കുനിയിൽ ഇരട്ടക്കൊല: നാലു പ്രതികളുടെ ജാമ്യം റദ്ദാക്കി

മഞ്ചേരി: കുനിയിൽ ഇരട്ടക്കൊലക്കേസിൽ സാക്ഷികളെ സ്വാധീനിക്കാനും മൊഴിമാറ്റാനും ശ്രമിച്ചെന്ന കേസിൽ നാലു പ്രതികളുടെ ജാമ്യം വിചാരണ കോടതി റദ്ദാക്കി. ഒന്നാംപ്രതി കുറുവങ്ങാടൻ മുഖ്​താർ, നാലാംപ്രതി ചേലയിൽ ഉമ്മർ, ഏഴാംപ്രതി ഇരുമാംകുന്നത്ത് ഫസലുറഹ്മാൻ, എട്ടാംപ്രതി കിഴക്കേതൊടി മുഹമ്മദ് ഫത്തീൻ എന്നിവരുടെ ജാമ്യമാണ് മഞ്ചേരി മൂന്നാം അഡീഷൽ ജില്ല സെഷൻസ് കോടതി റദ്ദാക്കിയത്.

വിചാരണ ഇൗ കോടതിയിൽ സെപ്​റ്റംബർ 19 മുതൽ നടന്നുവരുകയാണ്. 22 പ്രതികളുള്ള കേസിൽ 21 പേരും പലപ്പോഴായി ജാമ്യത്തിൽ ഇറങ്ങിയവരാണ്. 2012 ജൂൺ 10ന് വൈകീട്ട് ഏഴോടെ കിഴുപറമ്പ് കുനിയിൽ അങ്ങാടിയിൽ കുനിയില്‍ കൊളക്കാടന്‍ അബ്​ദുല്‍കലാം ആസാദ് (45), സഹോദരന്‍ കൊളക്കാടന്‍ അബൂബക്കര്‍ (38) എന്നിവരെ വാഹനത്തിലെത്തിയ സംഘം വെട്ടിക്കൊലപ്പെടുത്തിയെന്നാണ് കേസ്. 2012 ജനുവരി അഞ്ചിന് ഇതേ സ്ഥലത്തുവെച്ച് കിഴുപറമ്പ് കുറുവങ്ങാടന്‍ അതീഖ് റഹ്​മാന്‍ കൊല്ലപ്പെട്ട കേസിലെ പ്രതികളായ രണ്ടുപേരാണ്​ കൊല്ലപ്പെട്ടത്​.