കാസർകോട് മെഡി. കോളജ്; എം.ബി.ബി.എസ് പ്രവേശനം പരിഗണിച്ചേക്കും

കാസർകോട്​: ദേശീയ മെഡിക്കൽ കൗൺസിലിന്റെ മാനദണ്ഡ കുരുക്കിൽപെട്ട കാസർകോട്​ ഗവ. മെഡിക്കൽ കോളജിൽ എം.ബി.ബി.എസ് ​പ്രവേശനം പരിഗണിച്ചേക്കും. കഴിഞ്ഞയാഴ്ച ദേശീയ മെഡിക്കൽ കൗൺസിലിന്റെ വെർച്വൽ പരിശോധന പൂർത്തിയായിരുന്നു. പിന്നാലെ, ഡയറക്ടറേറ്റ്​ ഓഫ്​ മെഡിക്കൽ എജുക്കേഷൻ വഴി കൂടുതൽ വിവരങ്ങൾ ആരാഞ്ഞതുപ്രകാരം ആവശ്യമായവ സമർപ്പിച്ചിട്ടുണ്ട്.

ഒന്നാം വർഷത്തേക്കുള്ള അടിസ്ഥാന സൗകര്യങ്ങൾ പൂർത്തിയായി. പ്രാക്ടിക്കൽ പഠനം രണ്ടാം വർഷത്തേക്കാണ് ​വേണ്ടത്​. ഇതിനായി തൽക്കാലത്തേക്ക്​ കാസർകോട് ​ജനറൽ ആശുപത്രി നിശ്ചയിച്ചിട്ടുണ്ട്​. ആശുപത്രി ബ്ലോക്ക്​ ഉക്കിനടുക്കയിൽ പൂർത്തിയായി വരുന്നതേയുള്ളൂ. നാഷനൽ മെഡിക്കൽ കൗൺസിൽ വരുത്തിയ സീറ്റ്​ മാനദണ്ഡവും പരിഷ്കരണവും പ്രകാരം 10 ലക്ഷം ജനസംഖ്യക്ക്​ 100 സീറ്റാണ്​.

കേരളത്തിൽ 3500 സീറ്റുകൾക്കേ അർഹതയുള്ളൂ. എന്നാൽ, കേരളത്തിൽ 4000 സീറ്റുണ്ട്​. ഇത് മെഡിക്കൽ കോളജ്​ അനുവദിച്ച ശേഷം വന്ന മാനദണ്ഡമായതിനാൽ പ്രത്യേക പരിഗണന വേണമെന്ന്​ ആവശ്യപ്പെട്ടാണ്​ മെഡിക്കൽ എജുക്കേഷൻ ഡയറക്ടർ കേന്ദ്രത്തിന് കത്തെഴുതിയത്. മെഡിക്കൽ കോളജ്​ ഇല്ലാത്ത ജില്ല, എൻഡോസൾഫാൻ കീടനാശിനി ദുരന്തത്തിന്​ കാരണമായവരുടെ തുടർചികിത്സ, ന്യൂറോ വിഭാഗത്തിന്റെ അനിവാര്യത എന്നിവയൊക്കെയാണ്​ പ്രത്യേക പരിഗണനക്കുള്ള ന്യായമായി പറഞ്ഞിരിക്കുന്നത്​.

ദേശീയ മെഡിക്കൽ കൗൺസിൽ ആവശ്യപ്പെട്ടത്​ ചെയ്തിട്ടുണ്ടെന്നും എം.ബി.ബി.എസ്​ പ്രവേശനം വേഗത്തിൽ സാധ്യമാകുമെന്നാണ്​ പ്രതീക്ഷിക്കുന്നതെന്നും മെഡിക്കൽ എജുക്കേഷൻ ജോ. ഡയറക്ടർ ഡോ. കെ.വി. വിശ്വനാഥൻ പ്രതികരിച്ചു. കേരളത്തിൽ ഏറ്റവും അവസാനം അനുവദിച്ച രണ്ട്​​ മെഡിക്കൽ കോളജിൽ ഒന്നാണ്​ കാസർകോട്​. 2012ൽ പ്രഖ്യാപിച്ച കോളജിൽ​ 10 വർഷം കഴിഞ്ഞിട്ടും മെഡിക്കൽ പ്രവേശനം സാധ്യമാക്കാത്തതാണ്​ മാനദണ്ഡ കുരുക്കിൽപെടാൻ കാരണം.