വെള്ളാങ്ങല്ലൂര്‍ ഇനി തരിശു രഹിതം; ജലാശയങ്ങളിലെ ചണ്ടിയും കുളവാഴയും നീക്കൽ തുടങ്ങി
text_fields
തൃശൂർ: തരിശുരഹിത ബ്ലോക്ക് പഞ്ചായത്ത് എന്ന ലക്ഷ്യത്തിലേക്ക് ചുവടുവെച്ച് വെള്ളാങ്ങല്ലൂര്‍ ബ്ലോക്ക് പഞ്ചായത്ത്. 2026-27 സാമ്പത്തിക വര്‍ഷത്തെ ജനകീയാസൂത്രണ പദ്ധതിയില്‍ ഉള്‍പ്പെടുത്തി ‘ജലാശയങ്ങളിലെ ചണ്ടിയും കുളവാഴയും നീക്കം ചെയ്യല്‍’ പദ്ധതിയുടെ ഒന്നാം ഘട്ടപ്രവര്‍ത്തനങ്ങള്‍ക്ക് തുടക്കമായി. 10 ലക്ഷം രൂപയാണ് പദ്ധതിക്കായി ബ്ലോക്ക് പഞ്ചായത്ത് വകയിരുത്തിയത്.
ഹൈഡ്രോളിക് മിനി എക്സ്‌കവേറ്റര്‍ ഉപയോഗിച്ചാണ് കനാലിലെ ചണ്ടിയും കുളവാഴകളും മറ്റ് ജലസസ്യങ്ങളും നീക്കം ചെയ്യുന്നത്. ഷണ്‍മുഖം കനാല്‍ മുതല്‍ ശ്രീകൃഷ്ണവിലാസം ബണ്ട് റോഡ് വരെ 1.5 കിലോമീറ്റര്‍ നീളത്തിലുള്ള ഔണ്ടറ ചാലും അനുബന്ധ ചാലുകളുമാണ് ഒന്നാം ഘട്ടത്തില്‍ വൃത്തിയാക്കുന്നത്.
പൂമംഗലം, പടിയൂര്‍ കോള്‍ കര്‍ഷക സംഘങ്ങളിലെ കൃഷിക്കായുള്ള പ്രധാന ജലസ്രോതസ്സാണ് ഔണ്ടറ കനാല്‍. വര്‍ഷങ്ങളായി ചണ്ടിയും കുളവാഴകളും നിറഞ്ഞ് കനാലിന്റെ ജലസംഭരണ ശേഷി കുറയുകയും പാടശേഖരങ്ങളിലേക്കുള്ള വെള്ളത്തിന്റെ ഒഴുക്ക് തടസ്സപ്പെടുകയും ചെയ്തിരുന്നു. പദ്ധതി പൂര്‍ത്തിയാകുന്നതോടെ മേഖലയിലെ തരിശുഭൂമികള്‍ കൃഷിയോഗ്യമാക്കാനും വെള്ളക്കെട്ട് ഒഴിവാക്കാനും കുടിവെള്ള സ്രോതസ്സുകള് സംരക്ഷിക്കാനും സാധിക്കും.
പടിയൂര്‍, പൂമംഗലം പഞ്ചായത്തുകളിലായി വ്യാപിച്ചുകിടക്കുന്ന കനാലിന്റെ അരിപ്പാലം വരെയുള്ള ഭാഗങ്ങള്‍ രണ്ടാം ഘട്ടത്തില്‍ വൃത്തിയാക്കാനാണ് ഭരണസമിതി ലക്ഷ്യമിടുന്നത്. കെ.എസ്.എ.എം.എം സി.ഇ.ഒ. ഡോ. യു. ജയകുമാര്‍, വെള്ളാങ്ങല്ലൂര്‍ ബ്ലോക്ക് പഞ്ചായത്ത് പ്രസിഡന്റ് വത്സല ബാബു, വൈസ് പ്രസിഡന്റ്, പടിയൂര്‍-പൂമംഗലം ഗ്രാമപഞ്ചായത്ത് പ്രസിഡന്റുമാര്‍, വികസന സ്റ്റാൻഡിങ് കമ്മിറ്റി ചെയര്‍മാന്‍മാര്‍, ജനപ്രതിനിധികള്‍, കൃഷി ഓഫിസര്‍മാര്‍, കൃഷി അസിസ്റ്റന്റ് ഡയറക്ടര്‍, കര്‍ഷക സംഘം പ്രതിനിധികള്‍ എന്നിവര്‍ സാഹചര്യം വിലയിരുത്തി ചര്‍ച്ച ചെയ്താണ് പദ്ധതിക്ക് രൂപം നല്‍കിയത്. ബ്ലോക്ക് പഞ്ചായത്ത് പ്രസിഡന്റ് വത്സല ബാബുവിന്റെ നേതൃത്വത്തിലുള്ള ഭരണസമിതിയാണ് പദ്ധതിക്ക് മേല്‍നോട്ടം വഹിക്കുന്നത്.