'16 സി.സി ടി.വി കാമറകൾ, സെൻസർ സംവിധാനമുള്ള ഗേറ്റ്​, പുറത്തുനിന്ന്​ നോക്കിയാൽ കാണാത്തവിധം ഉയരത്തിൽ ചുറ്റുമതിൽ, പുറത്തുള്ളവരുടെ മുഖം തിരിച്ചറിയാനുള്ള സംവിധാനം, കാവലിന്​ നായ്'; ദമ്പതികളെ കൊലപ്പെടുത്തിയത് വ്യക്തമായ ആസൂത്രണത്തിനൊടുവിൽ

കോട്ടയം: '16 സി.സി ടി.വി കാമറകൾ, സെൻസർ സംവിധാനമുള്ള ഗേറ്റ്​, പുറത്തുനിന്ന്​ നോക്കിയാൽ കാണാത്തവിധം ഉയരത്തിൽ ചുറ്റുമതിൽ, പുറത്ത്​ ആരെങ്കിലും എത്തിയാൽ മുഖം തിരിച്ചറിയാനുള്ള സംവിധാനം, കാവലിന്​ നായ്'; ദമ്പതികളുടെ ജീവനെടുത്തത് വ്യക്തമായ ആസൂത്രണത്തിനൊടുവിൽ കൊലപ്പെടുത്തിയ സംഭവത്തിൽ കോട്ടയം​ ഇന്ദ്ര​പ്രസ്ഥ ഓഡിറ്റോറിയത്തിലെ ജോലിക്കാരനായിരുന്ന അസം സ്വദേശി അമിതിലേക്ക്​. ഇയാൾ തമിഴ്​നാട്ടിലേക്ക്​ കടന്നതായാണ്​ സൂചന. പണംതട്ടിയ കേസിൽ പൊലീസിൽ പിടിപ്പിച്ചതു​കൊണ്ട്​​ വിജയകുമാറിനോട്​ ഇയാൾക്ക്​ വൈരാഗ്യമുണ്ടായിരുന്നു.

ഓഡിറ്റോറിയത്തിലെ ക്ലീനിങ്​ ജോലിക്കാരനായിരുന്ന അമിത്​ ഭാര്യയാണെന്നു പറഞ്ഞ്​ ഒരു സ്ത്രീയെക്കൂടി ജോലിക്ക്​ കൊണ്ടുവന്നിരുന്നു. ഒരുമാസം കഴിഞ്ഞ്​ ഈ സ്ത്രീ ശമ്പളം തന്‍റെ കൈയിൽ തരണമെന്നാവശ്യപ്പെട്ടു. തുടർന്ന്​ ചോദിച്ചപ്പോഴാണ്​ ഇവർ ഭാര്യാഭർത്താക്കന്മാരല്ലെന്ന്​ വിജയകുമാർ അറിഞ്ഞത്​. ഇതോടെ ഇവരെ രണ്ടുപേരെയും പറഞ്ഞുവിട്ടു. കുറച്ചുദിവസം കഴിഞ്ഞ്​ വീണ്ടും ജോലിക്കെത്തിയ അമിത്,​ വിജയകുമാറിന്‍റെ മൊബൈൽ ഫോൺ മോഷ്ടിച്ച്​ അക്കൗണ്ടിൽനിന്ന്​ 1.20 ലക്ഷം രൂപ തട്ടിയെടുത്തു. ഇതുസംബന്ധിച്ച്​ വെസ്​റ്റ്​ പൊലീസിൽ പരാതി നൽകുകയും അമിത് അറസ്റ്റിലാവുകയും ചെയ്തു. ഈ മാസം ആദ്യമാണ്​ ജയിലിൽനിന്നിറങ്ങിയത്​.

