ഹൃസ്വചിത്ര മത്സരം വിദ്യാർഥികൾക്ക്​ നവ്യാനുഭവമായി

മലപ്പുറം: ഗവ: ഗേൾസ് ഹയർ സെക്കൻഡറി സ്കൂൾ മലപ്പുറം ഇംഗ്ലീഷ്​ ക്ലബ്​ വിദ്യാർഥികൾക്കായി സംഘടിപ്പിച്ച ഹൃസ്വചിത്ര മത്സരം ശ്രദ്ധേയമായി. പഠനത്തിന്‍റെ ഇടവേളകളിൽ മൊബൈൽ കാമറയുമായി വിദ്യാർഥികൾ ചുറ്റുവട്ടത്തേക്ക്​ ഇറങ്ങിയപ്പോൾ പിറന്നത്​ ഒരു പിടി കഥകളായിരുന്നു. ഒരു മിനിറ്റ് സമയത്തിനുള്ളിൽ ആശയം പ്രകടിപ്പിക്കണമെന്ന നിർദേശം പാലിച്ചുകൊണ്ടുതന്നെ​ വൈവിധ്യമായ വിഷയങ്ങളിൽ നിരവധി ഹൃസ്വചിത്രങ്ങളാണ്​ കുട്ടികൾ ഒരുക്കിയത്​. കോവിഡ് പശ്ചാത്തലത്തിൽ വീടുകളിൽ കഴിയുന്ന കുട്ടികളുടെ ഉത്സാഹം വർധിപ്പിക്കുവാൻ ഇത്തരം ക്ലബ്‌ പ്രവർത്തനങ്ങൾ അനിവാര്യമാണെന്ന്​ സ്കൂൾ ഹെഡ് മിസ്ട്രെസ് ജ്യോതി ലക്ഷ്മി ടീച്ചർ അറിയിച്ചു.

മത്സരത്തിനു മുന്നോടിയായി നിറമരുതൂർ ഗവൺമെന്‍റ്​ ഹയർ സെക്കൻഡറി അധ്യാപകനും ഹൃസ്വചിത്ര സംവിധായകനുമായ ജോൺ ജെ. പൗലോയുടെ സീറോ ബഡ്‌ജറ്റ്‌ ഷോർട്ട്​ഫിലിം നിർമ്മാണത്തെ കുറിച്ചുള്ള ക്ലാസ്സും വിദ്യാർഥികൾക്കായി ഒരുക്കി.

എട്ടാം ക്ലാസ്സ്‌ വിദ്യാർഥി മൽഹ വി. സംവിധാനം ചെയ്ത നേടിയ "തെരുവ് " മത്സരത്തിൽ ഒന്നാം സ്ഥാനം നേടി. ഫാത്തിമ സന, ഫാത്തിമ സൽവ എന്നിവർ ചേർന്ന്​ സംവിധാനം ചെയ്​ത "ചെരുപ്പ്" രണ്ടാം സ്ഥാനം നേടി. മിസ്ന ഷെറിൻ സംവിധാനം ചെയ്‍ത "ഓൺലൈൻ ക്ലാസ്​ ബിഗിൻസ് "എന്ന ചിത്രം മൂന്നാം സ്ഥാനത്തിന്​ അർഹമായി.