സംഭാവന തരാത്തതിന് ഭീഷണി; ബി.ജെ.പി നേതാവിന് സസ്പെൻഷൻ

കൊല്ലം: ചവറയില്‍ കുടിവെള്ളം വിതരണം ചെയ്യുന്നതിന് കരാറെടുത്തിരിക്കുന്നയാളെ  ഭീഷണിപ്പെടുത്തിയ ബി.ജെ.പി നേതാവിനെ സസ്പെൻഡ് ചെയ്തു. പാര്‍ട്ടി ഫണ്ടിലേക്ക് 5000 രൂപ സംഭാവന നല്‍കണമെന്ന് ആവശ്യപ്പെട്ട് മനോജ് എന്നയാളെ ഭീഷണിപ്പെടുത്തിയ ബി.ജെ.പി കൊല്ലം ജില്ലാ കമ്മിറ്റി അംഗം സുഭാഷിനെയാണ് സസ്പെൻഡ് ചെയ്തത്.

ഈ മാസം 28നായിരുന്നു സംഭവം. ചവറ മണ്ഡലത്തിലെ സ്റ്റേറ്റ് ഫണ്ട് എന്ന പേരില്‍ 5000 രൂപ നല്‍കണമെന്ന് ആവശ്യപ്പെട്ട് ഭാരവാഹികള്‍ മനോജിനെ സമീപിച്ചിരുന്നു. എന്നാല്‍ 3000 രൂപയേ നല്‍കാനാവൂ എന്ന് മനോജ് വ്യക്തമാക്കി. പാര്‍ട്ടി തരുന്ന രസീതിലെ തുക നല്‍കാനാവില്ലെന്നും മനോജ് പറഞ്ഞു.

അന്ന് വൈകിട്ട് സുഭാഷ് മനോജിനെ ഫോണില്‍ വിളിക്കുകയും 5000 രൂപ നല്‍കണമെന്ന് ആവശ്യപ്പെടുകയും ചെയ്തു. പണം തരാനാകില്ലെന്ന് പറഞ്ഞതോടെ സുഭാഷ് ഫോണിലൂടെ മനോജിനോട് മോശമായി സംസാരിക്കുകയും വധഭീഷണി മുഴക്കുകയുമായിരുന്നു. തുടര്‍ന്ന് മനോജ് ബി.ജെ.പി ജില്ലാ നേതൃത്വത്തിന് പരാതി നല്‍കിയെങ്കിലും ജില്ലാ നേതാക്കള്‍ ഒത്തുതീര്‍പ്പിന് ശ്രമിക്കുകയായിരുന്നുവത്രെ.