പുറത്തുനിന്ന്​ നോക്കിയാൽ കാണാത്തവിധം ഉയരത്തിൽ ചുറ്റുമതിൽ, വീട്ടിൽ 16 സി.സി ടി.വി കാമറകൾ, സെൻസർ സംവിധാനമുള്ള ഗേറ്റ്​, ഗേറ്റിനു പുറത്ത്​ ആരെങ്കിലും എത്തിയാൽ മുഖം തിരിച്ചറിയാനുള്ള സംവിധാനം, കാവലിന്​ നായ് തുടങ്ങിയ നിരവധി സുരക്ഷാ സംവിധാനങ്ങൾ ഒരുക്കിയ വീട്ടിനകത്ത് രണ്ടുപേരെ കൊലപ്പെട്ടുവെന്നത് പ്രദേശവാസികളിൽ ആശങ്ക വർധിപ്പിച്ചിട്ടുണ്ട്.

പ്രധാന ഗേറ്റും പോക്കറ്റ്​ ഗേറ്റും മാത്രമാണ്​ അകത്തേക്ക്​ കടക്കാൻ ആകെയുള്ളത്​. വലിയ കോമ്പൗണ്ടിനുള്ളിലെ വീട്ടിൽ രാത്രി ഉണ്ടായിരുന്നത്​ ദമ്പതികളും പൊൻരാജ്​ എന്ന വയോധികനായ ജോലിക്കാരനും മാത്രം. പൊൻരാജിന്‍റെ ചെവിക്ക്​ ഭാഗികമായേ കേൾവിശേഷിയുള്ളൂ. രാത്രി വിജയകുമാർ വന്നപ്പോൾ പൊൻരാജ്​ ഗേറ്റ്​ തുറന്നുകൊടുക്കുകയും തുടർന്ന്​ പൂട്ടി തന്‍റെ മുറിയിൽ പോയി കിടക്കുകയും ചെയ്തു. രാവിലെ മാത്രമാണ്​ ഇയാൾ വിവരമറിയുന്നത്​.

വീട്ടിലെ നായ്ക്കളിലൊന്ന്​ കഴിഞ്ഞയാഴ്ചയാണ്​ ചത്തത്​. മറ്റൊരു നായ്​ കൂട്ടിലുണ്ടായിരുന്നെങ്കിലും കുരച്ചിട്ടില്ല. പ്രതിയെ പരിചയമുള്ളതുകൊണ്ടായിരിക്കാം ഇതെന്ന്​ സംശയിക്കുന്നു. ഗേറ്റ്​ വഴി കടക്കാനാവില്ലെന്ന്​ അറിയാവുന്ന പ്രതി മതിൽ ചാടിയാണ്​ അകത്തുകടന്നതെന്നാണ്​ നിഗമനം. വീടിന്‍റെ പിൻമതിലിൽ പ്രതി കയറിയതെന്നു കരുതുന്ന കാൽപാടുകളുണ്ട്​. പൊലീസ്​ നായ്​ ഗണ്ണർ വീടിനു ചുറ്റും ഓടിനടന്ന്​ മതിലിന്‍റെ ഈ ഭാഗത്തെത്തിയാണ്​ നിന്നത്​.

പൊലീസ്​​ പരിസരത്തെ സി.സി ടി.വി ദൃശ്യങ്ങൾ ശേഖരിച്ചെങ്കിലും പ്രതിയെക്കുറിച്ച്​ വിവരം ലഭിച്ചിട്ടില്ല. പ്രതി ഏതെങ്കിലും വാഹനം ഉപയോഗിച്ചതായി വിവരമില്ല. നാല്​ നമ്പറുകളാണ്​ വിജയകുമാറിനും ഭാര്യക്കും ഉള്ളത്​. ഈ നമ്പറുകൾ സ്വിച്ച്​ഓഫാണ്​. ഫോണുകൾ പ്രതിയുടെ കൈയിലാണെന്ന നിഗമനത്തിൽ പൊലീസ്​ വിജയകുമാറിന്‍റെയും ഭാര്യയു​ടെയും അക്കൗണ്ടുകൾ മരവിപ്പിച്ചിട്ടുണ്ട്​. വിജയകുമാറിന് വിദേശത്തും നാട്ടിലും നിരവധി ബിസിനസ്​ സംരംഭങ്ങളുണ്ട്​​.​