സ്വീകാര്യതയേറി അരൂക്കുറ്റി-എറണാകുളം ബോട്ട് സർവിസ്

വ​ടു​ത​ല: അ​രൂ​ർ ദേ​ശീ​യ പാ​ത​യി​ലെ ഉ​യ​ര​പ്പാ​ത നി​ർ​മാ​ണ​വു​മാ​യി ബ​ന്ധ​പ്പെ​ട്ട യാ​ത്ര​ക്ലേ​ശ​ത്തി​ന് പ​രി​ഹാ​ര​മാ​യി ദീ​ർ​ഘ നാ​ള​ത്തെ കാ​ത്തി​രി​പ്പി​നു​ശേ​ഷം സ​ർ​വി​സ് ആ​രം​ഭി​ച്ച അ​രൂ​ക്കു​റ്റി-​എ​റ​ണാ​കു​ളം ബോ​ട്ട് സ​ർ​വി​സി​ന്​ സ്വീ​കാ​ര്യ​ത​യേ​റു​ന്നു.ആ​ദ്യ​ദി​വ​സ​ങ്ങ​ളി​ൽ തേ​വ​ര​വ​രെ ഓ​ടി​യ ബോ​ട്ട് സ​ർ​വി​സ് യാ​ത്ര​ക്കാ​രു​ടെ കു​റ​വ് മൂ​ലം പ്ര​തി​സ​ന്ധി നേ​രി​ട്ടി​രു​ന്നു. നേ​വി​യു​ടെ സു​ര​ക്ഷാ മേ​ഖ​ല​യി​ലൂ​ടെ പോ​കാ​ൻ പ്ര​ത്യേ​ക അ​നു​മ​തി വേ​ണ​മെ​ന്ന​തി​നാ​ൽ ആ​ദ്യം എ​റ​ണാ​കു​ള​ത്തേ​ക്ക് ഓ​ടി​യി​ല്ല.

തേ​വ​ര​യി​ലെ​ത്തി​യാ​ലും ന​ഗ​ര ഹൃ​ദ​യ​ത്തി​ലെ​ത്താ​ൻ വേ​റെ വാ​ഹ​ന​ങ്ങ​ൾ ആ​ശ്ര​യി​ക്കേ​ണ്ടി വ​രു​ന്ന​തി​നാ​ൽ യാ​ത്ര​ക്കാ​ർ കു​റ​യാ​ൻ കാ​ര​ണ​മാ​യി. യാ​ത്ര​ക്കാ​രു​ടെ അ​ഭ്യ​ർ​ഥ​ന മാ​നി​ച്ച് അ​ഞ്ചാം നാ​ൾ മു​ത​ൽ നേ​വി​യു​ടെ അ​നു​മ​തി വാ​ങ്ങി എ​റ​ണാ​കു​ളം വ​രെ സ​ർ​വി​സ് ന​ട​ത്തു​ക​യാ​യി​രു​ന്നു. അ​തോ​ടെ യാ​ത്ര​ക്കാ​രു​ടെ എ​ണ്ണ​ത്തി​ൽ വ​ർ​ധ​ന വ​ന്ന് തു​ട​ങ്ങി​യി​ട്ടു​ണ്ട്.

യാ​ത്ര ദു​രി​തം അ​നു​ഭ​വി​ക്കാ​തെ കു​റ​ഞ്ഞ യാ​ത്ര നി​ര​ക്കി​ൽ എ​റ​ണാ​കു​ള​ത്ത് എ​ത്താ​വു​ന്ന​തി​നാ​ൽ വ​രും നാ​ളു​ക​ളി​ൽ യാ​ത്ര​ക്കാ​ർ കൂ​ടാ​നാ​ണ് സാ​ധ്യ​ത. ഉ​ദ്യോ​ഗ​സ്ഥ​ർ, വി​ദ്യാ​ർ​ഥി​ക​ൾ മ​റ്റ് അ​ത്യാ​വ​ശ്യ​ക്കാ​ർ​ക്കെ​ല്ലാം സൗ​ക​ര്യ​പ്പെ​ടു​ന്ന സ​മ​യ ക്ര​മീ​ക​ര​ണ​വും കൂ​ടു​ത​ൽ പേ​രെ ആ​ക​ർ​ഷി​ക്കു​ന്നു​ണ്ട്. ദി​വ​സ​വും രാ​വി​ലെ ഏ​ഴി​ന് പാ​ണാ​വ​ള്ളി ജെ​ട്ടി​യി​ൽ​നി​ന്ന് സ​ർ​വി​സ് തു​ട​ങ്ങി 7.25ന് ​പെ​രു​മ്പ​ളം മാ​ർ​ക്ക​റ്റ് ജെ​ട്ടി എ​ട്ടി​ന് അ​രൂ​ക്കു​റ്റി​യി​ലെ​ത്തി 8.45ന് ​തേ​വ​ര​യി​ലെ​ത്തി ഒ​മ്പ​തോ​ടെ എ​റ​ണാ​കു​ള​ത്ത് എ​ത്തും. വൈ​കീ​ട്ട്​ 5.45ന് ​എ​റ​ണാ​കു​ള​ത്തു​നി​ന്ന് പു​റ​പ്പെ​ട്ട് 6.05ന് ​തേ​വ​ര, 6.50ന് ​അ​രൂ​ക്കു​റ്റി, 7.20ന് ​പെ​രു​മ്പ​ളം, 7.30ന്​ ​പാ​ണാ​വ​ള്ളി എ​ന്നി​ങ്ങ​നെ​യാ​ണ് വൈ​കു​ന്നേ​ര​ത്തെ സ​ർ​വി​സ്.

ബോ​ട്ട് ഇ​ട​ക്കൊ​ച്ചി​യി​ലും അ​ടു​പ്പി​ക്ക​ണ​മെ​ന്ന ആ​വ​ശ്യം ഉ​യ​രു​ന്നു​ണ്ട്. തോ​പ്പും​പ​ടി​ക്ക് പോ​കു​ന്ന യാ​ത്ര​ക്കാ​ർ​ക്ക് ഇ​ത് പ്ര​യോ​ജ​ന​മാ​കു​മെ​ന്നാ​ണ് യാ​ത്ര​ക്കാ​ർ പ​റ​യു​ന്ന​ത്.​ ബോ​ട്ട് സ​ർ​വി​സ് നി​ല​നി​ർ​ത്താ​നാ​യാ​ൽ പ​ഴ​യ കാ​ല പ്ര​താ​പ​ത്തി​ലേ​ക്ക് അ​രൂ​ക്കു​റ്റി​യും പ​രി​സ​ര​വും മാ​റു​മെ​ന്ന​തി​ൽ ത​ർ​ക്ക​മി​ല്ല. അ​രൂ​ക്കു​റ്റി​യെ ടൂ​റി​സ്റ്റ് ഹ​ബ്ബാ​ക്കി മാ​റ്റാ​നും ക​ഴി​യും.