മരട് സ്കൂൾ വാൻ അപകടം: ചികിത്സയിലിരുന്ന കുട്ടി മരിച്ചു

മരട്: മരടിൽ സ്കൂൾ വാൻ കുളത്തിലേക്ക്​ മറിഞ്ഞ്​ ഉണ്ടായ അപകടത്തിൽ പരിക്കേറ്റ്​ ചികിത്സയിലിരുന്ന കുട്ടി മരിച്ചു. വൈറ്റില ജനത പാടത്ത്​ ലെയിനിൽ വാൻപുള്ളിൽ ജോബ് ജോർജ് - ജോമ ദമ്പതികളുടെ മകൾ കരോലിനാണ്​ (മൂന്നര) ഞായറാഴ്ച ഉച്ചയോടെ മരിച്ചത്. ഇതോടെ അപകടത്തിൽ മരിച്ചവരുടെ എണ്ണം നാലായി. 

കഴിഞ്ഞ തിങ്കളാഴ്ച മരട് ജയന്തി റോഡിലെ ക്ഷേത്രക്കുളത്തിലേക്ക്​ മറിഞ്ഞ വാനിലുണ്ടായിരുന്ന കരോലിനെ അബോധാവസ്ഥയിലാണ് പുറത്തെടുത്തത്. ആദ്യം വൈറ്റിലയിലെ ആശുപത്രിയിൽ പ്രവേശിപ്പിച്ചെങ്കിലും പിന്നീട് എറണാകുളം മെഡിക്കൽ ട്രസ്​റ്റ്​ ആശുപത്രിയിലേക്ക്​ മാറ്റി. ശ്വാസകോശത്തിൽ ചളിയും വെള്ളവും നിറഞ്ഞതിനെത്തുടർന്ന് വ​​െൻറിലേറ്ററി​​െൻറ സഹായത്തോടെയാണ് ജീവൻ നിലനിർത്തിയിരുന്നത്. ശരീരം പ്രതികരിക്കാത്തതിനാൽ മറ്റ്​ മരുന്നുകൾ നൽകാനും സാധിച്ചില്ല. ബുധനാഴ്ച സി.ടി സ്‌കാൻ ചെയ്തെങ്കിലും ആരോഗ്യത്തിൽ പുരോഗതിയില്ലെന്നായിരുന്നു പരിശോധന ഫലം. ഒരാഴ്ചയോളം അബോധാവസ്ഥയിൽ തുടർന്നശേഷമാണ് കരോലിൻ മരണത്തിന്​ കീഴടങ്ങിയത്. 

മൃതദേഹം മെഡിക്കൽ ട്രസ്​റ്റ്​ ആശുപത്രി മോർച്ചറിയിൽ സൂക്ഷിച്ചിരിക്കുകയാണ്. തിങ്കളാഴ്ച രാവിലെ എട്ടരക്ക്​ തൈക്കൂടം സ​​െൻറ് റാഫേൽ ദേവാലയത്തിൽ എത്തിച്ച് പൊതുദർശനത്തിന് വെക്കും. പത്തോടെ പള്ളി സെമിത്തേരിയിൽ സംസ്കരിക്കും. കരോലി​​െൻറ മാതാപിതാക്കളായ ജോബിനും ജോമക്കും ന്യൂസിലൻഡിലാണ്​ ജോലി. കരോലിൻ ബന്ധുവായ മരട് കാട്ടിത്തറ കുന്നലക്കാട് ജിനിയുടെ ഒപ്പമാണ് താമസിച്ചിരുന്നത്. അഞ്ചര മാസം പ്രായമുള്ള സഹോദരിയുണ്ട്. 

മരടിലെ ‘കിഡ്സ് വേൾഡ്’ പ്ലേ സ്കൂളിലെ വാഹനമാണ് അപകടത്തിൽപ്പെട്ടത്. അപകടത്തിൽ വിദ്യാർഥികളായ ആദിത്യൻ (നാല്), വിദ്യാലക്ഷ്മി (നാല്), ആയ ലത (45) എന്നിവരാണ്​ നേരത്തേ മരിച്ചത്​.