ജില്ല ആസ്ഥാനത്തെ ഡി.ടി.പി.സി ഹോട്ടലിന് താഴ് വീണിട്ട് രണ്ടുവർഷം

ചെറുതോണി: ഇടുക്കി ജില്ല ആസ്ഥാനത്തെത്തുന്ന സഞ്ചാരികൾക്ക് പ്രയോജനകരമാകേണ്ടിയിരുന്ന പാറേമാവിലെ ഡി.ടി.പി.സി ഹോട്ടൽ അടഞ്ഞിട്ട് രണ്ടുവർഷം. ഹോട്ടലിനോടനുബന്ധിച്ചുള്ള വിശാലമായ പാർക്കിങ് സൗകര്യവും ഉപയോഗശൂന്യമായി. ജില്ല ആസ്ഥാനത്തിന്റെ ടൂറിസം വികസനത്തിന് കരുത്തേകേണ്ടിയിരുന്ന സ്ഥാപനമാണ് ഇന്ന് നശിച്ചുകൊണ്ടിരിക്കുന്നത്.

ഒമ്പത് ലക്ഷം രൂപയുടെ കരാറിൽ ഹോട്ടൽ ഏറ്റെടുത്ത് പ്രവർത്തനം ആരംഭിക്കാൻ തയ്യാറായിരുന്ന ആദിവാസി വിഭാഗത്തിൽപ്പെട്ട വനിതാ സംരംഭകയുടെ കരാർ റദ്ദാക്കിയിരുന്നു. വ്യക്തിപരമായ വിയോജിപ്പാണ് നടപടിക്ക് പിന്നിലെന്ന് ആരോപണമുയർന്നിരുന്നു. തുടർന്നുണ്ടായ നിയമനടപടികളും കോടതി ഉത്തരവും കാരണം ഹോട്ടൽ വീണ്ടും തുറക്കാനുള്ള നീക്കം നീണ്ടുപോകുകയാണ്. ഇടുക്കി മെഡിക്കൽ കോളേജിനും പാറേമാവ് ആയുർവേദ ആശുപത്രിക്കും സമീപത്തുള്ള ഈ കേന്ദ്രം പ്രവർത്തനസജ്ജമായിരുന്നെങ്കിൽ വിനോദസഞ്ചാരികൾക്കും പൊതുജനങ്ങൾക്കും ഒരുപോലെ പ്രയോജനപ്പെടുമായിരുന്നു.

ബസുകൾക്ക് പാർക്ക് ചെയ്യാനും ഭക്ഷണം കഴിക്കാനും സൗകര്യമൊരുക്കുന്നതിനൊപ്പം രാത്രികാല ഭക്ഷണശാലകളും വിനോദപരിപാടികളും ഉൾപ്പെടുന്ന ഒരു സംവിധാനമായി ഇതിനെ വികസിപ്പിക്കണമെന്ന ആവശ്യവും ഉയരുന്നുണ്ട്. ഹോട്ടൽ അടഞ്ഞതോടെ സമീപത്തെ വ്യാപാരസ്ഥാപനങ്ങളെയും ഇത് ബാധിച്ചു.

ഒരു സംരംഭത്തിന്റെ കരാർ സംബന്ധിച്ച തർക്കം നീണ്ടുപോകുമ്പോൾ നഷ്ടമാകുന്നത് ഒരു നാടിന്റെ വികസനസാധ്യതകളാണ്. കെട്ടിടം നശിക്കുകയും ടൂറിസം സാധ്യതകൾ നഷ്ടപ്പെടുകയും ചെയ്യുന്നതിന് മുമ്പ് കോടതി നടപടികൾക്ക് അനുസൃതമായി പ്രശ്നം പരിഹരിച്ച് ഹോട്ടൽ തുറക്കാൻ ജില്ല ഭരണകൂടവും സർക്കാരും അടിയന്തരമായി ഇടപെടണമെന്നാണ് നാട്ടുകാരുടെ ആവശ്യം.