ദേശീയപാത: എതിർപ്പുമായെത്തുന്നത്​ മറ്റ്​ ചില ശക്​തികളെന്ന്​ പിണറായി

തിരുവനന്തപുരം: ദേശീയപാത വികസനവുമായി ബന്ധപ്പെട്ട്​ എതിർപ്പുകൾക്ക് മുൻപന്തിയിൽ നിൽക്കുന്നത് മുഖ്യധാരാ രാഷ്ട്രീയ പാർട്ടികളല്ലെന്ന്​ മുഖ്യമന്ത്രി പിണറായി വിജയൻ. മറ്റ് ചില ശക്തികളാണ് എതിർപ്പുമായി രംഗ​ത്തുള്ളത്​. അവർക്ക് അവരുടേതായ താത്പര്യമുണ്ടെന്നും പിണറായി പറഞ്ഞു.

കീഴാറ്റുരിലെ മേൽപ്പാലം നിർമിക്കുന്നതിനോട്​ കേന്ദ്ര സർക്കാർ അനുകൂല നിലപാടല്ല സ്വീകരിച്ചത്. എതിർപ്പ് ഉയരുന്നത് കൊണ്ട് ദേശീയപാത വികസനം ഉപേക്ഷിക്കില്ല. ഭൂമി നഷ്ട്ടപ്പെട്ടവർക്ക് നഷ്ട്ടപരിഹാരവും പുനരധിവാസ സൗകര്യവും ഏർപ്പെടുത്തും. നാടി​​​​െൻറ പൊതുവായ കാര്യത്തിന് എല്ലാവരും സഹകരിക്കണമെന്നും പിണറായി ആവശ്യപ്പെട്ടു.

നേരത്തെ കീഴാറ്റുരിലും മലപ്പുറത്തും ദേശീയപാത വികസനത്തിനെതിരെ സമരം ഉയർന്നിരുന്നു. കീഴാറ്റുരിൽ മേൽപ്പാലത്തിനുള്ള സാധ്യതയും സർക്കാർ പരിശോധിക്കുന്നതായി റിപ്പോർട്ടുണ്ടായിരുന്നു. ഇതിന്​ പിന്നാലെയാണ്​ നിലപാട്​ വ്യക്​തമാക്കി പിണറായി രംഗത്തെത്തിയിരിക്കുന്നത്​.