം തീവ്രവാദിക​ളാണെന്നും എല്ലാ മുസ്​ലിംകളും പാകിസ്താനിലേക്ക്​ പോകണമെന്നുമുള്ള പരാമർശം സാമുദായിക സ്പർധയുണ്ടാക്കുന്നതാണെന്ന്​ സർക്കാർ ചൂണ്ടിക്കാട്ടി. കോടതി ഉത്തരവുകളുടെ ലംഘനം നിസ്സാരമായി കാണാനാവില്ലെന്നും ഹരജിക്കാരൻ പൊലീസിൽ കീഴടങ്ങുന്നതാണ്​ ഉചിതമെന്നും കോടതി വ്യക്തമാക്കി. ഇക്കാര്യത്തിൽ ബുധനാഴ്ച നിലപാടറിയിക്കാൻ നിർദേശിച്ച കോടതി, അന്ന്​ വീണ്ടും ഹരജി പരിഗണിക്കാൻ മാറ്റി. അറസ്റ്റ് തടഞ്ഞുള്ള മുൻ ഉത്തരവിന്‍റെ കാലാവധി അതുവരെ നീട്ടുകയും ചെയ്തു.