മരുതമൺ പള്ളി ചിറ പായൽ കയറി നശിക്കുന്നു

ഓയൂർ: പൂയപ്പള്ളി പഞ്ചായത്തിലെ മരുതമൺ പള്ളി ചിറ പായൽ കയറി നശിക്കുന്നതായി പരാതി. ലക്ഷങ്ങൾ ചെലവാക്കി മൂന്ന് വർഷം മുമ്പാണ് ചിറ നവീകരിച്ച് ചുറ്റുമതിൽ കെട്ടിയിരുന്നത്. ഇപ്പോൾ വേനൽക്കാലമായാൽ നിരവധി പേരാണ് ഈ ചിറയെ ആശ്രയിക്കുന്നത്.

പായൽ നീക്കം ചെയ്യാത്ത അവസ്ഥയായതിനാൽ പലർക്കും ചിറ ഉപയോഗിക്കാൻ കഴിയാത്ത അവസ്ഥയാണ്. ചിറയിലേക്ക് ഇറങ്ങുന്ന ഭാഗവും പരിസരവും കാട് കയറി കിടക്കുകയാണ്.

എത്ര ശക്തമായ വേനൽ പഞ്ചായത്തിലുണ്ടായാലും ഈ ചിറയിലെ വെള്ളം അധികം വറ്റാറില്ല. നിരവധി പേർക്ക് ആശ്രയമായ ഈ ചിറ ഉടൻ വൃത്തിയാക്കി ഉപയോഗപ്രദമാക്കണമെന്ന ആവശ്യം ശക്തമാണ്.