നിമിഷപ്രിയ: ഇടപെടൽ ഗുണം ചെയ്​തതിന്‍റെ സന്തോഷത്തിൽ റിയാദിലെ പ്രവാസി വ്യവസായി

റിയാദ്: നിമിഷപ്രിയയുടെ വധശിക്ഷ മാറ്റിവെച്ച കോടതി വിധിയിൽ ചാരിതാർഥ്യവുമായി റിയാദിലെ പ്രവാസി വ്യവസായി. ഈ വിഷയത്തിൽ കുറച്ചുനാളുകളായി ഇടപെടൽ നടത്തിവന്ന ബംഗളുരു സ്വദേശി സാജൻ ലത്തീഫ്​ ​കൊല്ലപ്പെട്ട യമനി പൗരൻ തലാലിന്‍റെ കുടുംബവുമായി താനും ചാണ്ടി ഉമ്മൻ എം.എൽ.എയും ഓൺലൈനായി നേരിട്ടാണ്​ ചർച്ച നടത്തിയിരുന്നതെന്ന്​ ‘ഗൾഫ് മാധ്യമ’ത്തോട്​ പറഞ്ഞു.

താനും ചാണ്ടി ഉമ്മനുമല്ലാതെ ആരും ഇതുവരെ തലാലിന്‍റെ കുടുംബവുമായി ബന്ധപ്പെട്ടിട്ടില്ലെന്നും ഇപ്പോൾ കേരളത്തിലെ മാധ്യമങ്ങളിൽ വരുന്ന വാർത്തകൾ വസ്​തുതാപരമല്ലെന്നും സാജൻ പറഞ്ഞു. കൂടുതൽ ഒന്നും ഇപ്പോൾ പറയുന്നില്ല. കാര്യങ്ങളെല്ലാം ചാണ്ടി ഉമ്മൻ വിശദീകരിക്കും. വാർത്തയിൽ ഇടം നേടാൻ താൽപര്യമില്ല. അതുകൊണ്ടാണ്​ മാധ്യമങ്ങളോടൊന്നും പറയാതിരുന്നത്​. നടന്ന കാര്യങ്ങൾക്കെല്ലാം രേഖകൾ തന്നെ തെളിവായുണ്ട്​. എന്നാൽ, വിശദാംശങ്ങൾ മുഴുവൻ ഇപ്പോൾ പൊതുസമൂഹത്തോട് പങ്കവെക്കുന്നതിന് കരാർ അനുസരിച്ച്​ തടസമുണ്ട്. ദിയാധനത്തി​ന്‍റെ കാര്യത്തിൽ ഉൾപ്പടെ ധാരണയുണ്ടായിട്ടുണ്ടെന്നും സാജൻ കൂട്ടിച്ചേർത്തു.

ഇപ്പോഴുണ്ടായ വിധി കൂട്ടായ ശ്രമങ്ങളുടെ ഫലമാണെന്ന്​ ചാണ്ടി ഉമ്മൻ എം.എൽ.എ ‘ഗൾഫ് മാധ്യമ’ത്തോട് പറഞ്ഞു. റിയാദിൽ വ്യവസായിയായ ബംഗളുരു സ്വദേശി സാജൻ ലത്തീഫി​ന്‍റെ ഇ​ടപെടൽ ഇക്കാര്യത്തിൽ പ്രയോജനം ചെയ്​തെന്ന്​ അദ്ദേഹം സ്ഥിരീകരിച്ചു. യമനിലെ തലാലി​ന്‍റെ കുടുംബവുമായി സാജൻ ലത്തീഫ്​ ബന്ധപ്പെട്ട് സംസാരിച്ചിരുന്നത്​ തനിക്കറിയുന്ന കാര്യമാണ്​. താനുമായി ചേർന്നാണ് സാജൻ ലത്തീഫ് ഈ ശ്രമങ്ങൾ നടത്തിയതെന്നും ചാണ്ടി ഉമ്മൻ കൂട്ടിച്ചേർത്തു.

കാന്തപുരം എ.പി. അബൂബക്കർ മുസ്​ലിയാർക്ക് വിഷയത്തിൽ ഇടപെടണമെന്ന് ആവശ്യപ്പെട്ട് താൻ കത്ത് നൽകിയിരുന്നു. അദ്ദേഹവും കാര്യമായ ഇടപെടൽ നടത്തി. എന്നാൽ, കോടതി വിധിയുണ്ടായത് ആരുടെ ശ്രമഫലമാണെന്ന് കൃത്യമായി അറിയില്ലെന്നും താത്കാലികമായെങ്കിലും ആശ്വാസ വിധിയുണ്ടായതി​ന്‍റെ ആഹ്ലാദത്തിലാണെന്നും ചാണ്ടി ഉമ്മൻ പറഞ്ഞു.