കരട് വോട്ടർ പട്ടിക പ്രസിദ്ധീകരിക്കൽ നീട്ടി; അന്തിമപട്ടിക ജനുവരി നാലിന്​

തിരുവനന്തപുരം: പ്രളയദുരന്തത്തി​​​െൻറ പശ്ചാത്തലത്തില്‍ ലോക്‌സഭ തെരഞ്ഞെടുപ്പിനുള്ള സംസ്​ഥാനത്തെ കരട് വോട്ടർ പട്ടിക പ്രസിദ്ധീകരിക്കുന്നത് ഒരുമാസത്തേക്ക്​ നീട്ടിയതായി ചീഫ് ഇലക്ടറല്‍ ഓഫിസര്‍ ടിക്കാറാം മീണ വാർത്തസമ്മേളനത്തില്‍ അറിയിച്ചു. സെപ്​റ്റംബര്‍ ഒന്നിന് പട്ടിക പ്രസിദ്ധീകരിക്കാനാണ് നേരത്തേ തീരുമാനിച്ചിരുന്നത്. എന്നാൽ, പ്രളയത്തി​​​െൻറ പശ്ചാത്തലത്തിൽ കരട്​ പട്ടിക പ്രസിദ്ധീകരിക്കുന്നത്​ നീട്ടണമെന്ന്​ തെരഞ്ഞെടുപ്പ്​ കമീഷനോട്​ ആവശ്യപ്പെടുകയും അത്​ അംഗീകരിക്കുകയുമായിരുന്നു. ഒക്ടോബര്‍ ഒന്നിന് കരട് പട്ടിക പ്രസിദ്ധീകരിക്കും. 

പട്ടിക പരിശോധിക്കാനും ആക്ഷേപങ്ങളും പരാതികളും സമര്‍പ്പിക്കാനും വ്യക്തികൾക്കും രാഷ്​ട്രീയപാർട്ടികൾക്കും നവംബര്‍ 15 വരെ സാവകാശം നല്‍കും. പരാതികളില്‍ തീര്‍പ്പുകല്‍പ്പിക്കാൻ ഡിസംബര്‍ 10വരെ സമയം അനുവദിച്ചിട്ടുണ്ട്. താലൂക്ക് മുതല്‍ ചീഫ് ഇലക്ടറല്‍ ഓഫിസര്‍ തലത്തില്‍വരെ പരാതികള്‍ പരിഗണിച്ച് തീര്‍പ്പ് കല്‍പിക്കും. അതിനുശേഷം ജനുവരി മൂന്നിന് അന്തിമപട്ടിക തയാറാക്കി ചീഫ് ഇലക്​ഷന്‍ കമീഷന് സമര്‍പ്പിക്കും. ജനുവരി നാലിന് അന്തിമപട്ടിക പ്രസിദ്ധീകരിക്കും. പട്ടിക പുതുക്കുന്നതിനോടനുബന്ധിച്ച് സെപ്റ്റംബർ ഏഴിന് രാവിലെ 11.30ന് ചീഫ് ഇലക്ടറൽ ഓഫിസറുടെ ചേംബറിൽ അംഗീകൃത ദേശീയ/സംസ്ഥാന രാഷ്​ട്രീയപാർട്ടികളുടെ യോഗം വിളിച്ചിട്ടുണ്ട്.

2019 ജനുവരി ഒന്നിനോ അതിനുമുമ്പോ 18 വയസ്സ്​ പൂർത്തിയാകുന്ന എല്ലാ പൗരന്മാർക്കും സമ്മതിദായക പട്ടികയിൽ പേര് ചേർക്കാനും പട്ടികയിലെ വിവരങ്ങളിൽ നിയമാനുസൃത മാറ്റങ്ങൾ വരുത്താനുമാണ് പുതുക്കൽ പ്രക്രിയ നടത്തുന്നത്. 2019 ജനുവരി ഒന്നിന്​ 18 വയസ്സ്​​ തികയുന്നവർക്കും അന്തിമപട്ടികയിൽ ഇടംലഭിക്കും. അതിനുള്ള അപേക്ഷകൾ ഒക്​ടോബർ ഒന്ന്​ മുതൽ സമർപ്പിക്കാമെന്നും അദ്ദേഹം കൂട്ടിച്ചേർത്തു. 

പ്രളയത്തില്‍പെട്ടവര്‍ക്ക് സൗജന്യ വോട്ടർ കാര്‍ഡ് 
തിരുവനന്തപുരം: തെരഞ്ഞെടുപ്പ് കമീഷ​​​െൻറ തിരിച്ചറിയല്‍ കാര്‍ഡുകള്‍ നഷ്​ടമായവര്‍ക്ക് അവ സൗജന്യമായി വിതരണം ചെയ്യുമെന്ന് ചീഫ്​ ഇലക്​ടറൽ ഒാഫിസർ ടിക്കാറാം മീണ അറിയിച്ചു. സാധാരണ 25 രൂപ ഫീസ്​ ഇൗടാക്കിയാണ്​ കാർഡ്​ നൽകുന്നത്​. ദുരിതബാധിതർക്ക്​ സൗജന്യമായാണ്​ കാർഡ്​ നൽകുന്നത്​. ചീഫ് ഇലക്ടറര്‍ ഓഫിസറുടെ ഒൗദ്യോഗിക സൈറ്റായ www.ceokerala.gov.in ലും താലൂക്ക്​ ഒാഫിസുകളിലും അപേക്ഷഫോറം ലഭ്യമാണ്. ഫോം പൂരിപ്പിച്ച് താലൂക്ക് ഓഫിസില്‍ എത്തിക്കണം. പ്രളയബാധിത പ്രദേശങ്ങളിലുള്ളവര്‍ നേരിട്ട് അപേക്ഷയുമായി താലൂക്ക് ഓഫിസിലെത്തുന്നതിലുള്ള ബുദ്ധിമുട്ട്​ ശ്രദ്ധയിൽപെട്ടിട്ടുണ്ട്​. ബൂത്ത് ലെവല്‍ ഓഫിസര്‍മാര്‍ വഴി പൂരിപ്പിച്ച അപേക്ഷഫോറം ശേഖരിക്കുന്ന കാര്യം പരിഗണിക്കും. ഓണ്‍ലൈന്‍ അപേക്ഷ സ്വീകരിക്കാനുള്ള സൗകര്യം ഇപ്പോഴില്ല. ഇക്കാര്യത്തില്‍ അനുഭാവപൂർവമായ തീരുമാനം ഉണ്ടാകുമെന്നും ചീഫ് ഇലക്ടറല്‍ ഓഫിസര്‍ അറിയിച്ചു. 

