കുപ്രസിദ്ധ മോഷ്ടാവ് സാമ്പാർ മണി വിരാജ്​പേട്ടയിൽ പിടിയിൽ; കർണാടക വനപ്രദേശത്ത് ഒളിവിൽ താമസിച്ചത് ‘സ്വാമി’യായി

രാമപുരം: 23ലേറെ മോഷണ കേസുകളിലെ പ്രതിയും അന്തർ സംസ്ഥാന മോഷ്ടാവുമായ ബിജീഷ് എന്ന സാമ്പാർ മണി എട്ടു വർഷത്തിനു ശേഷം കർണാടകയിലെ വിരാജ്​പേട്ടയിൽ നിന്ന്​ പിടിയിൽ. രാമപുരം ചിറക്കൽ കാവ് ദേവീക്ഷേത്രത്തിലെ ശ്രീകോവിൽ കുത്തിത്തുറന്ന് തിരുവാഭരണത്തിലെ ഗോളകം മോഷ്​ടിച്ച കേസിന്‍റെ അന്വേഷണത്തെ തുടർന്നാണ്​ പിടിയിലായത്​.

രാമപുരം പൊലീസ് സംഭവസ്ഥലത്തു നിന്നും ലഭിച്ച വിരലടയാളം കേന്ദ്രീകരിച്ച് അന്വേഷണം നടത്തിയെങ്കിലും പ്രതിയെ കണ്ടെത്താൻ സാധിച്ചിരുന്നില്ല. ക്ഷേത്രങ്ങളും പള്ളികളും വിദേശ മദ്യഷാപ്പുകളും നോക്കി വെക്കുകയും വെളുപ്പിന് ഒരു മണിക്കും മൂന്നു മണിക്കും ഇടയിൽ മോഷണം നടത്തി തിരികെ പോവുകയുമാണ്​ മോഷ്ടാവിന്‍റെ രീതി. സ്ഥിരമായി ഫോൺ ഉപയോഗിക്കാത്ത ഇയാൾ ചെല്ലുന്ന സ്ഥലങ്ങളിൽ നിന്ന്​ മോഷ്ടിക്കുന്ന ഫോൺ ആണ്​ ഉപയോഗിക്കുക.

ഊട്ടിയിൽ വിദേശമദ്യഷാപ്പ് കുത്തിത്തുറന്ന് മോഷണം നടത്തിയ കേസിൽ പൊലീസ് വെടിവെച്ചാണ് ഇയാളെ പിടികൂടിയത്. കർണാടകയിലെ വനപ്രദേശങ്ങളിൽ പല സ്ഥലങ്ങളിലായി മാറിമാറി താമസിക്കുകയായിരുന്നു. പ്രതിയെ തിരിച്ചറിഞ്ഞതു മുതൽ തമിഴ്നാട്, കർണാടക സംസ്ഥാനങ്ങളിലായി അന്വേഷണം ആരംഭിച്ചു. കർണാടക ബോർഡറിൽ വനപ്രദേശത്ത് സ്വാമിയായി ചമഞ്ഞ്​ താമസിച്ചു വരുന്നതായി സൂചന ലഭിച്ചു.

പ്രതിയുടെ ഒളിത്താവളം കൃത്യമായി മനസിലാക്കിയ രാമപുരം എസ്​.എച്ച്​.ഒയുടെ നേതൃത്വത്തിലുള്ള സംഘം പ്രതിയെ കർണാടകയിലെ വിരാജ് പേട്ടയിൽ നിന്ന്​ അറസ്റ്റ് ചെയ്യുകയായിരുന്നു. കേരളത്തിൽ വയനാട്, കോട്ടയം, തിരുവനന്തപുരം, ആലപ്പുഴ, കോഴിക്കോട് ജില്ലകളിലായി 15ൽപരം മോഷണം കേസുകളും തമിഴ്നാട്ടിൽ ആറു മോഷണ കേസുകളും കർണാടകയിൽ രണ്ട് മോഷണ കേസുകളും ഇയാൾക്കെതിരെയുണ്ട്.

ജില്ല പൊലീസ് മേധാവി ഷാഹുൽ ഹമീദിന്റെ നിർദേശ പ്രകാരം രാമപുരം സ്​റ്റേഷൻ ഇൻസ്പെക്ടർ കെ. അഭിലാഷ് കുമാറിന്‍റെ നേതൃത്വത്തിൽ എസ്.ഐ അനിൽ കുമാർ, എസ്​.സി.പി.ഒ വിനീത്, സി.പി.ഒ ശ്യാം മോഹൻ എന്നിവരാണ് പ്രതിയെ അറസ്റ്റ് ചെയ്തത്.