ആകാശ ഭക്ഷണശാലയിലെ അപകടം: രക്ഷാപ്രവർത്തനം രണ്ട്​ മണിക്കൂർ

അടിമാലി: നൂറടി ഉയരത്തിലുള്ള ആകാശ ഭക്ഷണശാലയിൽ കുടുങ്ങിയ സഞ്ചാരികളെ അഗ്​നി രക്ഷാ സേന രക്ഷപ്പെടുത്തിയത്​ അതിസാഹസികമായി. ആകാശ ഭക്ഷണശാല ജീവനക്കാർ ഏറെ പരിശ്രമിച്ചിട്ടും താഴെയിറക്കാൻ സാധിക്കാതെ വന്നതോടെയാണ്​ ഫയർഫോഴ്സിനെ വിവരം അറിയിച്ചത്​. സേന എത്തു​മ്പോൾ കാണുന്നത്​ കുട്ടികളെയുമായി ഭീതി പൂണ്ട്​ നിസ്സഹായരായി മുകളിൽ ഇരിക്കുന്നവരെയാണ്​.

മൂന്നാർ നിലയത്തിലെ അസി.സ്​റ്റേഷൻ ഓഫിസർ അജയകുമാറും ജീവനക്കാരിലൊരാളും ചേർന്ന് കയറിലൂടെ മുകളിലെത്തി. ​അപകടത്തിൽപ്പെട്ട ഓരോരുത്തരെയും സുരക്ഷ ഉപകരണങ്ങൾ ധരിപ്പിച്ച് അതി സാഹസികമായി താഴേക്കിറക്കുകയായിരുന്നു. താഴെ വല വിരിച്ചായിരുന്നു രക്ഷാപ്രവർത്തനം. വിവരമറിഞ്ഞ്​ നൂറ്​ കണക്കിന്​ നാട്ടുകാരും തടിച്ചു കൂടി. കുട്ടികളടക്കം മുകളിൽ കുടുങ്ങിയത്​​ കണ്ട്​ നിന്നവരെ ആശങ്കയിലാക്കി. സേനാംഗങ്ങൾ ഓരോരുത്തരെയായി താഴെ ഇറക്കുന്നത്​ നെഞ്ചിടിപ്പോടെയാണ്​ പലരും കണ്ടു നിന്നത്​​.

സെൻസർ തകരാറിനെ തുടർന്ന്​ ക്രെയിനിൽ ഘടിപ്പിച്ച ഹാങ്ങിങ് പ്ലാറ്റ്ഫോം നൂറടി ഉയരത്തിൽ കുടുങ്ങിയതാണ്​ അപകട കാരണമെന്നാണ് അഗ്​നിരക്ഷ സേനയുടെ​ നിഗമനം. അടിമാലി, മൂന്നാർ, ഇടുക്കി അഗ്​നി രക്ഷ നിലയങ്ങളിൽ നിന്നായി നിരവധി വാഹനങ്ങളും ഇരുപതോളം സേനാംഗങ്ങളും നാട്ടുകാരും രക്ഷാ പ്രവർത്തനത്തിൽ പങ്കാളികളായി.