ട്രാൻസ്​ ജെൻഡേഴ്​സിനും ഭിന്നശേഷിക്കാർക്കും പേര്​ ചേർക്കാൻ താൽപര്യക്കുറവ്​  
തിരുവനന്തപുരം: ട്രാന്‍സ്‌ജെന്‍ഡറുകൾ, ഭിന്നശേഷിക്കാർ വിഭാഗങ്ങളിലുള്ളവർക്ക്​ വോട്ടർ പട്ടികയിൽ ​േപര്​ ചേർക്കാൻ താൽപര്യക്കുറവ്​ കാട്ടുന്നെന്ന്​​ ചീഫ്​ ഇലക്​ടറൽ ഒാഫിസർ ടിക്കാറാം മീണ വാർത്തസമ്മേളനത്തിൽ അറിയിച്ചു. ട്രാൻസ്​ജെൻഡേഴ്​സിന്​ അവരുടെ പേരില്‍തന്നെ വോട്ടര്‍കാര്‍ഡുകള്‍ നല്‍കാൻ സൗകര്യം ഏര്‍പ്പെടുത്തിയെങ്കിലും 18 പേർ മാത്രമാണ് ഇതുവരെ അപേക്ഷിച്ചത്. കാല്‍ലക്ഷത്തോളം ട്രാന്‍സ്‌ജെന്‍ജഡറുകള്‍ സംസ്ഥാനത്തുണ്ടെന്നാണ്​ കരുതുന്നത്​. ഭിന്നശേഷിയുള്ളവരെ പ്രത്യേക വിഭാഗമായി വോട്ടര്‍പട്ടികയില്‍ ഉള്‍പ്പെടുത്താനുള്ള നടപടി പുരോഗമിക്കുകയാണ്. എന്നാൽ, 2660 പേരാണ് ഭിന്നശേഷിക്കാരുടെ പട്ടികയില്‍ പുതുതായി എത്തിയത്. സംസ്ഥാനത്ത് എട്ടുലക്ഷത്തോളം ഭിന്നശേഷിക്കാരുണ്ട്. ഇതില്‍ ഏഴുലക്ഷം പേർ വോട്ടവകാശത്തിന്​ യോഗ്യരാണ്. അവരെ കൂടുതലായി പട്ടികയിൽ ഉൾപ്പെടുത്താനുള്ള നടപടികളുണ്ടാകണമെന്ന്​ നിർദേശിച്ചിട്ടുണ്ട്​. 

കഴിഞ്ഞ ജനുവരിയിലെ കണക്ക്​ പ്രകാരം 2,52,28,851 ​േവാട്ടർമാരാണുള്ളത്​. തയാറാക്കിക്കൊണ്ടിരിക്കുന്ന കരട്​ വോട്ടര്‍പട്ടികയില്‍ 33,416 പുതിയ വോട്ടര്‍മാരാണ്​. 2019 ജനുവരിയില്‍ 18 വയസ്സ്​ പൂര്‍ത്തീകരിക്കുന്ന 32,759 പേര്‍ക്കുകൂടി വോട്ടവകാശം ലഭിക്കും. മരിച്ച 44,800 പേരെയും ഇരട്ടിപ്പ് കണ്ടെത്തിയ 6451 പേരെയും ഒഴിവാക്കും. 
വിദേശ ഇന്ത്യക്കാര്‍ക്ക് വോട്ടിന്​ അവസരം നല്‍കിയപ്പോള്‍ 10,708 പേരാണ് പുതുതായി അപേക്ഷിച്ചത്. 23,400 എൻ.ആര്‍.ഐ വോട്ടര്‍മാര്‍ നിലവിൽ പട്ടികയിലുണ്ട്​. ഒൗദ്യോഗിക വെബ്​സൈറ്റിലൂടെ 6 എ അപേക്ഷഫോറം പൂരിപ്പിച്ച്​ ഫയൽ ചെയ്​ത്​ വോട്ടവകാശം നേടാനുള്ള അവസരം എൻ.​ആർ.​െഎക്കാർക്ക്​ ലഭ്യമാക്കിയിട്ടുണ്ട്​. നിലവിലെ 24,460 പോളിങ് സ്‌റ്റേഷനുകള്‍ക്കൊപ്പം 467 പുതിയ സ്​റ്റേഷനുകൾകൂടി ഇത്തവണ ഉൾപ്പെടുത്തുമെന്നും ടിക്കാറാം മീണ പറഞ്ഞു.